കാത്തിരിപ്പിനൊടുവില്‍ കണ്ണൂര്‍ സ്ക്വാഡ് എത്തി! പ്രേക്ഷകര്‍ കാത്തിരുന്ന മമ്മൂട്ടിയുടെ ഏറ്റവും പുതിയ ചിത്രം 'കണ്ണൂര്‍ സ്‌ക്വാഡിന്‍റെ' സെക്കന്ഡ് ലുക്ക് പോസ്‌റ്റര്‍ പുറത്തിറങ്ങി. മമ്മൂട്ടിയാണ് തന്‍റെ ഫേസ്‌ബുക്ക് പേജിലൂടെ സെക്കന്ഡ് ലുക്ക് പങ്കുവച്ചിരിക്കുന്നത്.
'കണ്ണൂര്‍ സ്‌ക്വാഡി'ലെ നാലംഗ സംഘത്തിന്‍റെ ലുക്കാണ് വെളിപ്പെടുത്തിയിരിക്കുന്നത്. മമ്മൂട്ടി, അസീസ് നെടുമങ്ങാട്, റോണി ഡേവിഡ്, ശബരീഷ് വര്‍മ എന്നിവരാണ് ഫസ്‌റ്റ് ലുക്ക് പോസ്റ്ററില്. പോസ്റ്ററില് ഇവര്‍ നാലു പേരും അല്‍പം ഗൗരവത്തിലാണ് കാണപ്പെടുന്നത്.
- " class="align-text-top noRightClick twitterSection" data="">
നേരത്തെ പുറത്തിറങ്ങിയ സിനിമയുടെ ഫസ്‌റ്റ് ലുക്ക് പോസ്‌റ്ററും സോഷ്യല്‍ മീഡിയയില്‍ ശ്രദ്ധ നേടിയിരുന്നു. ക്ലോസപ്പിലുള്ള മമ്മൂട്ടിയുടെ മുഖവും ജീപ്പ് ലൈറ്റിന്‍റെ ബാക്ക്ഗ്രൗണ്ടില്‍ നാല് പേര്‍ നടക്കുന്നതുമായിരുന്നു പോസ്റ്ററില്.
അടുത്തിടെയാണ് സിനിമയുടെ ചിത്രീകരണം പൂര്‍ത്തിയായത്. വയനാട്ടിലായിരുന്നു അവസാന ഷെഡ്യൂളിന്‍റെ ചിത്രീകരണം. പത്ത് ദിവസത്തെ ഷെഡ്യൂളായിരുന്നു വയനാട്ടില്‍. പൂനെയിലെ ഷെഡ്യൂള്‍ പൂര്‍ത്തിയാക്കിയ ശേഷമായിരുന്നു വയനാട്ടിലെ ചിത്രീകരണം. സിനിമയിലെ ഏതാനും ചില രംഗങ്ങള്‍ എറണാകുളത്തും ചിത്രീകരിച്ചിരുന്നു. മുംബൈ, പൂനെ, അതിരപ്പിള്ളി, പാലാ, കണ്ണൂര്‍, കൊച്ചി, വയനാട് എന്നിവിടങ്ങളിലായിരുന്നു കണ്ണൂര്‍ സ്‌ക്വാഡിന്‍റെ ചിത്രീകരണം.
റോബി വര്‍ഗീസ് ആണ് 'കണ്ണൂര്‍ സ്‌ക്വാഡിന്‍റെ' സംവിധാനം. റോബി വര്‍ഗീസിന്‍റെ ആദ്യ സംവിധാന സംരംഭം കൂടിയാണ് 'കണ്ണൂര്‍ സ്ക്വാഡ്'. 'ദി ഗ്രേറ്റ് ഫാദര്‍', 'പുതിയ നിയമം' എന്നീ ചിത്രങ്ങളുടെ ഛാഗ്രാഹകനാണ് റോബി വര്‍ഗീസ്.
മുഹമ്മദ് ഷാഫിയുടെതാണ് കഥ. നടന്‍ റോണി ഡേവിഡ് രാജും മുഹമ്മദ് ഷാഫിയും ചേര്‍ന്നാണ് സിനിമയുടെ തിരക്കഥ രചിച്ചിരിക്കുന്നത്. മുഹമ്മദ് റാഹില്‍ ഛായാഗ്രഹണവും പ്രവീണ്‍ പ്രഭാകര്‍ എഡിറ്റിങ്ങും സുഷിന്‍ ശ്യാം സംഗീതവും നിര്‍വഹിക്കും.
