മോഹൻലാൽ ആരാധകർ ഇന്ന് ഏറെ ആവേശത്തിലാണ്. തമിഴകത്തിന്‍റെ സ്റ്റൈൽ മന്നൻ രജനികാന്ത് നായകനായി എത്തിയ 'ജയിലർ' തിയേറ്ററുകളില്‍ ഗംഭീര പ്രകടനമാണ് കാഴ്‌ചവയ്‌ക്കുന്നത്. ഈ ചിത്രത്തില്‍ മോഹൻലാൽ കാമിയോ റോളിലുണ്ട്. 'മാത്യു' എന്ന കഥാപാത്രമായാണ് താരം എത്തുന്നത്. അത്യുഗ്രൻ വൻവരവേൽപ്പാണ് സിനിമാപ്രേമികൾ 'മാത്യു'വിന് നൽകി കൊണ്ടിരിക്കുന്നത്. ഇപ്പോഴിതാ ലാലേട്ടൻ ആരാധകരുടെ ആഘോഷങ്ങൾക്ക് കൂടുതൽ ആവേശം പകരുന്ന ഒരു പ്രഖ്യാപനം എത്തിയിരിക്കുകയാണ്.
മോഹൻലാലിന്‍റെ പുതിയ ചിത്രവുമായി ബന്ധപ്പെട്ട അപ്ഡേറ്റാണ് പുറത്തു വന്നിരിക്കുന്നത്. ജീത്തു ജോസഫ് സംവിധാനം ചെയ്യുന്ന ഈ ചിത്രത്തിന്‍റെ ടൈറ്റിൽ ഓഗസ്റ്റ് 12ന് ശനിയാഴ്‌ച പുറത്തുവിടുമെന്നാണ് അറിയിപ്പ്. ശനിയാഴ്‌ച വൈകുന്നേരം അഞ്ച് മണിക്കാകും അണിയറ പ്രവർത്തകർ ടൈറ്റില്‍ പുറത്തുവിടുക. ഇതുമായി ബന്ധപ്പെട്ട പോസ്റ്ററും അണിയറ പ്രവർത്തകർ പങ്കുവച്ചു.
- " class="align-text-top noRightClick twitterSection" data="">
ആശിര്‍വാദ് സിനിമാസാണ് ജീത്തു ജോസഫ് - മോഹൻലാൽ കൂട്ടുകെട്ടിലെ പുതിയ ചിത്രത്തിന്‍റെ നിർമാണം. ആശിര്‍വാദ് സിനിമാസിന്‍റെ 33-ാമത്തെ ചിത്രം കൂടിയാണിത്. ഈ മാസം തന്നെ സിനിമയുടെ ഷൂട്ടിങ് ആരംഭിക്കുമെന്നാണ് വിവരം.
അതേസമയം കേരളത്തിൽ ഉൾപ്പടെ ജയിലർ തരംഗമാണ് അലയടിക്കുന്നത്. തിയേറ്ററുകളില്‍ മകച്ച പ്രതികരണമാണ് ചിത്രം നേടുന്നത്. രജനികാന്തിന്‍റെ തന്നെ പഴയകാല കഥാപാത്രങ്ങളായ മുത്തുവിനെയും പാണ്ഡ്യനെയും ഓർമിപ്പിച്ചുകൊണ്ടാണ് 'ജയിലറും' രജനി അവതരിപ്പിക്കുന്ന 'ടൈഗർ മുത്തുവേൽ പാണ്ഡ്യനും' തിയേറ്ററുകൾ കീഴടക്കുന്നത്. 'ബീസ്റ്റി'ന്‍റെ സമ്മിശ്ര പ്രതികരണത്തിന് ശേഷം കരിയറിൽ വലിയ പ്രതിസന്ധി നേരിടുകയായിരുന്ന സംവിധായകൻ നെൽസൺ ദിലീപ് കുമാറിന്‍റെ ശക്തമായ തിരിച്ചുവരവും വിമർശകർക്കുള്ള മറുപടിയുമാണ് 'ജയിലറി'ന് ഇപ്പോൾ ലഭിച്ചുകൊണ്ടിരിക്കുന്ന സ്വീകാര്യത.
