Controversial dialogue in Kaduva to be changed: ഷാജി കൈലാസ്‌-പൃഥ്വിരാജ് കൂട്ടുകെട്ടിലൊരുങ്ങിയ 'കടുവ'യെ കുറിച്ചുള്ള ചര്‍ച്ചകളാണ് കഴിഞ്ഞ കുറച്ചു ദിവസങ്ങളായി സോഷ്യല്‍ മീഡിയയില്‍. സിനിമയിലെ ഭിന്നശേഷിക്കാര്‍ക്കെതിരെയുള്ള ഡയലോഗില്‍ മാറ്റം വരുത്താനുള്ള നീക്കവുമായി അണിയറ പ്രവര്‍ത്തകര്‍. സീന്‍ കട്ട് ചെയ്യാതെ ഡയലോഗ് മാത്രം മാറ്റം വരുത്താനുള്ള ശ്രമം ആരംഭിച്ചു കഴിഞ്ഞു 'കടുവ' ടീം.
Social media comments on Kaduva dialogue: സിനിമയിലെ രംഗങ്ങള്‍ നീക്കം ചെയ്യണമെന്നാവശ്യപ്പെട്ട് സോഷ്യല്‍ മീഡിയയില്‍ വ്യാപക പ്രതിഷേധം ഉയര്‍ന്നതിന് പിന്നാലെയാണ് ഡയലോഗില്‍ മാറ്റം വരുത്താനുള്ള അണിയറപ്രവര്‍ത്തകരുടെ തീരുമാനം. സിനിമയുടെ പല ഭാഗങ്ങളിലും സെന്‍സര്‍ ബോര്ഡ് ഇടപെട്ടെങ്കിലും ഈ സംഭാഷണത്തില്‍ സെന്‍സര്‍ ബോര്ഡ് ഇടപെട്ടിരുന്നില്ലെന്നും അതുകൊണ്ടാണ് ഈ ഡയലോഗോടു കൂടി സിനിമ പുറത്തിറക്കിയതെന്നുമാണ് അണിയറപ്രവര്‍ത്തകരുടെ പ്രതികരണം.
Kaduva team apologize on controversial dialogue: 'കടുവ'യിലെ വിവാദ പരാമര്‍ശത്തില്‍ ക്ഷമാപണം നടത്തി കഴിഞ്ഞ ദിവസം സംവിധായകന്‍ ഷാജി കൈലാസും നടന്‍ പൃഥ്വിരാജും രംഗത്തെത്തിയിരുന്നു. ഇതിന് പിന്നാലെയാണ് ചിത്രത്തിലെ പ്രസ്‌തുത ഭാഗം നീക്കം ചെയ്യണമെന്ന ആവശ്യം ശക്തമായത്. ക്ഷമ പറഞ്ഞുകൊണ്ട്‌ മാത്രം വിഷയം അവസാനിക്കുന്നില്ലെന്നും പ്രസ്‌തുത ഭാഗം സിനിമയില്‍ നിന്നും നീക്കം ചെയ്യണമെന്നുമാണ് സോഷ്യല്‍ മീഡിയയില്‍ നിന്നുയരുന്ന ആവശ്യം.
Prithviraj on Kaduva dialogue: ചിത്രത്തില്‍ ശാരീരിക വെല്ലുവിളി നേരിടുന്ന ബാല കഥാപാത്രത്തെ കുറിച്ച് നായക കഥാപാത്രം നടത്തുന്ന വിവാദ ഡയലോഗ് കൈപ്പിഴ ആണെന്നായിരുന്നു ഷാജി കൈലാസ്‌ പ്രതികരിച്ചത്. അങ്ങനെയൊരു സംഭാഷണം എഴുതുമ്പോള്‍ തിരക്കഥാകൃത്ത് ജിനുവോ അത് പറയുമ്പോള്‍ നായകനായ പൃഥ്വിരാജോ ആ സീന്‍ ഒരുക്കുമ്പോള്‍ ഞാനോ അതിന്‍റെ മറ്റ് വശങ്ങളെ കുറിച്ച് ചിന്തിച്ചില്ല എന്നതാണ് സത്യമെന്നും ഷാജി കൈലാസ്‌ പറഞ്ഞിരുന്നു. സിനിമയിലെ ആ സംഭാഷണം ഒരു തെറ്റായിരുന്നുവെന്നും ഞങ്ങളത് അംഗീകരിക്കുകയും ക്ഷമ ചോദിക്കുകയും ചെയ്യുന്നുവെന്നുമാണ് പൃഥ്വിരാജ് പറഞ്ഞത്‌.
Prithviraj in Lulu Mall: അതേസമയം ഈ വിവാദങ്ങള്‍ക്കിടയിലും ചിത്രത്തിന്‍റെ വിജയം ആഘോഷമാക്കി മാറ്റിയിരിക്കുകയാണ് ആരാധകരും അണിയറപ്രവര്‍ത്തകരും. ഇതിന്‍റെ ഭാഗമായി പൃഥ്വിരാജ് ഇന്ന് തിരുവനന്തപുരത്ത് എത്തുകയാണ്. വൈകിട്ട് 6.30ന്‌ താരം ലുലു മാളില്‍ എത്തും. ഇക്കാര്യം പൃഥ്വിരാജ് തന്നെയാണ് ഫേസ്‌ബുക്കിലൂടെ ആരാധകരെ അറിയിച്ചിരിക്കുന്നത്‌. താരത്തിനൊപ്പം 'കടുവ'യുടെ അണിയറപ്രവര്‍ത്തകരും ലുലും മാളില്‍ എത്തുമെന്നാണ് സൂചന.
Also Read: 'തെറ്റ് തിരുത്താന്‍ ബാധ്യസ്ഥരാണ്..അതല്ലാതെ എന്ത് ചെയ്യാന്‍ പറ്റും'; തുറന്നുപറഞ്ഞ് ജിനു എബ്രഹാം
