ഭുവനേശ്വർ : ഓളിവുഡ് (ഒഡിഷ) നടി മൗസുമി നായകിനെ അറസ്റ്റ് ചെയ്‌ത് പൊലീസ്. എഴുത്തുകാരി ബനസ്‌മിത പതിയുടെ പരാതിയെ തുടർന്നാണ് നടപടി. മൗസുമി നായക് തന്‍റെ പ്രതിച്ഛായയും പ്രശസ്‌തിയും അപകീർത്തിപ്പെടുത്താൻ ശ്രമിച്ചെന്നും ഭീഷണിപ്പെടുത്തിയെന്നുമാണ് ബനസ്‌മിത പതിയുടെ പരാതി (Ollywood actress Mousumi Nayak arrested).
ഐപിസി 385, 294, 506, 507 എന്നീ വകുപ്പുകൾ പ്രകാരമാണ് നടിക്കെതിരെ ഇൻഫോസിറ്റി പൊലീസ് കേസെടുത്തിരിക്കുന്നത്. 5.80 ലക്ഷം രൂപയുടെ സാമ്പത്തിക ഇടപാടുമായി ബന്ധപ്പെട്ട് ഏതാനും ആഴ്‌ചകൾക്ക് മുമ്പ് മൗസുമിയും ബനസ്‌മിതയും തമ്മിൽ തർക്കം നടന്നിരുന്നു. റിപ്പോർട്ടുകൾ പ്രകാരം, എഴുത്തുകാരി ബനസ്‌മിത പതിക്ക് 5.8 ലക്ഷം രൂപ നൽകിയെന്നും അത് തിരികെ ലഭിച്ചില്ലെന്നും നടി മൗസുമി നായക് നേരത്തെ ആരോപിച്ചിരുന്നു. ബനസ്‌മിത ഈ പണം സ്റ്റോക്ക് മാർക്കറ്റിൽ നിക്ഷേപിക്കുകയായിരുന്നു എന്നാണ് വിവരം.
തുടർന്ന് ഇരുവരും ഇൻഫോസിറ്റി പൊലീസ് സ്റ്റേഷനിൽ ഒരു ഒത്തുതീർപ്പ് ഹർജിയും സമർപ്പിച്ചു. ഉടമ്പടി പ്രകാരം, പണം തിരികെ നൽകാമെന്ന് ബനസ്‌മിത തീരുമാനിച്ചു. എന്നാൽ പണം നൽകിയിട്ടും മൗസുമി നിബന്ധനകൾ ലംഘിച്ച് തന്നെ ശല്യം ചെയ്യുന്നത് തുടരുകയാണ് എന്നാണ് ബനസ്‌മിതയുടെ പരാതി. ഇതിന് പുറമെ സോഷ്യൽ മീഡിയയിൽ ബനസ്‌മിതക്കെതിരെ ആക്ഷേപകരമായ പോസ്റ്റുകൾ ഇട്ടതായും മൗസുമിക്കെതിരെ ആരോപണമുണ്ട്.
പൊലീസ് ഇടപെട്ട് ഒത്തുതീർപ്പുണ്ടാക്കിയതിന് ശേഷവും തന്നെ തട്ടിക്കൊണ്ടുപോകാനും ഉപദ്രവിക്കാനും പ്രതിച്ഛായയും പ്രശസ്‌തിയും നശിപ്പിക്കാനും നടി ശ്രമിച്ചതായും എഴുത്തുകാരി ബനസ്‌മിത പതി ആരോപിച്ചിരുന്നു. പണം തിരികെ നൽകിയതിന് ശേഷവും മൗസുമി തന്‍റെ കുടുംബത്തെ പരസ്യമായി അപമാനിക്കുകയും ഭീഷണിപ്പെടുത്തുകയും ചന്ദക പൊലീസിൽ തനിക്കെതിരെ തെറ്റായ പരാതി നൽകുകയും ചെയ്‌തെന്നും ഇൻഫോസിറ്റി പൊലീസ് സ്റ്റേഷനിൽ നൽകിയ പരാതിയിൽ ബനസ്‌മിത പതി അറിയിച്ചു.
കുറച്ച് ദിവസങ്ങൾക്ക് മുമ്പ് മൗസുമി മാധ്യമങ്ങൾക്ക് മുന്നിൽ ബാനസ്‌മിതക്കെതിരെ ആരോപണങ്ങൾ ഉന്നയിച്ചത് വാർത്തയായിരുന്നു. ഇതിന് പിന്നാലെയാണ് നടിക്കെതിരെ എഴുത്തുകാരി ഇൻഫോസിറ്റി പൊലീസ് സ്റ്റേഷനിൽ എത്തി രേഖാമൂലം പരാതി നൽകിയതും ഇപ്പോൾ അറസ്റ്റിലേക്ക് എത്തിയതും. കേസിൽ അന്വേഷണം പ്രാഥമിക ഘട്ടത്തിലാണെന്ന് പൊലീസ് പറയുന്നു.
READ ALSO: വ്യാജ അറസ്റ്റ് വീഡിയോയിലൂടെ മുംബൈ പൊലീസിനെ അപകീർത്തിപ്പെടുത്തി; ഉർഫി ജാവേദിനെതിരെ കേസെടുത്തു
ഇരുവരും പരസ്‌പരം സമാനമായ ആരോപണങ്ങൾ ഉന്നയിക്കുന്ന സാഹചര്യത്തിൽ പൊലീസ് അന്വേഷണം പൂർത്തിയായതിന് ശേഷമേ മുഴുവൻ സംഭവങ്ങളും പുറത്തുവരൂ. അതേസമയം അറസ്റ്റിലായ നടിയെ പൊലീസ് വിശദമായി ചോദ്യം ചെയ്യുകയാണ്.