മഞ്ഞ കണ്ണടയും പൂക്കൾ ഷർട്ടുമായി രജനിക്കൊത്ത സ്‌ക്രീൻ പ്രെസൻസുമായാണ് മലയാളത്തിന്‍റെ സ്വന്തം ലാലേട്ടൻ ചിത്രത്തില്‍ പ്രത്യക്ഷപ്പെടുന്നത്. നെൽസന്‍റെ കയ്യടക്കത്തോടെയുള്ള സംവിധാന മികവും പ്രശംസയേറ്റുവാങ്ങുകയാണ്. നിറചിരിയോടെയാണ് കാണികൾ സിനിമ കണ്ട് തിയേറ്ററുകൾ വിടുന്നത്.
READ MORE: Jailer response| 'ടൈഗർ കാ ഹുക്കും'; 'ജയിലർ' തിയേറ്ററുകൾ കീഴടക്കിയോ? പ്രേക്ഷക പ്രതികരണം ഇങ്ങനെ
രണ്ട് വര്‍ഷങ്ങള്‍ക്ക് ശേഷമാണ് ഒരു രജനികാന്ത് ചിത്രം തിയേറ്ററുകളില്‍ എത്തുന്നത് എന്നതിനാൽ തന്നെ ആരാധകരുടെ ആവേശത്തിനും അതിരില്ല. ഒരു ആക്ഷൻ പാക്ക്ഡ് എന്‍റര്‍ടെയ്‌നര്‍ ആയി എത്തിയ 'ജയിലർ' ആദ്യ ദിന കലക്ഷനില്‍ ഞെട്ടിക്കുമെന്നാണ് വിലയിരുത്തൽ.
ചെന്നൈ നഗരമാകെ 'ജയിലര്‍' റിലീസിനെ തുടര്‍ന്ന് ഇന്ന് ഉത്സവ ലഹരിയിലാണ്. പടക്കം പൊട്ടിച്ചും, പാലഭിഷേകം നടത്തിയും, ചെണ്ട മേളത്തിനൊപ്പം നൃത്തം ചെയ്‌തുമാണ് ആരാധകര്‍ തങ്ങളുടെ സൂപ്പര്‍ സ്‌റ്റാറിന്‍റെ ചിത്രത്തിന് വരവേൽപ്പ് ഒരുക്കിയത്. ദക്ഷിണേന്ത്യയിലെ എല്ലാ തിയേറ്ററുകളിലും ആഘോഷം പൊടി പൊടിക്കുകയാണ്. തിയേറ്റര്‍ പരിസരങ്ങളില്‍ മാത്രമല്ല, സോഷ്യല്‍ മീഡിയയിലും ജയിലര്‍ ആഘോഷങ്ങളാണ് എങ്ങും.
നെല്‍സണ്‍ ദിലീപ്‌കുമാർ സംവിധാനം ചെയ്‌ത ചിത്രത്തിൽ തമന്ന ഭാട്ടിയ, രമ്യ കൃഷ്‌ണൻ, പ്രിയങ്ക മോഹൻ, ശിവ രാജ്‌കുമാർ, യോഗി ബാബു, വസന്ത് രവി, വിനായകൻ, ജാക്കി ഷ്‌റോഫ്, സുനില്‍ തുടങ്ങി വൻ താരനിരയും അണിനിരക്കുന്നു. ശ്രീ ഗോകുലം മൂവീസിന്‍റെ ബാനറില്‍ ഗോകുലം ഗോപാലന്‍ ആണ് കേരളത്തില്‍ ചിത്രം വിതരണത്തിനെത്തിച്ചത്. ഡ്രീം ബിഗ് ഫിലിംസും ചിത്രത്തിന്‍റെ ഡിസ്‌ട്രിബ്യൂഷന്‍ പാര്‍ട്‌ണറാണ്.
