ഹൈദരാബാദ്: തന്‍റെ അഭിനയ ജീവിതത്തിലെ ഏറ്റവും മികച്ച സമയത്തിലൂടെയാണ് തെലുഗു സൂപ്പർ സ്റ്റാർ ജൂനിയർ എൻടിആർ ഇപ്പോൾ കടന്നു പോകുന്നത്. ഇന്ത്യൻ സിനിമയിലെ തന്നെ ഏറ്റവും വലിയ ബോക്സോഫിസ് വിജയങ്ങളിലൊന്നായി മാറിയ 'ആർആർആറി'ലെ മികച്ച പ്രകടനം നടന് കയ്യടി നേടിക്കൊടുത്തിരുന്നു. ഓസ്‌കർ വേദിയിലും വെന്നിക്കൊടി പാറിച്ച ഈ എസ്എസ് രാജമൗലി ചിത്രത്തിന് പിന്നാലെ തന്‍റെ 30-ാമത്തെ സിനിമയുടെ പ്രഖ്യാപനവുമായാണ് ജൂനിയർ എൻടിആർ ആരാധകർക്ക് പുത്തന്‍ സന്തോഷം നല്‍കിയത്.
- " class="align-text-top noRightClick twitterSection" data="
">
'എൻടിആർ 30' എന്ന പേരിൽ അറിയപ്പെട്ടിരുന്ന സിനിമയുടെ ഒഫീഷ്യൽ ടൈറ്റിൽ അടുത്തിടെയാണ് പുറത്തുവന്നത്. 'ദേവര' എന്നു പേരിട്ടിരിക്കുന്ന ആക്ഷൻ ചിത്രത്തിൻ്റെ പോസ്‌റ്റർ ജൂനിയർ എൻടിആർ തന്നെയാണ് സമൂഹ മാധ്യമങ്ങളിലൂടെ പുറത്തുവിട്ടത്. ഇപ്പോഴിതാ 'ദേവര'യുടെ പോസ്റ്റ്-പാക്ക്-അപ്പ് ഫോട്ടോഷൂട്ടില്‍ തിളങ്ങുന്ന ജൂനിയർ എൻടിആറിന്‍റെ ചിത്രങ്ങളാണ് പുറത്തുവന്നിരിക്കുന്നത്.
അന്നപൂർണ സ്റ്റുഡിയോയിൽ പ്രശസ്‌ത സെലിബ്രിറ്റി ഫോട്ടോഗ്രാഫർ അവിനാഷ് ഗോവാരിക്കറാണ് തെലുങ്ക് സൂപ്പർസ്റ്റാറിന്‍റെ മോണോക്രോം ചിത്രങ്ങൾ പകർത്തിയത്. അവിനാഷ് തന്നെ തന്‍റെ സോഷ്യല്‍ മീഡിയ പേജുകളില്‍ ചിത്രങ്ങൾ പങ്കുവെച്ചിട്ടുണ്ട്. വളരെ അടുത്ത സുഹൃത്തും ജനപ്രിയനുമായ താരക് അഥവാ ജൂനിയർ എൻടിആർ എന്ന് കുറിച്ചുകൊണ്ടാണ് അവിനാഷ് ചിത്രങ്ങൾ പങ്കുവെച്ചത്.
''അവന്റെ ഏറ്റവും നിഷ്‌കളങ്കമായ പുഞ്ചിരിയിൽ നിന്നുള്ള അവന്റെ പൂർണ്ണമായ രൂപത്തിലേക്കുള്ള മാറ്റം ഏതാനും മിനിറ്റുകൾക്കുള്ളിൽ ലഭിച്ചു''- അവിനാഷ് ഗോവാരിക്കർ കുറിച്ചു. ജൂനിയർ എൻടിആറിന്‍റെ മില്യൺ ഡോളർ പുഞ്ചിരിയും സമാനതകളില്ലാത്ത ഭാവവും ഉൾച്ചേരുന്ന ചിത്രങ്ങൾ സോഷ്യൽ മീഡിയയിൽ വൈറലാണ്. ജൂനിയർ എൻടിആർ ആരാധകർ ഫോട്ടോകൾ ഇരുകൈയ്യുംനീട്ടി സ്വീകരിച്ചുകഴിഞ്ഞു.
