അല്‍ഫോണ്‍സ് പുത്രന്‍ - പൃഥ്വിരാജ് കൂട്ടുകെട്ടിലൊരുങ്ങിയ 'ഗോള്ഡ്' ചിത്രത്തിന് തിയേറ്ററുകളില്‍ സമ്മിശ്ര പ്രതികരണങ്ങളാണ് ലഭിച്ചത്. ഡിസംബര്‍ ഒന്നിന് റിലീസ് ചെയ്‌ത ചിത്രം ഇനി ഒടിടിയിലും സ്‌ട്രീമിങ്ങിനൊരുങ്ങുകയാണ്. 29ന് ആമസോണ്‍ പ്രൈമിലൂടെയാണ് 'ഗോള്‍ഡി'ന്‍റെ ഒടിടി റിലീസ്.
തെന്നിന്ത്യന്‍ ലേഡി സൂപ്പര്‍ സ്‌റ്റാര്‍ നയന്‍താരയാണ് ചിത്രത്തില്‍ പൃഥ്വിരാജിന്‍റെ നായികയായെത്തിയത്. വിനയ് ഫോര്‍ട്ട്, അജ്‌മല്‍ അമീര്‍, ലാലു അലക്‌സ്, ജഗദീഷ്, സൈജു കുറുപ്പ്, ദീപ്‌തി സതി, ഷമ്മി തിലകന്‍, ചെമ്പന്‍ വിനോദ്, ജാഫര്‍ ഇടുക്കി, മല്ലിക സുകുമാരന്‍, ശാന്തി കൃഷ്‌ണ, ബാബുരാജ് തുടങ്ങി നീണ്ട താരനിരയാണ് ചിത്രത്തില്‍ അണിനിരന്നത്.
'പ്രേമം' സിനിമയ്‌ക്ക് ശേഷം അല്‍ഫോണ്‍സ് പുത്രന്‍ സംവിധാനം ചെയ്‌ത ചിത്രം കൂടിയാണ് 'ഗോള്ഡ്'. സംവിധാനത്തിന് പുറമെ എഡിറ്റിങും വിഷ്വല്‍ ഇഫക്‌റ്റ്‌സും ആനിമേഷനും കളര്‍ ഗ്രേഡിങ്ങും, സ്‌റ്റണ്ടും ഒക്കെ നിര്‍വഹിച്ചത് അല്‍ഫോണ്‍സ് പുത്രന്‍ തന്നെയാണ്. പൃഥ്വിരാജ് പ്രൊഡക്ഷന്‍സ്‌, മാജിക് ഫ്രെയിംസ് എന്നിവര്‍ സംയുക്തമായാണ് 'ഗോള്‍ഡി'ന്‍റെ നിര്‍മാണം നിര്‍വഹിച്ചത്.
Also Read: 'ഒരു കലാരൂപത്തോടും ഇങ്ങനെ ചെയ്യരുത്'; പഠാന്‍ വിവാദത്തില്‍ പ്രതികരിച്ച് പൃഥ്വിരാജ്
