പ്രേക്ഷകർ നെഞ്ചോട് ചേർത്ത, ജനപ്രിയ ചിത്രം 'തിങ്കളാഴ്‌ച നിശ്ചയ'ത്തിന് ശേഷം സുനിൽ സൂര്യ പ്രധാന കഥാപാത്രത്തെ അവതരിപ്പിക്കുന്ന സിനിമയാണ് 'മുകൾപ്പരപ്പ്'. സിബി പടിയറ രചനയും സംവിധാനവും നിർവഹിക്കുന്ന ചിത്രത്തിന്‍റെ ഫസ്റ്റ് ലുക്ക് പോസ്റ്റർ പുറത്തുവന്നു. ലാൽ ജോസ്, വിനീത് ശ്രീനിവാസൻ തുടങ്ങി ചലച്ചിത്ര രംഗത്തെ അമ്പതോളം പ്രമുഖർ ചേർന്നാണ് തങ്ങളുടെ ഫേസ്ബുക്ക് പേജിലൂടെ പോസ്റ്റർ റിലീസ് ചെയ്‌തത്.
മലബാറിന്‍റെയും അവിടുത്തെ തെയ്യങ്ങളുടെയും പശ്ചാത്തലത്തിലാണ് 'മുകൾപ്പരപ്പ്' അണിയിച്ചൊരുക്കുന്നത്. പ്രണയത്തിനും നർമ്മത്തിനും ഒപ്പം സംഗീതത്തിനും പ്രാധാന്യം നൽകുന്ന ഈ ചിത്രത്തിൽ അപർണ ജനാർദ്ദനനാണ് നായികയായി എത്തുന്നത്. അന്തരിച്ച പ്രശസ്‌ത നടൻ മാമുക്കോയയും ചിത്രത്തില്‍ പ്രധാന വേഷത്തിലുണ്ട്. മലയാളത്തിന്‍റെ അതുല്യ നടന്‍ മാമുക്കോയ അവസാനമായി അഭിനയിച്ച ചിത്രം കൂടിയാണ് 'മുകൾപ്പരപ്പ്'.
കൂടാതെ ശിവദാസ് മട്ടന്നൂർ, ഉണ്ണിരാജ് ചെറുവത്തൂർ, ഊർമിള ഉണ്ണി, ചന്ദ്രദാസൻ ലോകധർമ്മി, മജീദ്, ബിന്ദു കൃഷ്‌ണ, രജിത മധു എന്നിവരും ചിത്രത്തില്‍ പ്രധാന വേഷത്തിലുണ്ട്. ഇവർക്ക് പുറമെ ഒട്ടേറെ തെയ്യം കലാകാരൻമാരും പുതുമുഖങ്ങളും ചിത്രത്തില്‍ അഭിനയിക്കുന്നു.
പാറ ഖനനത്തിന്‍റെ പ്രകമ്പനങ്ങൾ നിരന്തരം മുഴങ്ങുന്ന ഒരു ഗ്രാമത്തിലെ പേരെടുത്ത തെയ്യം കലാകാരനായ 'ചാത്തുട്ടിപ്പെരുവണ്ണാന്‍റെ' അന്ത:സംഘർഷങ്ങളിലൂടെയാണ് ചിത്രം കടന്നു പോകുന്നത്. കണ്ണൂരിന്‍റെ പശ്ചാത്തലത്തിൽ ഒരുങ്ങുന്ന ഈ ചിത്രം ചില പാരിസ്ഥിതിക വിഷയങ്ങളിലേക്കും വെളിച്ചം വീശുന്നു.
ജ്യോതിസ് വിഷന്‍റെ ബാനറിൽ ജയപ്രകാശൻ തവറൂല്‍ (ജെപി തവറൂല്‍) ആണ് ചിത്രം നിർമിക്കുന്നത്. നിർമതാവിന് പുറമെ ചിത്രത്തിന്‍റെ സഹ രചയിതാവും ഗാനരചയിതാവും കൂടിയാണ് അദ്ദേഹം. ജോൺസ് പനയ്‌ക്കൽ, സിനു സീതത്തോട്, ഷമൽ സ്വാമിദാസ്, ബിജോ മോഡിയിൽ കുമ്പളാംപൊയ്‌ക, ഹരിദാസ് പാച്ചേനി, മനോജ് സി.പി, ആദിത്യ പി.ഒ, അദ്വൈത് പി.ഒ, ലെജു നായർ നരിയാപുരം എന്നിവരാണ് 'മുകൾപ്പരപ്പി'ന്‍റെ സഹ നിർമ്മാതാക്കൾ. ഓഗസ്റ്റ് നാലിന് 'മുകൾപ്പരപ്പ്' തിയേറ്ററുകളിലെത്തും.
ഷിജി ജയദേവൻ, നിതിൻ കെ രാജ് എന്നിവർ ചേർന്ന് ഛായാഗ്രഹണം നിർവഹിക്കുന്ന ചിത്രത്തിന്‍റെ എഡിറ്റിങ് കൈകാര്യം ചെയ്യുന്നത് ലിൻസൺ റാഫേൽ ആണ്. ജെ പി തവറൂൽ, സിബി പടിയറ എന്നിവരുടെ വരികൾക്ക് പ്രമോദ് സാരംഗും ജോജി തോമസുമാണ് ഈണം പകരുന്നത്. അലൻ വർഗീസ് പശ്ചാത്തല സംഗീതവും ഒരുക്കുന്നു.
ചീഫ് അസോസിയേറ്റ് ഡയറക്‌ടർ - ശ്രീകുമാർ വള്ളംകുളം, ഫിനാൻസ് കൺട്രോളർ - ടി പി ഗംഗാധരൻ, പ്രൊജക്റ്റ് മാനേജർ - ബെന്നി നെല്ലുവേലി, പ്രൊഡക്ഷൻ എക്‌സിക്യൂട്ടിവ്- പ്രവീൺ ശ്രീകണ്‌ഠപുരം, ഡിടിഎസ് മിക്‌സിങ് - ജുബിൻ രാജ്, സ്റ്റുഡിയോ - മീഡിയ പ്ളസ് കൊച്ചി, വിസ്‌മയാസ് മാക്‌സ് തിരുവനന്തപുരം, പി ആർ ഒ - എ എസ് ദിനേശ് എന്നിവരാണ് ചിത്രത്തിലെ മറ്റ് അണിയറ പ്രവർത്തകർ.
