ബോളിവുഡ് താരം ഷാഹിദ് കപൂര്‍ ഇപ്പോള്‍ ഒടിടിയിലും തിളങ്ങുകയാണ്. ഷാഹിദിന്‍റെ ആദ്യ ഒടിടി വെബ്‌ സീരീസ് റിലീസായിരുന്നു 'ഫര്‍സി'. ചിത്രത്തിലെ മികച്ച പ്രകടനത്തിലൂടെ പ്രേക്ഷകരെ ആകർഷിച്ച താരം ഇപ്പോള്‍ പുതിയ ഒടിടി റിലീസിനൊരുങ്ങുകയാണ്. താരത്തിന്‍റേതായി റിലീസിനൊരുങ്ങുന്ന ഏറ്റവും പുതിയ പ്രൊജക്‌ടാണ് 'ബ്ലഡി ഡാഡി'. അലി അബ്ബാസ് സഫറാണ് ചിത്രം സംവിധാനം ചെയ്‌തിരിക്കുന്നത്.
ഈ ചിത്രത്തിന് വേണ്ടി താരം തന്‍റെ പ്രതിഫലം വര്‍ധിപ്പിച്ചതായി റിപ്പോര്‍ട്ടുകളുണ്ടായിരുന്നു. 'ബ്ലഡി ഡാഡി'ക്ക് 40 കോടി രൂപ ഈടാക്കിയെന്നാണ് അഭ്യൂഹം പ്രചരിച്ചത്. കബീര്‍ സിങ്ങിന്‍റെ വൻ വിജയത്തിന് ശേഷം താരം തന്‍റെ പ്രതിഫലം വര്‍ധിപ്പിച്ചുവെന്നും റിപ്പോര്‍ട്ടുകളുണ്ടായിരുന്നു.
കഴിഞ്ഞ ദിവസം സിനിമയുടെ ട്രെയിലര്‍ ലോഞ്ചില്‍ 'ബ്ലഡി ഡാഡി'യുടെ പ്രതിഫലം സംബന്ധിച്ച ചോദ്യം ഷാഹിദിന് നേരിടേണ്ടിവന്നു. ചോദ്യം കേട്ട്ഞെട്ടിയ താരം, അത്രയും പണം തരൂ, താങ്കളുടെ സിനിമ ചെയ്യാമെന്ന് മാധ്യമപ്രവര്‍ത്തകനോട് തമാശ രൂപേണ പറഞ്ഞു. സംവിധായകൻ അലി അബ്ബാസ് സഫറും ഇക്കാര്യത്തില്‍ പ്രതികരിച്ചു. 'നിങ്ങൾ കുറച്ചാണ് പറഞ്ഞതെ'ന്നായിരുന്നു അദ്ദേഹത്തിന്‍റെ മറുപടി.
കഴിഞ്ഞ ദിവസം പുറത്തിറങ്ങിയ ട്രെയിലര്‍ ഷാഹിദ് കപൂറും തന്‍റെ ഇന്‍സ്റ്റഗ്രാം പേജില്‍ പങ്കുവച്ചിരുന്നു. 'വണ്‍ ഹെല്‍ ഓഫ്‌ എ ബ്ലഡി നൈറ്റ്.ട്രെയിലര്‍ പുറത്തിറങ്ങി! ബ്ലഡി ഡാഡി കാണുക, ബ്ലഡി ഡാഡി ജിയോ സിനിമയില്‍ ജൂണ്‍ ഒന്‍പതിന് സ്ട്രീമിങ് ചെയ്യും' - ഷാഹിദ് ഇന്‍സ്റ്റഗ്രാമില്‍ കുറിച്ചു.
സിനിമ നിർമാതാക്കൾക്ക് അവരുടെ ഒടിടി ഡീൽ മാത്രം ഉപയോഗിച്ച് ബജറ്റ് മറികടക്കാന്‍ കഴിയുമോ എന്ന ചോദ്യവും ഷാഹിദ് നേരിട്ടു. ഇതിന് താരം മറുപടിയായി പറഞ്ഞത് ഇല്ലെന്നായിരുന്നു. സ്ട്രീമിങ് പ്ലാറ്റ്‌ഫോം അത്യാവശ്യം പണം നല്‍കിയെന്നായിരുന്നു നിർമാതാക്കളുടെ മറുപടി. 'നോക്കൂ, ഇവിടെ ഇരിക്കുന്ന മൂന്നുപേരും ദുഃഖിതരാണോ?, ഞങ്ങൾ അസന്തുഷ്‌ടരാണോ, ദയവായി ഞങ്ങളോട് പറയൂ?' - ഷാഹിദ് തിരിച്ചുചോദിച്ചു. ഒടിടി പ്ലാറ്റ്‌ഫോമിൽ ബിഗ് സ്‌ക്രീൻ അനുഭവം നൽകുകയെന്ന ആശയത്തോടെയാണ് 'ബ്ലഡി ഡാഡി' ഒരുക്കിയതെന്നും നടന്‍ പറഞ്ഞു.
ട്രെയിലറിന് മുമ്പായി ഒരു പോസ്‌റ്ററും താരം സോഷ്യല്‍ മീഡിയയില്‍ പങ്കുവച്ചിരുന്നു. കയ്യില്‍ തോക്കുമായി കണ്ണുകളിലെ തീവ്രത പ്രകടമാക്കുന്ന പോസ്‌റ്ററാണ് പുറത്തിറങ്ങിയത്.
Also Read: പുതിയ ദൗത്യത്തില്‍ ഷാഹിദ് കപൂര്‍; ബ്ലഡി ഡാഡി പോസ്‌റ്ററില്‍ ഒളിപ്പിച്ച് ട്രെയിലര്‍
ഷാഹിദ് കപൂറിനെ കൂടാതെ സഞ്ജയ് കപൂർ, റോണിത് റോയ് എന്നിവരാണ് ചിത്രത്തില്‍ സുപ്രധാന കഥാപാത്രങ്ങളെ അവതരിപ്പിക്കുന്നത്. ഡയാന പെന്‍റി, രാജീവ് ഖണ്ഡേൽവാൾ എന്നിവരും പ്രധാന വേഷങ്ങളിലെത്തുന്നു.സംവിധായകന്‍ അലി അബ്ബാസ് സഫറിനൊപ്പം പ്രവർത്തിക്കാനായതിന്‍റെ ആവേശത്തിലാണ് ഷാഹിദ് കപൂര്‍.
'അത് വളരെ രസകരമായിരുന്നു. ഒരു ആക്ഷൻ സിനിമ ചെയ്യാൻ എനിക്ക് ഏറെ നല്ല സമയം ലഭിച്ചു. അലിയ്‌ക്കൊപ്പം പ്രവർത്തിക്കുന്നത് ഞാൻ ശരിക്കും ആസ്വദിച്ചു. ഈ ജോണര്‍ വളരെ നന്നായി' - ഷാഹിദ് കപൂര്‍ പറഞ്ഞു.
