മുംബൈ: ദേശീയ അവാർഡ് ജേതാവായ സംവിധായകൻ വിശാൽ ഭരദ്വാജ് (Vishal Bhardwaj) പുതിയ സിനിമയുമായി എത്തുന്നു. ഇത്തവണ മിസ്റ്ററി ത്രില്ലർ സീരീസ് 'ചാർലി ചോപ്ര'യും (Charlie Chopra) ആയാണ് പ്രശസ്‌ത സംവിധായകൻ എത്തുന്നത്. 'ചാർലി ചോപ്ര' മോഷൻ പോസ്റ്ററും പൈലറ്റ് എപ്പിസോഡിന്‍റെ എക്‌സ്‌ക്ലൂസീവ് പ്രിവ്യൂവും അണിയറ പ്രവർത്തകർ പുറത്തുവിട്ടു.
ലോക പ്രശസ്‌ത എഴുത്തുകാരി അഗത ക്രിസ്റ്റി (Agatha Christie)യുടെ അതി പ്രശസ്‌തമായ നോവലിനെ ആസ്‌പദമാക്കി ഒരുക്കുന്ന പരമ്പരയാണ് 'ചാർളി ചോപ്ര'. സംവിധാനത്തിന് പുറമെ 'ചാർളി ചോപ്ര'യുടെ സഹനിർമാതാവും സഹ രചയിതാവുമാണ് വിശാൽ ഭരദ്വാജ്. അഞ്ജും രാജബലിക്കും ജ്യോത്സന ഹരിഹരനും ഒപ്പമാണ് ഭരദ്വാജ് ഈ പരമ്പര എഴുതിയിരിക്കുന്നത്.
എത്ര ഊഹിക്കൻ ശ്രമിച്ചാലും പിടിതരാത്ത നിഗൂഢത പേറുന്ന വഴികളിലൂടെ, അപസർപ്പക കഥകളിലേക്ക് വായനക്കാരെ കൊണ്ടുപോകുന്ന എഴുത്തുകാരിയുടെ ഏറെ നിഗൂഢമായ കഥയുടെ ദൃശ്യാവിഷ്‌കാരം അനുഭവിക്കാൻ ആകാംക്ഷയോടെ കാത്തിരിക്കുകയാണ് സിനിമാസ്വാദകർ. ലോകത്തിലെ ഏറ്റവും കൂടുതൽ വിറ്റുപോകുന്ന നോവലുകളിലേറെയും 'അപസർപ്പക കഥകളുടെ റാണി' എന്നറിയപ്പെടുന്ന അഗത ക്രിസ്റ്റി അഥവ അഗത മേരി ക്ലാരിസ മില്ലർ ക്രിസ്റ്റിയുടേതാണ്.
അഗത ക്രിസ്റ്റിയുടെ എഴുത്തുകളുടെ കടുത്ത ആരാധകനാണ് താനെന്ന് വിശാൽ ഭരദ്വാജ് നേരത്തെ പറഞ്ഞിരുന്നു. "ഞാൻ അഗത ക്രിസ്റ്റിയുടെ എല്ലാ നിഗൂഢ കഥകളും വായിച്ചാണ് വളർന്നത്. അവരുടെ പ്ലോട്ടുകളും കഥാപാത്രങ്ങളും പശ്ചാത്തലവും സമാനതകളില്ലാത്തവയാണ്. കഥാകൃത്തുക്കൾക്ക് ഇന്നും ആവേശം പകരുന്നതാണ് അവരുടെ എഴുത്തുകൾ'- വിശാൽ ഭരദ്വാജ് പറഞ്ഞു.
കൂടാതെ അഗത ക്രിസ്റ്റിയുടെ ചെറുമകൻ ജെയിംസ് പ്രിച്ചാർഡിന്‍റെ സഹകരണം എടുത്തു പറയേണ്ടതാണെന്നും അവിശ്വസനീയമായ ഈ ഒരു യാത്രിലുടനീളം അദ്ദേഹം ഒപ്പം നിന്നെന്നും വിശാൽ ഭരദ്വാജ് പറഞ്ഞു. നിഗൂഢമായ ഈ യാത്രയില്‍ സോണി എൽഐവിയും പ്രീതി ഷഹാനിയും തനിക്ക് മികച്ച പിന്തുണ നല്‍കിയെന്നും അദ്ദേഹം കൂട്ടിച്ചേർത്തു.
വാമിക ഗബ്ബി, പ്രിയാൻഷു പൈൻയുലി, നസീറുദ്ദീൻ ഷാ, നീന ഗുപ്‌ത, രത്‌ന പഥക് ഷാ, ഗുൽഷൻ ഗ്രോവർ, ലാറ ദത്ത, ചന്ദൻ റോയ് സന്യാൽ, പൗളി ഡാം എന്നിവരാണ് ഈ സീരീസില്‍ പ്രധാന കഥാപാത്രങ്ങളായി എത്തുന്നത്. ഒടിടി പ്ലാറ്റ്‌ഫോമായ സോണി ലിവിലൂടെ (Sony LIV) ആണ് 'ചാർളി ചോപ്ര' പ്രേക്ഷകർക്കരികില്‍ എത്തുക.
സോണി ലിവ് തന്നെയാണ് ഇൻസ്റ്റഗ്രാമിലൂടെ കഴിഞ്ഞ ദിവസം ചിത്രത്തിന്‍റെ മോഷൻ പോസ്റ്റർ പുറത്തുവിട്ടത്. 'ഞെട്ടിക്കുന്ന ഒരു നിഗൂഢതയുടെ ചുരുളഴിയുന്നതിന് സാക്ഷികളാകൂ' എന്ന് കുറിച്ച് കൊണ്ടാണ് സോണി ലിവ് മോഷൻ പോസ്റ്റർ പങ്കുവച്ചത്. ഡിറ്റക്‌ടറ്റീവ് ത്രില്ലറിലെ പൈലറ്റ് എപ്പിസോഡിന്‍റെ പ്രത്യേക പ്രിവ്യൂ സോണി എൽഐവിയിൽ സ്‌ട്രീമിങ് ആരംഭിച്ചെന്നും അണിയറക്കാർ അറിയിച്ചു. ശേഷിക്കുന്ന എപ്പിസോഡുകളുടെ ഔദ്യോഗിക റിലീസ് തിയതി നിർമാതാക്കൾ ഇനിയും പുറത്തുവിട്ടിട്ടില്ല. ടസ്‌ക് ടെയിൽ ഫിലിംസും അഗത ക്രിസ്റ്റി ലിമിറ്റഡും ചേർന്നാണ് ചിത്രം പ്രേക്ഷകർക്ക് മുന്നില്‍ അവതരിപ്പിക്കുന്നത്.
