ജോജു ജോർജിനെ (Joju George) കേന്ദ്രകഥാപാത്രമാക്കി എ കെ സാജൻ (AK Sajan) സംവിധാനം ചെയ്യുന്ന പുതിയ ചിത്രമാണ് 'പുലിമട' (Pulimada). 'പുലിമട'യുടെ ഫസ്റ്റ് ലുക്ക് പോസ്‌റ്റര്‍ റിലീസ് ചെയ്‌തു. മഞ്ജു വാര്യര്‍, ടൊവിനോ തോമസ്, പൃഥ്വിരാജ്, കല്യാണി പ്രിയദര്‍ശന്‍ തുടങ്ങി നിരവധി താരങ്ങള്‍ ഫസ്റ്റ് ലുക്ക് അവരുടെ സോഷ്യല്‍ മീഡിയ പേജുകളിലൂടെ പുറത്തുവിട്ടു.
'പെണ്ണിന്‍റെ ഗന്ധം' (സെന്‍റ് ഓഫ് എ വുമണ്‍) എന്ന ടാഗ്‌ലൈനോടു കൂടിയാണ് അണിയറപ്രവര്‍ത്തകര്‍ ഫസ്റ്റ് ലുക്ക് പുറത്തുവിട്ടത്. ജോജു ജോര്‍ജും ഐശ്വര്യ രാജേഷുമാണ് (Aishwarya Rajesh) ഫസ്റ്റ് ലുക്കില്‍. ക്രിസ്‌ത്യന്‍ വിവാഹ വേഷത്തില്‍ ഐശ്വര്യ രാജേഷിന്‍റെ കെ പിടിച്ച് നടക്കുന്ന ജോജു ജോര്‍ജിനെയാണ് 'പുലിമട'യുടെ ഫസ്റ്റ് ലുക്ക് പോസ്‌റ്ററില്‍ കാണാനാവുക. ജോജു ജോര്‍ജും ഫസ്റ്റ് ലുക്ക് ഫേസ്‌ബുക്കില്‍ പങ്കുവച്ചിട്ടുണ്ട്.
- " class="align-text-top noRightClick twitterSection" data="">
വിന്സന്റ് സ്‌കറിയ എന്ന പൊലീസ് കോണ്‍സ്‌റ്റബിളിന്‍റെ കഥാപാത്രത്തെയാണ് ചിത്രത്തില്‍ ജോജു ജോര്‍ജ് അവതരിപ്പിക്കുന്നത്. വിന്സന്റ് സ്‌കറിയുടെ വിവാഹവും അതുമായി ബന്ധപ്പെട്ടുള്ള സംഭവവികാസങ്ങളും പിന്നീട് അയാളുടെ സ്വഭാവത്തിലും ജീവിതത്തിലും ഉണ്ടാകുന്ന മാറ്റങ്ങളുമാണ് സിനിമയുടെ പ്രമേയം.
Also Read: ANTONY Motion Poster | കവചമായും കാവൽനാഥനായും 'ആന്‍റണി' ; ആവേശം ഇരട്ടിയാക്കി മോഷൻ പോസ്റ്റർ
രണ്ട് നായികമാരാണ് ചിത്രത്തില്‍. ഐശ്വര്യയെ കൂടാതെ ലിജോ മോളും പുലിമടയില്‍ നായികയായി എത്തുന്നുണ്ട്. പാന്‍ ഇന്ത്യന്‍ റിലീസായി എത്തുന്ന ചിത്രത്തില്‍ വന്‍ താരനിരയാണ് അണിനിരക്കുന്നത്. ചെമ്പന്‍ വിനോദ്, ബാലചന്ദ്ര മേനോന്‍, ജാഫര്‍ ഇടുക്കി, ജോണി ആന്‍റണി, അബു സലിം, ജിയോ ബേബി, കൃഷ്‌ണ പ്രഭ, സോന നായര്‍, ഷിബില, പൗളി വല്‍സന്‍ തുടങ്ങിയവരും ചിത്രത്തില്‍ അണിനിരക്കുന്നു.
60 ദിവസത്തെ ചിത്രീകരണമാണ് സിനിമയ്‌ക്ക് ഷെഡ്യൂള്‍ ചെയ്‌തിരിക്കുന്നത്. വയനാടാണ് സിനിമയുടെ പ്രധാന ലൊക്കേഷന്‍. ഐന്‍സ്‌റ്റീന്‍ മീഡിയ, ലാന്‍ഡ് സിനിമാസ് എന്നീ ബാനറുകളില്‍ ഐന്‍സ്‌റ്റീന്‍ സാക് പോള്‍, രാജേഷ് ദാമോദരന്‍ എന്നിവര്‍ ചേര്‍ന്നാണ് സിനിമയുടെ നിര്‍മാണം.
സംവിധായകന്‍ എ കെ സാജൻ തന്നെയാണ് സിനിമയുടെ കഥ, തിരക്കഥ, സംഭാഷണം എന്നിവയും നിർവഹിക്കുന്നത്. റഫീഖ് അഹമ്മദ്, ഫാദര്‍ മൈക്കിള്‍ പനച്ചിക്കല്‍, ഡോക്‌ടര്‍ താര ജയശങ്കര്‍ എന്നിവര്‍ ചേര്‍ന്നാണ് സിനിമയുടെ ഗാന രചന നിര്‍വഹിക്കുക. ഇഷാന്‍ ദേവ് സംഗീതവും ഒരുക്കും. അനില്‍ ജോണ്‍സണ്‍ ആണ് പശ്ചാത്തല സംഗീതം.
പ്രശസ്‌ത ഛായാഗ്രാഹകൻ വേണു ഛായാഗ്രഹണവും എ കെ സാജന്‍ എഡിറ്റിങ്ങും നിര്‍വഹിക്കുന്നു. 10 വർഷത്തെ ഇടവേളയ്‌ക്ക് ശേഷമാണ് വേണു 'പുലിമട'യിലൂടെ വീണ്ടും സിനിമയില്‍ തിരികെ എത്തുന്നത്.
അതേസമയം 'ആന്‍റണി' (Antony) ആണ് ജോജു ജോര്‍ജിന്‍റേതായി റിലീസിനൊരുങ്ങുന്ന മറ്റൊരു പുതിയ ചിത്രം. ജോഷി സംവിധാനം ചെയ്യുന്ന ചിത്രത്തില്‍ കല്യാണി പ്രിയദർശന്‍ (Kalyani Priyadarshan), ആശ ശരത്ത് (Asha Sharath) ചെമ്പൻ വിനോദ് ജോസ് (Chemban Vinod Jose), നൈല ഉഷ (Nyla Usha), വിജയരാഘവൻ എന്നിവരും സുപ്രധാന വേഷങ്ങളില്‍ എത്തുന്നു.
Also Read: Pulimada| റിലീസിനൊരുങ്ങി 'പുലിമട'; ജോജുവിനൊപ്പം മുഖ്യ വേഷത്തിൽ ഐശ്വര്യ രാജേഷും
