Film critics award 2021: 45-ാമത് കേരള ഫിലിം ക്രിട്ടിക്‌സ്‌ പുരസ്‌കാരങ്ങള്‍ പ്രഖ്യാപിച്ചു. കൃഷാന്ത് നിര്‍മിച്ച് സംവിധാനം ചെയ്‌ത 'ആവാസവ്യൂഹ'മാണ് മികച്ച സിനിമ. മികച്ച ചിത്രത്തിന്‍റെ സംവിധായകനുള്ള ബഹുമതി കൃഷാന്തിന് ലഭിക്കും. മാര്‍ട്ടിന്‍ പ്രകാട്ട് ആണ് മികച്ച സംവിധായന്‍.
Best actor in film critics award: ദുല്‍ഖര്‍ സല്‍മാന്‍ മികച്ച നടനായും, ദുര്‍ഗ കൃഷ്‌ണ മികച്ച നടിയായും തെരഞ്ഞെടുക്കപ്പെട്ടു. കുറുപ്പ്, സല്യൂട്ട് എന്നീ ചിത്രങ്ങളിലെ അഭിനയമാണ്‌ ദുല്‍ഖറിനെ അവാര്‍ഡിന് അര്‍ഹനാക്കിയത്. ഉടല്‍ എന്ന സിനിമയില്‍ മികവുറ്റ അഭിനയം കാഴ്‌ചവച്ചതിനാണ് ദുര്‍ഗയ്‌ക്ക് പുരസ്‌കാരം.
മുതിര്‍ന്ന സംവിധായകന്‍ ജോഷിക്കാണ് സമഗ്ര സംഭാവനകള്‍ക്കുള്ള ചലച്ചിത്ര പുരസ്‌കാരം. സുരേഷ് ഗോപി, ക്രിട്ടിക്‌സ്‌ റൂബി ജൂബിലി അവാര്‍ഡിനും അര്‍ഹനായി. പ്രിയങ്ക നായര്‍ (ആമുഖം), ഭീമന്‍ രഘു (കാളച്ചേകോന്‍), വിഷ്‌ണു ഉണ്ണികൃഷ്‌ണന്‍ (രണ്ട്, റെഡ് റിവര്‍), കലാഭവന്‍ റഹ്മാന്‍ (രണ്ട്), ശ്രുതി രാമചന്ദ്രന്‍ (മധുരം), അനൂപ് ഖാലിദ് (സിക്‌സ്‌ അവേഴ്‌സ്‌), രതീഷ് രവി (ധരണി) എന്നിവര്‍ക്ക് അഭിനയ മികവിനുള്ള പ്രത്യേക ജൂറി പുരസ്‌കാരങ്ങളും ലഭിച്ചു.
ലേഖ ബി കുമാറിനാണ് (കോളജ് ക്യൂട്ടീസ്) ഗാന രചനയ്‌ക്കുള്ള പ്രത്യേക ജൂറി പുരസ്‌കാരം. ഗായികയ്‌ക്കുള്ള പ്രത്യേക ജൂറി പുരസ്‌കാരം പി.കെ മേദിനിക്ക് (തീ) ലഭിച്ചു. ഛായാഗ്രഹണ മികവിനുള്ള പ്രത്യേക ജൂറി പുരസ്‌കാരം ഉണ്ണി മടവൂറിനാണ്(ഹോളി വൂണ്ട്‌).