കൊരട്ടാല ശിവയാണ് പാൻ ഇന്ത്യൻ ചിത്രമായ 'ദേവര' സംവിധാനം ചെയ്‌തിരിക്കുന്നത്. ബോക്‌സ് ഓഫിസിൽ തരംഗം സൃഷ്‌ടിച്ച 'ജനത ഗാരേജി'ന് ശേഷം കൊരട്ടാല ശിവ ജൂനിയർ എൻടിആറുമായി വീണ്ടും ഒന്നിക്കുന്ന ചിത്രമാണ് 'ദേവര'. അടുത്ത വർഷം (2024) ഏപ്രിൽ 5 ന് ചിത്രം തിയേറ്ററുകളിൽ പ്രദർശനത്തിനെത്തും.
ജൂനിയർ എൻടിആറിന്‍റെയും കൊരട്ടാല ശിവയുടെയും ഏറ്റവും പ്രതീക്ഷയോടെ കാത്തിരിക്കുന്ന ചിത്രം കൂടിയാണ് 'ദേവര'. ബോളിവുഡ് താരം ജാൻവി കപൂറാണ് ചിത്രത്തിൽ നായികയായി എത്തുന്നത്. ജാൻവിയുടെ ആദ്യ തെലുഗു ചിത്രം കൂടിയാണ് 'ദേവര'.
ബോളിവുഡ് താരം സെയ്‌ഫ് അലി ഖാനും ചിത്രത്തിൽ പ്രധാന വേഷം കൈകാര്യം ചെയ്യുന്നുണ്ട്. യുവസുധ ആർട്‌സ്, എന്‍.ടി.ആര്‍ ആർട്‌സ് എന്നിവയുടെ ബാനറിൽ മിക്കിലിനേനി സുധാകറും കോസരാജു ഹരികൃഷ്‌ണയും ചേര്‍ന്നാണ് ചിത്രത്തിന്‍റെ നിര്‍മ്മാണം. നന്ദമുരി കല്യാണ്‍ റാം ആണ് 'ദേവര' വിതരണത്തിനായി എത്തിക്കുന്നത്.
ആർ രത്‌നവേലു ഛായാഗ്രഹകനാകുന്ന ചിത്രത്തിൻ്റെ എഡിറ്റർ ശ്രീകർ പ്രസാദ് ആണ്. പ്രശസ്‌ത സംഗീത സംവിധായകന്‍ അനിരുദ്ധ് രവിചന്ദറാണ് ചിത്രത്തിനായി ഈണം പകരുന്നത്. സാബു സിറിൾ ആണ് കലാസംവിധാനം.
മെഗാസ്റ്റാർ ചിരഞ്ജീവിയും അദ്ദേഹത്തിൻ്റെ മകൻ കൂടിയായ രാം ചരണും അഭിനയിച്ച "ആചാര്യ" ആയിരുന്നു കൊരട്ടാല ശിവയുടെ അവസാന ചിത്രം. എന്നാൽ ഈ ചിത്രം ബോക്‌സോഫിസിൽ കാര്യമായ ചലനം ഉണ്ടാക്കിയിരുന്നില്ല. അതുകൊണ്ടുതന്നെ പുതിയ ചിത്രമായ 'ദേവര' കൊരട്ടാല ശിവയുടെ സിനിമ ജീവിതത്തിൽ തന്നെ നിർണായകമാണ്.
ALSO READ: 'ദേവര'; ജൂനിയർ എൻടിആർ ചിത്രത്തിൻ്റെ ഫസ്റ്റ് ലുക്ക് വന്നു...