മമ്മൂട്ടി കമ്പനിയുടെ ബാനറിലാണ് സിനിമയുടെ നിര്‍മാണം. ജിയോ ബേബിയുടെ 'കാതല്‍', ലിജോ ജോസ് പെല്ലിശ്ശേരിയുടെ 'നന്‍പകല്‍ നേരത്ത് മയക്കം', നിസാം ബഷീറിന്‍റെ 'റോഷാക്ക്' എന്നിവയാണ് മമ്മൂട്ടി കമ്പനിയുടെ ബാനറില്‍ നിര്‍മിച്ച മറ്റ് ചിത്രങ്ങള്‍.
അതേസമയം 'കാതല്‍', തെലുഗു ചിത്രം 'ഏജന്‍റ്' എന്നിവയാണ് മമ്മൂട്ടിയുടെതായി റിലീസിനൊരുങ്ങുന്ന പുതിയ പ്രോജക്‌ടുകള്‍. ഈദ് റിലീസായി ഏപ്രില്‍ 20നാണ് 'കാതല്‍' തിയേറ്ററുകളില്‍ എത്തുക. തെന്നിന്ത്യന്‍ സൂപ്പര്‍ താരം ജ്യോതികയാണ് ചിത്രത്തില്‍ മമ്മൂട്ടിയുടെ നായികയായെത്തുന്നത്.
ഇതാദ്യമായാണ് മമ്മൂട്ടിയും ജ്യോതികയും ഒന്നിച്ച് സ്‌ക്രീന്‍ സ്‌പേസ് പങ്കിടുന്നത്. പഞ്ചായത്ത് തെരഞ്ഞെടുപ്പില്‍ മത്സരിക്കുന്ന ഇടതുപക്ഷ സ്വതന്ത്ര സ്ഥാനാര്‍ഥി മാത്യു ദേവസി എന്ന കഥാപാത്രത്തെയാണ് 'കാതലി'ല്‍ മമ്മൂട്ടി അവതരിപ്പിക്കുന്നത്.
തെന്നിന്ത്യന്‍ യുവ താരം അഖില്‍ അക്കിനേനി നായകനായെത്തുന്ന തെലുഗു ചിത്രം 'ഏജന്‍റി'ല്‍ സുപ്രധാന വേഷത്തിലാണ് മമ്മൂട്ടി എത്തുന്നത്. ഒരു പട്ടാള ഉദ്യോഗസ്ഥന്‍റെ വേഷമാണ് ചിത്രത്തില്‍ മമ്മൂട്ടിക്ക്. ആക്ഷന് ഏറെ പ്രാധാന്യമുള്ള ചിത്രത്തില്‍ ഗംഭീര മേക്കോവറിലാണ് അഖില്‍ അക്കിനേനി പ്രത്യക്ഷപ്പെടുന്നത്. അഖിലും മമ്മൂട്ടിയും ആദ്യമായി ഒന്നിക്കുന്ന ചിത്രം കൂടിയാണ് 'ഏജന്‍റ്'.
പുതുമുഖം സാക്ഷി വൈദ്യയാണ് സിനിമയിൽ അഖിലിന്‍റെ നായികയായി എത്തുക. മോഡല്‍ കൂടിയാണ് സാക്ഷി വൈദ്യ. പാന്‍ ഇന്ത്യന്‍ ചിത്രമായി ഒരുങ്ങുന്ന ഏജന്‍റ് ഏപ്രിൽ 28നാണ് തിയേറ്ററുകളിൽ എത്തുക. മലയാളം, തെലുഗു, ഹിന്ദി, തമിഴ്, കന്നഡ എന്നീ ഭാഷകളിലാണ് ചിത്രം റിലീസിനെത്തുന്നത്.
Also Read: ആരോപണങ്ങള്‍ക്ക് മറുപടിയുമായി മമ്മൂട്ടി; മമ്മൂട്ടി കമ്പനിക്ക് ഇനി പുതിയ ലോഗോ
