സിനിമകളേക്കാള്‍ യാത്രകളോടും സാഹസികതയോടും വലിയ താല്‍പര്യമുളള നടനാണ് പ്രണവ് മോഹന്‍ലാല്‍. താരപുത്രന്‍ എന്ന ജാഡകളില്ലാതെ സാധാരണ ജീവിതം നയിക്കാനാണ് പ്രണവിന് താല്‍പര്യം. സിനിമയില്‍ സജീവമാകും മുന്‍പ് ഇന്ത്യയ്ക്കുളളിലും മറ്റ് വിദേശ രാജ്യങ്ങളിലുമായി നിരവധി യാത്രകള്‍ നടത്തിയിട്ടുണ്ട് നടന്.
ഹിമാലയത്തില്‍ നിന്നുളള പ്രണവിന്‍റെ ചിത്രങ്ങളെല്ലാം അടുത്തിടെ സോഷ്യല്‍ മീഡിയയില്‍ വൈറലായിരുന്നു. കുറച്ചുനാള്‍ മുന്‍പാണ് സമൂഹ മാധ്യമങ്ങളിലും പ്രണവ് ആക്‌ടീവാകാന്‍ തുടങ്ങിയത്. ഹൃദയം സിനിമയുടെ വന്‍ വിജയത്തിലൂടെ നടന് വീണ്ടും ആരാധകര്‍ കൂടിയിരിക്കുകയാണ്.
- " class="align-text-top noRightClick twitterSection" data="
">
പ്രണവിന് പുറമെ അപ്പു എന്ന ഓമനപ്പേരിലും താരപുത്രനെ ആരാധകരും സഹതാരങ്ങളും വിളിക്കാറുണ്ട്. പ്രണവ് മോഹന്‍ലാല്‍ ഇന്‍സ്റ്റഗ്രാമില്‍ പങ്കുവച്ച പുതിയൊരു വീഡിയോ ആരാധകര്‍ ഏറ്റെടുത്തിരിക്കുകയാണ്. സ്ലാക്ക് ലൈന്‍ വോക്ക് നടത്തുന്ന നടനെയാണ് വീഡിയോയില്‍ കാണിക്കുന്നത്.
കയറിലൂടെയോ കമ്പിയിലൂടെയോ ശരീരം കൃത്യമായി ബാലന്‍സ് ചെയ്‌ത് നടക്കുന്നതിനെയാണ് സ്ലാക്ക് ലൈന്‍ വോക്ക് എന്ന് പറയുന്നത്. വീഡിയോയില്‍ വളരെ കൃത്യതയോടെ ബാലന്‍സ് ചെയ്‌ത് നടന്നുനീങ്ങുകയാണ് പ്രണവ്. നിരവധി കമന്‍റുകളാണ് താരപുത്രന്‍റെ പുതിയ വീഡിയോയ്ക്ക് ലഭിക്കുന്നത്.
കൂട്ടത്തില്‍ രസകരമായ കമന്‍റുകളുമായും പ്രണവിന്‍റെ പോസ്റ്റിന് താഴെ ചിലര്‍ എത്തിയിരിക്കുന്നു. "ബാക്കി ഉള്ളവന്മാർ എങ്ങനെ പാൻ ഇന്ത്യ സ്റ്റാർ ആവാം, എങ്ങനെ 50 കോടി അടിക്കാം എന്നൊക്കെ ആലോചിക്കുമ്പോ, ഇവിടെ ഒരാൾ ഏത് മല കയറണം, പുതിയ സാഹസങ്ങൾ ഏതൊക്കെ നോക്കണം എന്നൊക്കെ ആലോചിക്കുന്നു, പ്രണവിന്‍റെ വീഡിയോയ്ക്ക് താഴെ ഒരാള്‍ കുറിച്ചു.
ആരാധകര്‍ക്ക് പുറമെ മലയാളത്തിലെ ചില താരങ്ങളും പ്രണവിന്‍റെ പോസ്റ്റിന് താഴെ കമന്‍റുമായി എത്തി. നായകനടനായി മൂന്ന് സിനിമകളാണ് പ്രണവ് മോഹന്‍ലാലിന്‍റേതായി പുറത്തിറങ്ങിയത്. ഇതില്‍ അരങ്ങേറ്റ ചിത്രമായ ആദി അമ്പത് കോടി ക്ലബ്ബില്‍ ഇടംപിടിച്ചിരുന്നു.
രണ്ടാം ചിത്രമായ ഇരുപത്തിയൊന്നാം നൂറ്റാണ്ട് തിയേറ്ററുകളില്‍ പരാജയപ്പെട്ടു. ഈ സിനിമയിലെ മോശം പ്രകടനത്തിന് മിക്കവരും എഴുതി തളളിയ താരപുത്രന്‍ ഹൃദയത്തിലൂടെ ശക്തമായ തിരിച്ചുവരവാണ് നടത്തിയത്. അഭിനയിക്കാന്‍ അറിയില്ലെന്ന് പറഞ്ഞവര്‍ക്കെല്ലാം തന്‍റെ കിടിലന്‍ പ്രകടനത്തിലൂടെ പ്രണവ് മറുപടി നല്‍കി.
ആദിക്ക് പിന്നാലെ ഹൃദയവും പ്രണവിന്‍റേതായി അമ്പത് കോടി ക്ലബ്ബില്‍ എത്തിയ ചിത്രമാണ്. ഹൃദയത്തിന് ശേഷമുളള പ്രണവ് മോഹന്‍ലാലിന്‍റെ എറ്റവും പുതിയ ചിത്രങ്ങള്‍ക്കായി കാത്തിരിക്കുകയാണ് ആരാധകര്‍.
