തൊണ്ണൂറുകളില്‍ ആരാധികമാരുടെ ചോക്ലേറ്റ് താരമായിരുന്നു ചാക്കോച്ചന്‍ എന്ന ഓമനപ്പേരില്‍ അറിയപ്പെടുന്ന കുഞ്ചാക്കോ ബോബന്‍. ആരാധകര്‍ താരത്തിന് സ്‌നേഹപൂര്‍വം നല്‍കിയ പേരായിരുന്നു ചാക്കോച്ചന്‍. മലയാളികളുടെ പ്രിയ താരം തന്‍റെ വ്യക്തി ജീവിതവും സിനിമ വിശേഷങ്ങളും എപ്പോഴും ആരാധകരുമായി പങ്കുവയ്‌ക്കാറുണ്ട്. സോഷ്യല്‍ മീഡിയയിലും സജീവമാണ് താരം.
ഇപ്പോഴിതാ താരം പങ്കുവച്ച ഒരു ഫേസ്‌ബുക്ക് പോസ്‌റ്റാണ് സോഷ്യല്‍ മീഡിയയില്‍ ശ്രദ്ധ നേടുന്നത്. തന്‍റെ 18-ാം വിവാഹ വാര്‍ഷികത്തോടനുബന്ധിച്ച് സോഷ്യല്‍ മീഡിയയില്‍ താരം പങ്കുവച്ച ഒരു പോസ്‌റ്റാണ് സോഷ്യല്‍ മീഡിയയില്‍ വൈറലായത്. തങ്ങള്‍ ഒന്നിച്ച് ജീവിക്കാന്‍ തുടങ്ങിയിട്ട് 18 വര്‍ഷങ്ങള്‍ ആയെന്നും തന്‍റെ ജീവിതം വളരെ മനോഹരമാക്കിയതിന് ഭാര്യ പ്രിയയ്‌ക്ക് നന്ദി എന്നുമാണ് താരം രേഖപ്പെടുത്തിയത്.
- " class="align-text-top noRightClick twitterSection" data="">
പോസ്‌റ്റിനൊപ്പം ഒരു ആരാധകന്‍ അയച്ചു കൊടുത്ത ഫോട്ടോയും കുഞ്ചാക്കോ ബോബന്‍ ഫേസ്‌ബുക്കില്‍ പങ്കുവച്ചിട്ടുണ്ട്. കുഞ്ചാക്കോയുടെയും പ്രിയയുടെയും വിവാഹ സമയത്തെ അഭിമുഖത്തിന്‍റെ പേപ്പര്‍ കട്ടിങ് ഒരു നോട്ട് ബുക്കിന്‍റെ പേജില്‍ ഒട്ടിച്ച് വച്ചിരിക്കുന്നതാണ് സംഭവം. വിവാഹ തീയതി, 2005 ഏപ്രില്‍ 2 എന്നും നോട്ട് ബുക്കില്‍ എഴുതിയിട്ടുണ്ട്.
ഫോട്ടോയ്‌ക്കൊപ്പം ഒരു കുറിപ്പും താരം പങ്കുവച്ചു. 'എനിക്കൊരു ആരാധകന്‍ അയച്ചു തന്ന ഈ ക്യൂട്ട് സമ്മാനം നിങ്ങളുമായി ഷെയര്‍ ചെയ്യുന്നു. എന്‍റെ ഹൃദയത്തിന്‍റെ രാജ്ഞിയുമായുള്ള ഔദ്യോഗിക കൂടിച്ചേരലിന്‍റെ 18-ാം വര്‍ഷം. എന്‍റെ ജീവിതം മനോഹരമാക്കിയതിനും സ്‌നേഹത്തിനും എല്ലാവര്‍ക്കും നന്ദി. എല്ലാവരുടെയും മനോഹരമായ ആശംസകള്‍ക്ക് നന്ദി' -കുഞ്ചാക്കോ ബോബന്‍ ഫേസ്‌ബുക്കില്‍ കുറിച്ചു.
