കഴിഞ്ഞ ദിവസമാണ് വിജയ് ചിത്രം 'ലിയോ'യുടെ ഒടിടി റിലീസ് തീയതി നിർമാതാക്കൾ പുറത്തുവിട്ടത്. നെറ്റ്‌ഫ്ലിക്‌സാണ് ചിത്രത്തിന്‍റെ ഒടിടി അവകാശം സ്വന്തമാക്കിയത്. ഇന്ത്യയിൽ നവംബർ 24 മുതൽ 'ലിയോ' സ്‌ട്രീമിംഗ് ആരംഭിക്കും. ചിത്രത്തിന്‍റെ മലയാളം ട്രെയിലർ നെറ്റ്ഫ്ലിക്‌സ് പുറത്തുവിട്ടിരിക്കുകയാണ് (Leo Official Malayalam Trailer out).
മലയാളം, തമിഴ്, കന്നഡ, തെലുഗു ഭാഷകളിൽ പ്രേക്ഷകർക്ക് ചിത്രം ആസ്വദിക്കാനാകും. അതേസമയം വിദേശ രാജ്യങ്ങളില്‍ നവംബര്‍ 28 മുതലാണ് 'ലിയോ' സ്‌ട്രീമിംഗ് ആരംഭിക്കുക. നിർമാതാക്കളായ സെവൻ സ്‌ക്രീൻ സ്റ്റുഡിയോസ് തന്നെയാണ് ഇക്കാര്യം ഔദ്യോഗികമായി അറിയിച്ചത്.
ഒക്‌ടോബര്‍ 19ന് തിയേറ്ററുകളിലേക്കെത്തിയ വിജയ് - ലോകേഷ് കനകരാജ് ചിത്രം 'ലിയോ' ബോക്‌സോഫിസിൽ മിന്നും പ്രകടനമാണ് കാഴ്‌ചവച്ചത്. മാസ്റ്റർ എന്ന ചിത്രത്തിന് ശേഷം വിജയ്‌യും ലോകേഷും വീണ്ടും കൈകോർത്ത ലിയോയിൽ തൃഷയായിരുന്നു നായിക. ഇതുവരെയുള്ള ബോക്‌സോഫിസ് റെക്കോർഡുകൾ തകർത്തെറിഞ്ഞ് കൊണ്ടാണ് ചിത്രം തിയേറ്ററുകളിൽ തേരോട്ടം നടത്തിയത്.
കേരളത്തിലും ചിത്രം മിന്നും വിജയം കൊയ്‌തു. കേരളത്തിൽ ഏറ്റവും വേഗത്തിൽ 50 കോടി നേടുന്ന ആദ്യ ചിത്രമായി ലിയോ മാറി. 11 ദിവസം കൊണ്ട് 50 കോടി സ്വന്തമാക്കിയ കെജിഎഫ് 2 വിന്‍റെ റെക്കോർഡാണ് ലിയോ കേരളത്തില്‍ മറികടന്നത്. കേരളത്തിൽ ആദ്യ ദിനം 12 കോടി ഗ്രോസ് കലക്ഷൻ നേടിയ ചിത്രം മറ്റെല്ലാ അന്യഭാഷ സിനിമകളുടെയും ഇതുവരെയുള്ള റെക്കോഡുകൾ പഴങ്കഥയാക്കി.
READ MORE: ഒടുവിൽ അക്കാര്യത്തിൽ തീരുമാനമായി ; ലിയോ 'ഒറിജിനൽ' ഒടിടി റിലീസ് തീയതി ഇതാണ്
ആഗോള ബോക്‌സോഫിസിൽ 500 കോടി രൂപയുടെ നാഴികക്കല്ല് 'ലിയോ' നേരത്തെ പിന്നിട്ടിരുന്നു. സെവൻ സ്‌ക്രീൻ സ്റ്റുഡിയോ, ദ് റൂട്ട് എന്നിവയുടെ ബാനറുകളിൽ ലളിത് കുമാറും ജഗദീഷ് പളനിസാമിയും ചേർന്നാണ് ലിയോ നിർമിച്ചത്. മലയാളിതാരം മാത്യു തോമസും തമിഴ് ബാലതാരം ഇയാലും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നുണ്ട്.
ബോളിവുഡ് താരം സഞ്ജയ് ദത്തും അർജുൻ സർജയും ഈ ആക്ഷൻ ത്രില്ലർ ചിത്രത്തിൽ പ്രതിനായക കഥാപാത്രങ്ങളായി എത്തുന്നു. പ്രിയ ആനന്ദ്, അർജുൻ ദാസ്, മിഷ്‌കിൻ, ജാഫർ സിദ്ദിഖ്, മൻസൂർ അലി, അനുരാഗ് കശ്യപ്, ഗൗതം മേനോൻ, ബാബു ആന്‍റണി എന്നിവരും ഉൾപ്പെടുന്ന വമ്പൻ താരനിരയും ചിത്രത്തിൽ അണിനിരക്കുന്നുണ്ട്.
വിജയ് - തൃഷ കോംബോയും ചിത്രത്തിന്‍റെ പ്രധാന ആകർഷണമായി. നീണ്ട 14 വർഷത്തെ ഇടവേളയ്‌ക്ക് ശേഷമാണ് തൃഷയും വിജയ്‌യും വെള്ളിത്തിരയിൽ വീണ്ടും ഒന്നിച്ചത്. കേരളത്തിൽ ഗോകുലം ഗോപാലന്‍റെ ഗോകുലം മൂവിസാണ് ചിത്രം വിതരണത്തിനെത്തിച്ചത്. ഡ്രീം ബിഗ് ഫിലിംസാണ് കേരളത്തിലെ ഡിസ്‌ട്രിബ്യൂഷൻ പാർട്‌നർ.
