കോഴിക്കോട്: സിനിമ ചർച്ചയുമായി ബന്ധപ്പെട്ട് അതിഥിയായി ക്ഷണിച്ച ശേഷം കോഴിക്കോട് ഫറൂഖ് കോളജ് പരിപാടി റദ്ദാക്കിയതിൽ സംവിധായകൻ ജിയോ ബേബിക്ക് ഐക്യദാർഢ്യവുമായി എസ്എഫ്ഐ. സംഭവത്തിൽ പ്രതിഷേധിച്ച് എസ്എഫ്ഐയുടെ നേതൃത്വത്തിൽ ഇന്ന് വൈകീട്ട് സാംസ്‌കാരിക കൂട്ടായ്‌മ നടക്കും. എസ്എഫ്ഐ യൂണിറ്റ് കമ്മിറ്റിയുടെ നേതൃത്വത്തിൽ കോളജിന് മുന്നിലാണ് പരിപാടി.
കോളജ് നടപടിയിൽ പ്രതിഷേധം അറിയിച്ച് സംവിധായകൻ ജിയോ ബേബി നേരത്തെ രംഗത്തെത്തിയിരുന്നു (Director Jeo Baby Against Calicut Farook College). അഞ്ചാം തീയതി നടക്കേണ്ട ഫിലിം ക്ലബ്ബ് ഉദ്ഘാടനത്തിന് ക്ഷണിച്ച ശേഷം കോഴിക്കോട് എത്തിയപ്പോഴാണ് തന്നെ ഒഴിവാക്കിയ വിവരം അറിയിച്ചതെന്നാണ് ജിയോ ബേബിയുടെ ആരോപണം. സമൂഹ മാധ്യമങ്ങളിൽ പങ്കുവച്ച വീഡിയോയിലാണ് തനിക്കുണ്ടായ ദുരനുഭവം സംവിധായകൻ വെളിപ്പെടുത്തിയത്.
തന്‍റെ ചില പരാമർശങ്ങൾ കോളജിന്‍റെ ധാർമിക മൂല്യങ്ങൾക്കെതിരാണെന്ന കാരണത്താൽ സ്റ്റുഡന്‍റ്സ് യൂണിയൻ നിസഹകരണം പ്രഖ്യാപിക്കുകയായിരുന്നു എന്നും താൻ അപമാനിതനായെന്നും ജിയോ ബേബി വീഡിയോയിൽ പറയുന്നു. സംഭവത്തിൽ നിയമ നടപടിയുമായി നീങ്ങാനാണ് ജിയോ ബേബിയുടെ തീരുമാനം.
READ ALSO: ജ്യോതികയുടെ, 'ഓമന' ഞെട്ടിക്കുമെന്ന് മമ്മൂക്ക; റിലീസിനൊരുങ്ങി 'കാതൽ'
സോഷ്യല്‍ മീഡിയയിൽ പോസ്റ്റർ വരെ പുറത്തുവിട്ട പരിപാടി പെട്ടെന്ന് മാറ്റി വയ്‌ക്കാനുള്ള കാരണമെന്തെന്ന് അറിയാൻ കോളജ് പ്രിൻസിപ്പലിന് താൻ മെയിൽ അയക്കുകയും വാട്‌സ്‌ആപ്പിൽ ബന്ധപ്പെടുകയും ചെയ്‌തെങ്കിലും മറുപടി ലഭിച്ചില്ലെന്ന് ജിയോ ബേബി പറയുന്നു. പിന്നീട് ഫാറൂഖ് കോളജിലെ സ്റ്റുഡന്‍റ്സ് യൂണിയന്‍റെ ഒരു കത്ത് തനിക്ക് ലഭിക്കുകയുണ്ടായെന്നും അത് ഫോർവേഡ് ചെയ്‌ത് കിട്ടിയതാണെന്നും അദ്ദേഹം പറഞ്ഞു.
'ഫാറൂഖ് കോളജിൽ പ്രവർത്തിച്ചു വരുന്ന ഫിലിം ക്ലബ്ബുമായി ബന്ധപ്പെട്ട് നാളെ 5.12.2023 ന് എത്തിച്ചേരുന്ന ഉദ്ഘാടകന്‍റെ പരാമർശങ്ങൾ കോളജിന്‍റെ ധാർമിക മൂല്യങ്ങൾക്കെതിരാണ്. അതിനാൽ പ്രസ്‌തുത പരിപാടിയുമായി കോളജിലെ വിദ്യാർഥി യൂണിയൻ സഹകരിക്കുന്നതല്ല’ എന്നാണ് കത്തിൽ പറഞ്ഞിരുന്നത്. മാനേജ്മെന്‍റ് എന്തിനാണ് ആ പരിപാടി കാൻസൽ ചെയ്‌തതെന്ന് കൂടിയാണ് ഇനി അറിയേണ്ടത്. ഇത്തരം വിദ്യാഭ്യാസ സ്ഥാപനങ്ങളും വിദ്യാർഥി യൂണിയനുകളും എന്തുതരം ആശയമാണ് മുന്നോട്ടുവയ്‌ക്കുന്നത് എന്നും തനിക്കറിയണമെന്ന് ജിയോ ബേബി പറഞ്ഞു.
കോഴിക്കോട് വന്ന് തിരിച്ച് വരണമെങ്കിൽ ഒരു ദിവസത്തെ യാത്ര വേണം വേണം. ഇത്രയേറെ യാത്ര ചെയ്‌തു, അതിനേക്കാളൊക്കെ ഉപരിയായി ഞാൻ അപമാനിതനായി. ഇത്തരത്തിൽ പ്രതിഷേധിച്ചില്ലെങ്കിൽ ശരിയല്ല എന്നു തോന്നിയതുകൊണ്ടാണ് നിയമനടപടിയുമായി മുന്നോട്ട് പോകുന്നതെന്നും നാളെ ഇത്തരം ഒരു അനുഭവം മറ്റാർക്കും ഉണ്ടാകാതിരിക്കാനാണ് ഇതെന്നും അദ്ദേഹം വീഡിയോയിൽ വ്യക്തമാക്കിയിരുന്നു.
അതേസമയം മടപ്പള്ളി കോളേജിൽ എസ്എഫ്ഐ യൂണിയൻ നാളെ സംഘടിപ്പിക്കുന്ന ഫെസ്റ്റിൽ ജിയോ ബേബി പങ്കെടുക്കുമെന്ന് എസ്എഫ്ഐ സംസ്ഥാന സെക്രട്ടറി പി എം ആർഷോ അറിയിച്ചു.