സഹ താരങ്ങള്‍ ഉള്‍പ്പെടെ നിരവധി ആരാധകരും താരത്തിന്‍റെ പോസ്‌റ്റിന് താഴെ കമന്‍റുകളുമായി എത്തിയിട്ടുണ്ട്. ദീപ്‌തി സതി, ഗീതു മോഹന്‍ദാസ്, മമിത ബൈജു, സരിത ജയസൂര്യ, ദീപു അന്തിക്കാട്, അജയ്‌ വാസുദേവ് തുടങ്ങി നിരവധി പേരാണ് കുഞ്ചാക്കോ ബോബനും ഭാര്യ പ്രിയക്കും ആശംസകള്‍ അറിയിച്ചിരിക്കുന്നത്.
'ഒരാളുടെ സ്വപ്‌നം സാക്ഷാത്‌കരിച്ചതും. കുറേ പേരുടെ സ്വപ്‌നം തകര്‍ന്ന ദിവസവും..' -ഇപ്രകാരമാണ് ഒരാള്‍ കുറിച്ചത്. 'തന്നെ ഇഷ്‌ടപ്പെട്ട ആരാധികയെ സ്വന്തമാക്കിയിട്ട് ഇന്ന് 18 വര്‍ഷം പൂര്‍ത്തിയാക്കുന്നു. വിവാഹാശംസകള്‍.. ഇച്ചായന്‍.. പ്രിയ ചേച്ചി..' -മറ്റൊരാള്‍ കുറിച്ചു.
അതേസമയം നിരവധി സിനിമകളുടെ തിരക്കിലാണിപ്പോള്‍ താരം. 'പദ്‌മിനി'യാണ് താരത്തിന്‍റേതായി റിലീസിനൊരുങ്ങുന്ന പുതിയ ചിത്രം. ചിത്രത്തില്‍ ക്യാമ്പസ് ഹീറോ ആയാണ് താരം വേഷമിടുന്നത്.
അജയ്‌ വാസുദേവന്‍ ചിത്രം 'പകലും പാതിരാവും' ആണ് കുഞ്ചാക്കോ ബോബന്‍റേതായി ഏറ്റവും ഒടുവില്‍ റിലീസിനെത്തിയ ചിത്രം. രജിഷ വിജയന്‍ ആണ് ചിത്രത്തില്‍ നായികയായെത്തിയത്. ടൊവിനോ തോമസിന്‍റെ സൂപ്പര്‍ ഹീറോ ചിത്രം 'മിന്നില്‍ മുരളി'യിലൂടെ മലയാളികള്‍ക്ക് സുപരിചിതനായ ഗുരു സോമസുന്ദരവും ചിത്രത്തില്‍ പൊലീസ് ഓഫിസറായി വേഷമിട്ടിരുന്നു.
മലയാള സിനിമയില്‍ ചോക്ലേറ്റ് ഹീറോയായി എത്തിയിരുന്ന ചാക്കോച്ചന്‍ ഒരിടവേളയ്‌ക്ക് ശേഷം മലയാള സിനിമയിലെത്തുമ്പോള്‍ ചോക്ലേറ്റ് താരമായല്ല അഭിനയിച്ചിരുന്നത്. ചോക്ലേറ്റ് ഹീറോയില്‍ നിന്നും നായക വേഷവും ക്യാരക്‌ടര്‍ റോളുകളും നെഗറ്റീവ് റോളുകളും ചാലഞ്ചിങ് കഥാപാത്രങ്ങളും താരം പരീക്ഷിച്ച് വിജയിപ്പിച്ചു.
Also Read: 'ദേവദൂതര്‍ പാടി', മതിമറന്ന് ആടി ചാക്കോച്ചന്‍, വൈറല്‍ വീഡിയോ ഏറ്റെടുത്ത് സോഷ്യല്‍ മീഡിയ
