എറണാകുളം: റോഷൻ മാത്യു, ഷൈൻ ടോം ചാക്കോ, ബാലു വർഗ്ഗീസ് എന്നിവരെ പ്രധാനകഥാപാത്രങ്ങളാക്കി ജി.മാർത്താണ്ടന്‍ സംവിധാനം ചെയ്യുന്ന "മഹാറാണി" എന്ന ചിത്രത്തിന്‍റെ പൂജയും സ്വിച്ചോൺ കർമവും കൊച്ചിയിൽ നടന്നു. എസ്.ബി ഫിലിംസിന്‍റെ ബാനറിൽ സുജിത് ബാലൻ നിർമിക്കുന്ന സിനിമയുടെ കഥ, തിരക്കഥ, സംഭാഷണം എന്നിവ ഒരുക്കുന്നത് ഇഷ്‌ക്‌ എന്ന ചിത്രത്തിന്‍റെ തിരക്കഥാകൃത്ത് രതീഷ് രവി ആണ്.
ബാദുഷ പ്രൊഡക്ഷൻസിന്‍റെ ബാനറിൽ എൻ.എം ബാദുഷ ആണ് സഹ നിർമ്മാതാവ്. സിൽക്കി സുജിത് ആണ് എക്‌സിക്യൂട്ടീവ് പ്രൊഡ്യൂസർ. "മഹാറാണി"യുടെ ചിത്രീകരണം ഒക്‌ടോബർ ഒന്നിന് ചേർത്തലയിൽ ആരംഭിക്കുമെന്ന് അണിയറ പ്രവർത്തകർ അറിയിച്ചു.
ഹരിശ്രീ അശോകൻ, ജോണി ആന്‍റണി, ജാഫർ ഇടുക്കി, സുജിത് ബാലൻ, കൈലാഷ്, ഗോകുലൻ, അശ്വത് ലാൽ എന്നിവരും ചിത്രത്തിൽ അണിനിരക്കുന്നു. മുരുകൻ കാട്ടാക്കടയുടെയും, അൻവർ അലിയുടെയും, രാജീവ്‌ ആലുങ്കലിന്‍റെയും വരികൾക്ക് സംഗീതമൊരുക്കുന്നത് ഗോവിന്ദ് വസന്തയാണ്. ലോകനാഥൻ ആണ് ക്യാമറ. പി ശിവ പ്രസാദാണ് പി.ആർ.ഒ.
