രണ്‍വീര്‍ സിങിനെ കേന്ദ്രകഥാപാത്രമാക്കി രോഹിത് ഷെട്ടി ഒരുക്കുന്ന 'സര്‍ക്കസി'ലെ വീഡിയോ ഗാനം പുറത്തിറങ്ങി. സിനിമയിലെ 'കറന്‍റ്‌ ലഗാ റേ' എന്ന ഗാനമാണ് റിലീസ് ചെയ്‌തത്. രണ്‍വീറിനൊപ്പം തകര്‍പ്പന്‍ നൃത്തച്ചുവടുകളുമായി എത്തുന്ന ദീപികയേയാണ് ഗാനരംഗത്തില്‍ കാണാനാവുക.
'സര്‍ക്കസി'ലെ ഗാനരംഗത്തില്‍ മാത്രമാണ് ദീപിക പ്രത്യക്ഷപ്പെടുന്നത്. ദീപികയും രണ്‍വീറും തങ്ങളുടെ ഇന്‍സ്‌റ്റഗ്രാം പേജുകളില്‍ ഗാനം പങ്കുവച്ചിട്ടുണ്ട്. 'കറന്‍റ്‌ ലഗാ രേ', 'സര്‍ക്കസ് ക്രിസ്‌മസില്‍' എന്നീ ഹാഷ്‌ടാഗുകളോടു കൂടിയാണ് താരദമ്പതികള്‍ ഗാനം പുറത്തുവിട്ടിരിക്കുന്നത്.
തമിഴിലാണ് ഗാനം ആരംഭിക്കുന്നത്. തമിഴില്‍ തുടങ്ങി ഹിന്ദിയിലേക്കാണ് ഗാനത്തിന്‍റെ പോക്ക്. 'കറന്‍റ്‌ ലഗാ റേ'യുടെ തമിഴ് വരികള്‍ രചിച്ചിരിക്കുന്നത് ഹരിയും ഹിന്ദി വരികള്‍ രചിച്ചിരിക്കുന്നത് കുമാറുമാണ്. ലിജോ ജോര്‍ജ്, ഡിജെ ചേതാസ് എന്നിവരുടെ സംഗീതത്തില്‍ നകാഷ് അസീസ്, ധ്വനി ബനുഷാലി, ജോനിത ഗാന്ധി, ലിജോ ജോര്‍ജ് എന്നിവര്‍ ചേര്‍ന്നാണ് ഗാനം ആലപിച്ചിരിക്കുന്നത്. 'കറന്‍റ്‌ ലഗാ റേ'യുടെ തമിഴ് റാപ്പ് ഭാഗം ആലപിച്ചിരിക്കുന്നത് വിവേക് ഹരിഹരനാണ്.
- " class="align-text-top noRightClick twitterSection" data="
">
'83' എന്ന സിനിമയിലാണ് രണ്‍വീര്‍ സിങും ദീപിക പദുകോണും ഏറ്റവും ഒടുവിലായി ഒന്നിച്ചെത്തിയത്. 'രാം ലീല' (2013), 'ബജ്‌റാവോ മസ്‌താനി' (2015), 'പദ്‌മാവത്' (83) എന്നിവയാണ് ഇരുവരും ഒരുമിച്ച മറ്റു പ്രധാന ചിത്രങ്ങള്‍.
നേരത്തെ സിനിമയുടെ കളര്‍ഫുള്‍ ട്രെയിലറും പുറത്തിറങ്ങിയിരുന്നു. നര്‍മ മുഹൂര്‍ത്തങ്ങള്‍ കോര്‍ത്തിണക്കിയ ട്രെയിലറായിരുന്നു 'സര്‍ക്കസി'ന്‍റേത്. 1960കളുടെ പശ്ചാത്തലത്തിലാണ് 'സര്‍ക്കസ്' ഒരുങ്ങുന്നത്. കോമഡി ഡ്രാമയായി ഒരുങ്ങുന്ന ചിത്രത്തില്‍ ഇരട്ട വേഷത്തിലാണ് രണ്‍വീര്‍ പ്രത്യക്ഷപ്പെടുക. ജനന സമയത്ത് അപ്രതീക്ഷിതമായി വേര്‍പിരിയുന്ന ഒരുപോലെയുള്ള ഇരട്ടകളുടെ വേഷമാണ് രണ്‍വീര്‍ അവതരിപ്പിക്കുക.
ജോണി ലിവര്‍, വരുണ്‍ ശര്‍മ, ജാക്വിലിന്‍ ഫെര്‍ണാണ്ടസ്, പൂജ ഹെഗ്‌ഡെ, സഞ്ജയ്‌ മിശ്ര, അശ്വിനി കല്‍സേകര്‍, മുകേഷ് തിവാരി, സിദ്ധാര്‍ഥ് ജാദവ് തുടങ്ങി നിരവധി താരങ്ങളും ചിത്രത്തില്‍ അണിനിരക്കും. വരുണ്‍ ശര്‍മയും ചിത്രത്തില്‍ ഇരട്ട വേഷത്തിലെത്തുമെന്നാണ് സൂചന.
പ്രശസ്‌ത സാഹിത്യകാരന്‍ വില്യം ഷേക്‌സ്‌പിയറുടെ 'ദി കോമഡി ഓഫ്‌ ഇറേര്‍സ്' എന്ന പ്രശസ്‌ത നാടകത്തിന്‍റെ രൂപാന്തരമായ ബോളിവുഡ് ചിത്രം 'അങ്കൂറി'നെ ആസ്‌പദമാക്കിയാണ് സര്‍ക്കസ് ഒരുക്കിയിരിക്കുന്നത്. ക്രിസ്‌മസ് റിലീസായി ഡിസംബര്‍ 23ന് സിനിമ തിയേറ്ററുകളിലെത്തും.
Also Read: 'നീ അന്ന് റോളക്‌സ്‌ വാച്ച് ചോദിച്ചിരുന്നില്ലേ?' ; ആസിഫ് അലിക്ക് സര്‍പ്രൈസ് സമ്മാനവുമായി മമ്മൂട്ടി
