ജിജു അശോകന്‍റെ സംവിധാനത്തിൽ ദേവ് മോഹൻ നായകനായി എത്തുന്ന ചിത്രമാണ് 'പുള്ളി'. ത്രില്ലർ ജോണറിൽ അണിയിച്ചൊരുക്കിയ 'പുള്ളി' ഇതാ പ്രേക്ഷകർക്കരികിലേക്ക് എത്തുകയാണ്. ചിത്രം നാളെ (ഡിസംബർ 8, വെള്ളിയാഴ്‌ച) തിയേറ്ററുകളിൽ പ്രദർശനത്തിനെത്തും.
കമലം ഫിലിംസിന്‍റെ ബാനറിൽ ടി ബി രഘുനാഥൻ ആണ് 'പുള്ളി' നിർമിച്ചിരിക്കുന്നത്. മീനാക്ഷിയാണ് ചിത്രത്തിലെ നായിക. ഇന്ദ്രൻസും 'പുള്ളി'യിൽ സുപ്രധാന വേഷത്തിലുണ്ട്.
കലാഭവൻ ഷാജോൺ, ശ്രീജിത്ത് രവി, വിജയകുമാർ, വെട്ടുകിളി പ്രകാശ്, രാജേഷ് ശർമ്മ, സെന്തിൽ, സുധി കോപ്പ, സന്തോഷ് കീഴാറ്റൂർ, പ്രതാപൻ, അബിൻ, ബിനോ, ഉണ്ണിരാജ്, ഇന്ദ്രജിത് ജഗൻ, ടീന ഭാട്ടിയ, ഭാനുമതി തുടങ്ങിയവരാണ് മറ്റ് പ്രധാന കഥാപാത്രങ്ങൾക്ക് ജീവൻ പകരുന്നത്. ഇവർക്കൊപ്പം നാടക കലാകാരന്മാരും നിരവധി പുതുമുഖങ്ങളും ചിത്രത്തിൽ അണിനിരക്കുന്നു.
'സൂഫിയും സുജാതയും' എന്ന സിനിമയിലൂടെ പ്രേക്ഷകമനം കീഴടക്കിയ ദേവ് മോഹന്‍ നായകനായി എത്തുന്ന സിനിമയ്‌ക്കായി ഏറെ പ്രതീക്ഷയോടെയാണ് ആരാധകർ കാത്തിരിക്കുന്നത്. 'പൊറിഞ്ചു മറിയം' ജോസിൽ നൈല ഉഷ അവതരിപ്പിച്ച മറിയത്തിന്‍റെ കുട്ടിക്കാലം അവതരിപ്പിച്ച മീനാക്ഷി ഈ ചിത്രത്തിൽ നായികയായും എത്തുന്നു. അടുത്തിടെ നസ്‌ലിൻ നായകനായ '18 പ്ലസി'ൽ നായികയായെത്തി മീനാക്ഷി കയ്യടി നേടിയിരുന്നു.
'ഉറുമ്പുകള്‍ ഉറങ്ങാറില്ല' എന്ന ചിത്രത്തിന് ശേഷം ജിജു അശോകന്‍ സംവിധാനം ചെയ്യുന്ന സിനിമയാണ് 'പുള്ളി'. അടുത്തിടെയാണ് ചിത്രത്തിന്‍റെ ട്രെയിലർ അണിയറ പ്രവർത്തകർ പുറത്തുവിട്ടത്. ഉദ്വേഗം നിറഞ്ഞ രംഗങ്ങൾ കോർത്തിണക്കി ഒരുക്കിയ ട്രെയിലർ മികച്ച പ്രതികരണം നേടിയിരുന്നു. ജയിൽ പശ്‌ചാത്തലമാക്കിയാണ് ട്രെയിലർ അണിയിച്ചൊരുക്കിയത്. അത്യുഗ്രൻ ആക്ഷൻ - മാസ് രംഗങ്ങളും ചിത്രത്തിലുടനീളം ഉണ്ടാവുമെന്ന് സൂചനയും ട്രെയിലർ നൽകിയിരുന്നു.
READ MORE: 'നിന്നെ രക്ഷിക്കാൻ നീ മാത്രേയുള്ളൂ സ്റ്റീഫാ...'; ഉദ്വേഗം നിറച്ച് 'പുള്ളി' ട്രെയിലർ പുറത്ത്
ഏതേസമയം ഡിസംബര്‍ ഒന്നിന് ചിത്രം റിലീസ് ചെയ്യുമെന്നായിരുന്നു അണിയറ പ്രവർത്തകർ ആദ്യം അറിയിച്ചിരുന്നത്. പിന്നീട് റിലീസ് നീട്ടുകയായിരുന്നു. സോഷ്യല്‍ മീഡിയയിലൂടെയാണ് 'പുള്ളി'യുടെ പുതുക്കിയ തീയതി അണിയറപ്രവര്‍ത്തകര്‍ പുറത്തുവിട്ടത്.
ബിജിബാൽ ആണ് ചിത്രത്തിലെ ഗാനങ്ങൾക്ക് സംഗീതം പകർന്നത്. പശ്ചാത്തല സംഗീതം ഒരുക്കിയതും അദ്ദേഹം തന്നെ. ചിത്രത്തിലെ സ്‌പെഷ്യൽ ട്രാക്‌സ് ഒരുക്കിയത് 'മനുഷ്യര്‍' എന്ന മ്യൂസിക് ബാന്‍ഡ് ആണ്. ബിനു കുര്യൻ ആണ് ചിത്രത്തിന്‍റെ ഛായാഗ്രഹണം നിർവഹിക്കുന്നത്. എഡിറ്റിംഗ് ദീപു ജോസഫും നിർവഹിക്കുന്നു.
ലേഖ ഭാട്ടിയ ഈ ചിത്രത്തിന്‍റെ കോ പ്രൊഡ്യൂസറാണ്. ലൈൻ പ്രൊഡ്യൂസര്‍ കെ ജി രമേശ് ആണ്. പ്രശാന്ത് മാധവ് കലാസംവിധാനവും നിർവഹിക്കുന്നു.
ത്രിൽസ് - വിക്കി മാസ്റ്റർ, വസ്‌ത്രാലങ്കാരം - അരുൺ മനോഹർ, മേക്കപ്പ് - അമൽ ചന്ദ്രൻ, പ്രൊഡക്ഷൻ കൺട്രോളർ - ബിജു കെ തോമസ്. ട്രെയിലർ, ടീസർ, : മനുഷ്യർ, അസോസിയേറ്റ് ഡയറക്‌ടർ - എബ്രഹാം സൈമൺ, ഫൈനൽ മിക്‌സിംഗ് - ഗണേഷ് മാരാർ, കളറിസ്റ്റ് - ലിജു പ്രഭാകർ, വിഎഫ്എക്‌സ് - മാഗസിൻ മീഡിയ, ഡിസൈൻ - സീറോ ക്ളോക്ക് എന്നിവർ ചിത്രത്തിന്‍റെ മറ്റ് അണിയറ പ്രവർത്തകരാണ്.
READ MORE: ദേവ് മോഹന്‍റെ 'പുള്ളി' ഡിസംബർ 8ന്; പുതിയ റിലീസ് തീയതി പ്രഖ്യാപിച്ചു
