നിഗൂഢതകൾ നിറച്ച്, കാണികളില്‍ ആകാംക്ഷ ഉണർത്തി 'ഒ. ബേബി' ട്രെയിലർ. പ്രശസ്‌ത തിരക്കഥാകൃത്ത് കൂടിയായ രഞ്ജന്‍ പ്രമോദിൻ്റെ ഏറ്റവും പുതിയ ചിത്രമായ ‘ഒ. ബേബി’ ഈ വെള്ളിയാഴ്‌ചയാണ് (ജൂൺ ഒന്‍പതിന്) പ്രദർശനത്തിനെത്തുക. കാണികളെ തിയേറ്ററുകളിലേക്ക് ആകർഷിക്കാന്‍ കെല്‍പ്പുള്ള ട്രെയിലർ ആസ്വാദകരില്‍ ഏറെ ചോദ്യങ്ങൾ ബാക്കിയാക്കിയാണ് അവസാനിക്കുന്നത്.
- " class="align-text-top noRightClick twitterSection" data="">
നിർമാതാക്കൾ കഴിഞ്ഞ ദിവസം പുറത്തുവിട്ട ട്രെയിലർ ഒരു ലക്ഷത്തിലേറെ ആളുകൾ യൂട്യൂബില്‍ ഇതിനോടകം കണ്ടുകഴിഞ്ഞു. ദിലീഷ് പോത്തനാണ് ചിത്രത്തില്‍ കേന്ദ്ര കഥാപാത്രത്തെ അവതരിപ്പിക്കുന്നത്. കൂടാതെ ഒരു കൂട്ടം പുതുമുഖ അഭിനേതാക്കളും ദിലീഷിനൊപ്പം ചിത്രത്തിൽ മാറ്റുരക്കുന്നു.
കാണികൾക്ക് മികച്ച ഒരു ത്രില്ലർ അനുഭവമാകും 'ഒ.ബേബി' സമ്മാനിക്കുക എന്നുറപ്പു തരുന്നതാണ് ചിത്രത്തിന്‍റെതായി പുറത്തുവന്ന ടീസറും ട്രെയിലറും. ടീസർ പോലെ 'ഒ.ബേബി' ത്രില്ലർ സ്വഭാവത്തില്‍ ഉള്ളതാണെന്നാണ് ട്രെയിലറും നൽകുന്ന സൂചന. ഹാനിയ നസീഫ, രഘുനാഥ്‌ പലേരി, സജി സോമൻ, ഷിനു ശ്യാമളൻ, അതുല്യ ഗോപാലകൃഷ്‍ണൻ, വിഷ്‍ണു അഗസ്‌ത്യ എന്നിവരാണ് ചിത്രത്തില്‍ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
അഭിനയത്തിന് പുറമെ 'ഒ ബേബി'യില്‍ നിർമ്മാതാവിന്‍റെ 'റോൾ' കൂടിയുണ്ട് ദിലീഷ് പോത്തന്. അഭിഷേക് ശശിധരൻ, പ്രമോദ് തേർവാർപ്പള്ളി എന്നിവർക്കൊപ്പം ദിലീഷ് പോത്തനും ചേർന്നാണ് ടർടിൽ വൈൻ പ്രൊഡക്ഷൻസ്, കളർ പെൻസിൽ ഫിലിംസ്, പകൽ ഫിലിംസ് എന്നീ ബാനറുകളില്‍ ചിത്രം നിർമിച്ചിരിക്കുന്നത്. രാഹുൽ മേനോൻ ആണ് എക്‌സിക്യുട്ടിവ് പ്രൊഡ്യൂസർ.
വരുൺ കൃഷ്‍ണയും പ്രണവ് ദാസും ചേർന്നാണ് 'ഒ ബേബിക്കായി' സംഗീതം ഒരുക്കിയിരിക്കുന്നത്. ചിത്രത്തിലെ പ്രാർഥന ഇന്ദ്രജിത്ത് ആലപിച്ച ഗാനം അടുത്തിടെ പുറത്തിറങ്ങിയിരുന്നു. മികച്ച പ്രതികരണം നേടി ഗാനമിപ്പോൾ പ്രേക്ഷകരുടെ ഹിറ്റ് ചാർട്ടില്‍ ഇടംപിടിച്ച് കഴിഞ്ഞിരിക്കുകയാണ്.
അതേസമയം ചിത്രത്തിനായി പശ്ചാത്തല സംഗീതം ഒരുക്കിയിരിക്കുന്നത് ലിജിൻ ബാംബിനോയാണ്. അരുൺ ചാല്‍ ഛായാഗ്രഹണം നിർവഹിക്കുന്ന ചിത്രത്തിന്‍റെ എഡിറ്റർ സംജിത്ത് മുഹമ്മദ് ആണ്. സൗണ്ട് ഡിസൈൻ- ഷമീർ അഹമ്മദ്, കലാസംവിധാനം- ലിജിനേഷ്, മേക്കപ്പ്- നരസിംഹ സ്വാമി, വസ്‌ത്രാലങ്കാരം- ഫെമിന ജബ്ബാർ, ഫസ്റ്റ് അസിസ്റ്റന്റ് ഡയറക്‌ടർ- സിദ്ധിക്ക് ഹൈദർ, അഡിഷണൽ കാമറ- എ കെ മനോജ്‌, സംഘട്ടനം- ഉണ്ണി പെരുമാൾ, പോസ്റ്റർ ഡിസൈൻ- ഓൾഡ് മോങ്ക്, ഡിജിറ്റൽ മാർക്കറ്റിംഗ്- റോജിൻ കെ റോയ് എന്നിവരാണ് ചിത്രത്തിലെ മറ്റ് അണിയറ പ്രവർത്തകർ.
'മീശമാധവൻ, മനസിനക്കരെ, നരൻ' തുടങ്ങി മലയാളികൾ എക്കാലവും ഓർത്തിരിക്കുന്ന ഹിറ്റ് ചിത്രങ്ങൾക്കായി തൂലിക ചലിപ്പിച്ച രഞ്ജൻ പ്രമോദ് 'രക്ഷാധികാരി ബൈജു'വിന് ശേഷം സംവിധാനം ചെയ്യുന്ന ചിത്രമാണ് 'ഒ. ബേബി'. രഞ്ജൻ പ്രമോദിന്‍റെ സംവിധാനത്തിലുള്ള ചിത്രത്തില്‍ ദിലീഷ് പോത്തൻ നായകനാകുന്നു എന്ന നിലയിൽ പ്രഖ്യാപനം മുതൽ തന്നെ ഏറെ ചർച്ചയായ ചിത്രം കൂടിയാണ് 'ഒ ബേബി'.
തൻ്റെ പതിവ് രീതികളില്‍ നിന്നും വിഭിന്നമായി ഇത്തവണ ത്രില്ലറുമായാണ് രഞ്ജൻ പ്രമോദ് എത്തുന്നത് എന്നതും ശ്രദ്ധേയമാണ്. രഞ്ജന്‍ പ്രമോദ്- ദിലീഷ് പോത്തൻ കോംബോയും ചിത്രത്തിന്‍റെ ഹൈലൈറ്റുകളില്‍ ഒന്നാണ്.
