തെലുഗു സൂപ്പർതാരം പ്രഭാസ് നായകനായെത്തുന്ന പുതിയ ചിത്രം 'കൽക്കി 2898 എഡി'യുടെ റിലീസ് തീയതി പ്രഖ്യാപിച്ചു. മെയ് 9 മുതല്‍ ചിത്രം തിയേറ്ററുകളിലെത്തും. വാരാണസി, മുംബൈ, ഡൽഹി, ചണ്ഡിഗഡ്, ചെന്നൈ, മധുരൈ, ഹൈദരാബാദ്, വിശാഖപട്ടണം, ഗുണ്ടൂർ, ഭീമാവരം, കശ്‌മീർ, വിജയവാഡ എന്നിവ ഉൾപ്പടെ പാൻ ഇന്ത്യയിലെ വിവിധ നഗരങ്ങളിലൂടെ നടത്തിയ റൈഡ് വഴിയാണ് അണിയറ പ്രവര്‍ത്തകര്‍ ചിത്രത്തിന്‍റെ റിലീസ് തീയതി പ്രഖ്യാപിച്ചത് (Kalki 2898 AD).
നാഗ്‌ അശ്വിന്‍റെ സംവിധാനത്തില്‍ ഒരുങ്ങിയ ചിത്രം വൈജയന്തി മുവീസിന്‍റെ ബാനറിൽ സി അശ്വിനി ദത്താണ് നിര്‍മിക്കുന്നത്. ചിത്രത്തില്‍ പ്രഭാസിനോടൊപ്പം അമിതാഭ് ബച്ചൻ, കമൽഹാസൻ, പ്രഭാസ്, ദീപിക പദുകോൺ, ദിഷ പഠാനി തുടങ്ങിയവരും സുപ്രധാന വേഷങ്ങളിലെത്തുന്നുണ്ട് (Prabhas New Movie).
"വൈജയന്തി മുവീസിന്‍റെ 50 വർഷം പിന്നിടുമ്പോൾ ഞങ്ങളുടെ ഈ സിനിമായാത്രയിൽ മെയ് 9ന്‍റെ പ്രാധാന്യം വ്യക്തമാക്കുന്നു. 'ജഗദേക വീരുഡു അതിലോക സുന്ദരി' മുതൽ പുരസ്‌കാരങ്ങൾ നേടിയ 'മഹാനടി', 'മഹർഷി' എന്നീ ചിത്രങ്ങളിലൂടെ ഈ തീയതി ഞങ്ങളുടെ ചരിത്രത്തിൽ സ്ഥാനം പിടിച്ചിരിക്കുന്നു. ഇപ്പോൾ അമിതാഭ് ബച്ചൻ, പ്രഭാസ്, കമൽഹാസൻ, ദീപിക പദുകോൺ തുടങ്ങിയ പ്രതിഭാധനരായ കലാകാരന്മാർ അഭിനയിക്കുന്ന 'കൽക്കി 2898 എഡി' റിലീസ് ചെയ്യുന്നതും ഇതേ തീയതിയിലാണ്. ഈ നിമിഷത്തിൽ വൈജയന്തി മുവീസിന്‍റെ നാഴികക്കല്ലായ 50-ാം വർഷവുമായി ഒത്തുചേർന്ന് ഞങ്ങളുടെ യാത്ര തുടരുമ്പോൾ അത് കൂടുതൽ അർഥവത്താകുന്നു"വെന്ന് റിലീസ് തിയതി പ്രഖ്യാപനത്തിനിടെ വൈജയന്തി മുവീസ് സ്ഥാപകയും നിർമാതാവുമായ അശ്വിനി ദത്ത് പറഞ്ഞു.
പുരാണങ്ങളിൽ നിന്ന് പ്രചോദനം ഉൾക്കൊണ്ട് ഭാവിയെ തുറന്ന് കാണിക്കുന്ന ഒരു സയൻസ് ഫിക്ഷനാണ് 'കൽക്കി 2898 എഡി'. 2898ല്‍ ഭൂമിയില്‍ നടക്കാന്‍ സാധ്യതയുള്ള സംഭവങ്ങളെ ആസ്‌പദമാക്കിയാണ് ചിത്രം നിര്‍മിച്ചിരിക്കുന്നത്. കഴിഞ്ഞ ജൂലൈയിലാണ് ചിത്രത്തിന്‍റെ ടീസര്‍ പുറത്തിറങ്ങിയത്. ഹോളിവുഡ് ചിത്രങ്ങളോട് കിടപിടിക്കുന്ന ദൃശ്യ മികവോടെ പ്രേക്ഷകരിലെത്തിയ ടീസറില്‍ ആരാധകര്‍ ആവേശത്തിലായിരിക്കെയാണ് റിലീസ് തീയതി പ്രഖ്യാപിച്ചത് (Kalki 2898 AD Gets Release Date Out).
Also Read: 'തകർപ്പൻ ലുക്ക്'; 'കൽക്കി 2898 എഡി' ടീസറിന് കയ്യടിച്ച് എസ്എസ് രാജമൗലി
സാൻ ഡീഗോ കോമിക്-കോണിൽ കഴിഞ്ഞ വർഷം നടന്ന തകർപ്പൻ അരങ്ങേറ്റത്തിന് ശേഷം ആഗോളതലത്തിൽ ശ്രദ്ധയാകർഷിച്ച ഈ ചിത്രം വൻ പ്രതീക്ഷയോടെയാണ് പ്രേക്ഷകർ നോക്കി കാണുന്നത്. പിആർഒ: ശബരി, ആതിര ദിൽജിത്ത്.
