'വയസ്സെത്രയായി? മുപ്പത്തി...' വരുന്നു; നായകനായി അരങ്ങേറാൻ പ്രശാന്ത് മുരളി

vayasethrayayi muppathi coming soon : പപ്പൻ ടി നമ്പ്യാർ സംവിധാനം ചെയ്യുന്ന 'വയസ്സെത്രയായി? മുപ്പത്തി...'യിൽ മെറീന മൈക്കിളും പ്രധാന വേഷത്തിലുണ്ട്.

വിവാഹപ്രായം എത്തിയിട്ടും പല കാരണങ്ങളാൽ കല്യാണം കഴിക്കാനാകാതെ വിഷമിക്കുന്നവർക്കായി ഒരു പുതിയ സിനിമ എത്തുന്നു. പപ്പൻ ടി നമ്പ്യാർ സംവിധാനം ചെയ്യുന്ന 'വയസ്സെത്രയായി? മുപ്പത്തി...' എന്ന ചിത്രം ഉടൻ പ്രേക്ഷകരിലേക്ക്. സിനിമയുടെ ഒഫീഷ്യൽ ടൈറ്റിൽ പുറത്തുവന്നതോടെ ഏറെ ആവേശത്തിലാണ് സിനിമാസ്വാദകർ.

കൗതുകമുണർത്തുന്ന, വ്യത്യസ്‌തമായ ടൈറ്റിലുമായി എത്തുന്ന ഈ ചിത്രത്തിൽ പ്രശാന്ത് മുരളിയാണ് നായകനാകുന്നത്. 'കിംഗ് ഓഫ് കൊത്ത, ജാൻ എ മൻ, അജഗജാന്തരം, ജല്ലിക്കെട്ട്' തുടങ്ങിയ ചിത്രങ്ങളിലൂടെ പ്രേക്ഷകർക്ക് പരിചിതനായ പ്രശാന്ത് മുരളി നായകനാകുന്ന ആദ്യ ചിത്രം എന്ന പ്രത്യേകതയുമുണ്ട് 'വയസ്സെത്രയായി? മുപ്പത്തി...'ക്ക്. മുപ്പത്തിയേഴ് വയസായിട്ടും വിവാഹം നടക്കാത്ത ബ്രിഗേഷ് എന്ന ചെറുപ്പക്കാരന്‍റെ ജീവിതമാണ് ഈ ചിത്രം വരച്ചുകാട്ടുന്നത്.

മെറീന മൈക്കിളും പ്രധാന വേഷത്തിലുള്ള ഈ ചിത്രത്തിനായി തിരക്കഥ ഒരുക്കിയത് ഷിജു യു സി - ഫൈസൽ അബ്‌ദുള്ള എന്നിവർ ചേർന്നാണ്. ഉത്തര മലബാറിലെ ഗ്രാമീണാന്തരീക്ഷം പശ്ചാത്തലമാക്കിക്കൊണ്ട് നിർമിച്ചിരിക്കുന്ന 'വയസ്സെത്രയായി? മുപ്പത്തി...' ചിത്രം 'മെയ്‌ഡ് ഇൻ വടകര' എന്ന ടാഗ്‌ലൈനുമായാണ് എത്തുന്നത്. മഞ്ജു പത്രോസ്, ജയകുമാർ, സാവിത്രി ശ്രീധരൻ, അരിസ്റ്റോ സുരേഷ്, രമ്യ സുരേഷ്, ചിത്ര നായർ, ഉണ്ണിരാജ, പ്രദീപ്‌ ബാലൻ, നിർമൽ പാലാഴി, കുഞ്ഞിക്കണ്ണൻ ചെറുവത്തൂർ, മുഹമ്മദ്‌ എരവട്ടൂർ തുടങ്ങിയവരും ചിത്രത്തിൽ പ്രധാന വേഷങ്ങളിൽ എത്തുന്നു.

'വയസ്സെത്രയായി? മുപ്പത്തി... ഉടൻ തിയേറ്ററുകളിൽ റിലീസിനെത്തുമെന്നാണ് വിവരം. ഷമീർ ജിബ്രാനാണ് ഈ ചിത്രത്തിന്‍റെ ഛായാഗ്രാഹകൻ. 'പീസ്, അഭ്യൂഹം, പ്രൈസ് ഓഫ് പൊലീസ്' തുടങ്ങിയ ചിത്രങ്ങളിലൂടെ ശ്രദ്ധേയനായ കാമറാമാനാണ് ഷമീർ ജിബ്രാൻ. സിബു സുകുമാരൻ, സൻഫീർ എന്നിവർ ചേർന്നാണ് സിനിമയ്‌ക്ക് സംഗീതം പകരുന്നത്. ജനുവരി ഒന്നിന് ചിത്രത്തിലെ ഗാനങ്ങൾ പുറത്തിറങ്ങും.

അരുൺ വിജയ്‌യുടെ 'മിഷൻ ചാപ്റ്റർ- 1' തിയേറ്ററുകളിലേക്ക്: അരുൺ വിജയ് കേന്ദ്ര കഥാപാത്രത്തെ അവതരിപ്പിക്കുന്ന ചിത്രമാണ് 'മിഷൻ ചാപ്റ്റർ 1'. വിജയ് സംവിധാനം ചെയ്യുന്ന ഈ സിനിമ തിയേറ്ററുകളിലേക്ക് എത്തുകയാണ്. ജനുവരി 12ന് പൊങ്കൽ റിലീസായി 'മിഷൻ ചാപ്റ്റർ 1' തിയേറ്ററുകളിലെത്തും ('Mission Chapter 1' hits theaters on January 12 ).

ആരാധകർ ഏറെ ആവേശപൂർവം കാത്തിരിക്കുന്ന ചിത്രം ഒട്ടനവധി മികച്ച സിനിമകൾ പ്രേക്ഷകർക്ക് സമ്മാനിച്ച ലൈക്ക പ്രൊഡക്ഷൻസാണ് നിർമിക്കുന്നത്. എമി ജാക്‌സണും നിമിഷ സജയനുമാണ് ഈ ചിത്രത്തിൽ മറ്റ് സുപ്രധാന വേഷങ്ങളിൽ എത്തുന്നത്. തമിഴിന് പുറമെ തെലുഗു, കന്നഡ, മലയാളം എന്നീ ഭാഷകളിലും 'മിഷൻ ചാപ്റ്റർ 1' പ്രദർശനത്തിനെത്തും.