പുരസ്‌കാര ജേതാക്കള്‍
മികച്ച നടന്‍ - ദുല്‍ഖര്‍ സല്‍മാന്‍ (കുറുപ്പ്, സല്യൂട്ട്)
മികച്ച നടി - ദുര്‍ഗ കൃഷ്‌ണ (ഉടല്‍)
മികച്ച സഹനടന്‍ - ഉണ്ണി മുകുന്ദന്‍ (മേപ്പടിയാന്‍)
മികച്ച സഹനടി - മഞ്ജു പിള്ള (ഹോം)
മികച്ച തിരക്കഥ- ജീത്തു ജോസഫ്‌ (ദൃശ്യം 2), ജോസ്‌ കെ.മാനുവല്‍ (ഋ)
മികച്ച സംഗീത സംവിധാനം - ഹിഷാം അബ്‌ദുല്‍ വഹാബ്‌ (ഹൃദയം, മധുരം)
മികച്ച ഗാനരചയിതാവ് - ജയകുമാര്‍ കെ.പവിത്രന്‍ (എന്‍റെ മഴ)
മികച്ച പിന്നണി ഗായകന്‍ -സൂരജ്‌ സന്തോഷ്‌ (ഗാനം- ഗഗനമേ; ചിത്രം -മധുരം)
മികച്ച പിന്നണി ഗായിക - അപര്‍ണ രാജീവ് (ഗാനം- തിര തൊടു തീരം; ചിത്രം തുരുത്ത്)
മികച്ച ജനപ്രിയ ചിത്രം -ഹൃദയം
മികച്ച രണ്ടാമത്തെ ചിത്രം - മിന്നല്‍ മുരളി
മികച്ച ബാലതാരം - മാസ്‌റ്റര്‍ ആന്‍ മയ്‌ (എന്‍റെ മഴ), മാസ്‌റ്റര്‍ അഭിമന്യു (തുരുത്ത്)
മികച്ച ഛായാഗ്രാഹകന്‍ - അസ്ലം കെ.പുരയില്‍ (സല്യൂട്ട്)
മികച്ച വസ്‌ത്രാലങ്കാരം- അരുണ്‍ മനോഹര്‍ (സബാഷ്‌ ചന്ദ്രബോസ്‌)
മികച്ച മേക്കപ്പ്മാന്‍- ബിനോയ്‌ കൊല്ലം (തുരുത്ത്)
മികച്ച കലാസംവിധായകന്‍ - മനു ജഗത് (മിന്നല്‍ മുരളി)
മികച്ച ശബ്‌ദലേഖകന്‍- സാന്‍ ജോസ്‌ (സാറാസ്‌)
മികച്ച ചിത്രസന്നിവേശകന്‍- പ്രജീഷ്‌ പ്രകാശ്‌ (ഹോം)
മികച്ച നവാഗത പുരസ്‌കാര പട്ടിക ചുവടെ-
മികച്ച സംവിധാനം- സാനു ജോണ്‍ വര്ഗീസ് (ആര്‍ക്കറിയാം), ഫാ വര്ഗീസ് ലാല്‍ (ഋ), ബിനോയ്‌ വേളൂര്‍ (മോസ്‌കോ കവല), കെ.എസ് ഹരിഹരന്‍ (കാളച്ചേകോന്‍), സുജിത് ലാല്‍ (രണ്ട്)
2021ലെ കേരള ഫിലിം ക്രിട്ടിക്‌സ്‌ അവാര്‍ഡാണ് ഇക്കുറി പ്രഖ്യാപിച്ചത്. ഡോ.ജോര്‍ജ് ഓണക്കൂര്‍ ചെയര്‍മാനും തേക്കിന്‍കാട് ജോസഫ്‌, എ.ചന്ദ്രശേഖര്‍, എം.എഫ്‌ തോമസ്‌, ഡോ.അരവിന്ദന്‍ വല്ലച്ചിറ, അഡ്വ.പൂവപ്പള്ളി രാമചന്ദ്രന്‍ നായര്‍, സുകു പാല്‍ക്കുളങ്ങര, പ്രഫ.വിശ്വമംഗലം സുന്ദരേശന്‍, ജി.ഗോപിനാഥ്, ബാലന്‍ തിരുമല, മുരളി കോട്ടയ്‌ക്കകം എന്നിവരടങ്ങുന്ന ജൂറിയാണ് പുരസ്‌കാര നിര്‍ണയം നടത്തിയത്. കേരളത്തില്‍ സംസ്ഥാന അവാര്ഡ് കഴിഞ്ഞാല്‍ അപേക്ഷ ക്ഷണിച്ച് ജൂറി കണ്ട് നിര്‍ണയിക്കുന്ന ഒരേയൊരു ചലച്ചിത്ര പുരസ്‌കാരമാണ് ഫിലിം ക്രിട്ടിക്‌സ്‌.
