പൃഥ്വിരാജ് - അല്‍ഫോന്‍സ് പുത്രന്‍ കൂട്ടുകെട്ടില്‍ ഒരുങ്ങിയ ചിത്രമാണ് 'ഗോള്‍ഡ്'. 'ഗോള്‍ഡ്' പരാജയ ചിത്രം ആയിരുന്നില്ലെന്നും, തിയേറ്ററില്‍ മാത്രമാണ് സിനിമ പരാജയപ്പെട്ടതെന്നുമുള്ള വെളിപ്പെടുത്തലുമായി സംവിധായകന്‍ അല്‍ഫോന്‍സ് പുത്രന്‍. സോഷ്യല്‍ മീഡിയയിലൂടെയായിരുന്നു അല്‍ഫോന്‍സിന്‍റെ പ്രതികരണം.
'ഗോള്‍ഡ്' റിലീസിന് മുമ്പ് തന്നെ 40 കോടി രൂപ കലക്‌ട് ചെയ്‌തെന്നും, റിലീസിന് മുമ്പ് 40 കോടി രൂപ കലക്‌ട് ചെയ്‌ത ഒരേയൊരു പൃഥ്വിരാജ് ചിത്രമാണിതെന്നും അല്‍ഫോന്‍സ് പുത്രന്‍ പറയുന്നു. സിനിമയ്‌ക്ക് ലഭിച്ച തുക തന്നില്‍ നിന്നും മറച്ചുവച്ചെന്നും ആരും തന്നെ സഹായിച്ചില്ലെന്നും സംവിധായകന്‍ പറയുന്നു.
'ഒരു പടം പൊട്ടിച്ചതിലാണ് പ്രശ്‌നം. പൊട്ടിയതല്ല. റിലീസിന് മുമ്പ് 40 കോടി കലക്‌ട് ചെയ്‌ത ഒരേയൊരു പൃഥ്വിരാജ് ചിത്രമാണ് ഗോള്‍ഡ്. പടം ഫ്ലോപ്പ് അല്ല. തിയേറ്ററില്‍ പരാജയമാണ്. അതിന് കാരണം മോശം പബ്ലിസിറ്റിയാണ്. കൂടാതെ ഒരുപാട് നുണകള്‍ എന്നോട് പറഞ്ഞു. കിട്ടിയ തുകയും എന്നില്‍ നിന്നും മറച്ചുവച്ചു. ആരും എന്നെ സഹായിച്ചില്ല പുട്ടിന് പീര ഇടുന്ന പോലെ, ഒരു അല്‍ഫോന്‍സ് പുത്രന്‍ ചിത്രമാണ്.
ഇതാണ് ആ മഹാന്‍ ആകെ മൊഴിഞ്ഞ വാക്ക്. ഞാന്‍ ഏഴ് വര്‍ക്കുകള്‍ ചെയ്‌തിട്ടുണ്ട് ഈ സിനിമയില്‍. പ്രൊമോഷന്‍ സമയത്ത് ആരോഗ്യ പ്രശ്‌നങ്ങള്‍ ഉണ്ടായിരുന്നു. ബാക്കി എല്ലാവരും മിണ്ടും എന്ന് വിചാരിച്ചു. അങ്ങനെ ഗോള്‍ഡ് ഫ്ലോപ് ആയത് തിയേറ്ററില്‍ മാത്രമാണ്. തിയേറ്ററില്‍ നിന്ന് പ്രേമത്തിന്‍റെ കാശു പോലും കിട്ടാനുണ്ട് എന്നാണ് അന്‍വര്‍ ഇക്ക പറഞ്ഞത്. പിന്നെ തിയേറ്റര്‍ ഓപ്പണ്‍ ചെയ്‌ത് ആള്‍ക്കാരെ കൂവിച്ച മഹാനും, മഹാന്‍റെ കൂട്ടരും എല്ലാം പെടും. ഞാന്‍ പെടുത്തും.' - ഇപ്രകാരമാണ് അല്‍ഫോന്‍സ് പുത്രന്‍ കുറിച്ചത്.
- " class="align-text-top noRightClick twitterSection" data="">
നിവിന്‍ പോളിക്കൊപ്പം ആദ്യ കാലത്ത് ചെയ്‌ത ഒരു ഷോര്‍ട്ട് ഫിലിമിന്‍റെ ചിത്രം അല്‍ഫോന്‍സ് പുത്രന്‍ കഴിഞ്ഞ ദിവസം ഫേസ്‌ബുക്കില്‍ പങ്കുവച്ചിരുന്നു. ഈ ചിത്രത്തിന് താഴെ വന്ന കമന്‍റിന് അല്‍ഫോന്‍സ് പുത്രന്‍ നല്‍കിയ മറുപടിയാണിത്.
Also Read: പ്രേമത്തിന് ശേഷം സായ് പല്ലവിയും നിവിൻ പോളിയും വീണ്ടും ഒന്നിക്കുമ്പോള്‍...
'ഒരു പടം പൊട്ടിയാൽ ഇത്രയും ഡിപ്രസ്‌ഡ് ആവുന്നത് എന്തിനാണ് ബ്രോ.. അങ്ങനെ ആണെങ്കിൽ ലാലേട്ടൻ ഒക്കെ ഇൻഡസ്ട്രിയിൽ കാണുമോ..ഒരു ഗോള്‍ഡ് പോയാൽ ഒൻപത് പ്രേമം വരും.. ബീ പോസിറ്റീവ് ആന്‍ഡ് കം ബാക്ക്.' -ഇപ്രകാരമായിരുന്നു ആരാധകന്‍റ കുറിപ്പ്.
അടുത്തിടെ താന്‍ കരിയര്‍ ഉപേക്ഷിക്കുന്നുവെന്ന് അല്‍ഫോന്‍സ് പുത്രന്‍ സോഷ്യല്‍ മീഡിയയിലൂടെ വെളിപ്പെടുത്തിയിരുന്നു. തനിക്ക് ഓട്ടിസം സ്‌പെക്‌ട്രം ഡിസോര്‍ഡര്‍ ആണെന്നും അതുകൊണ്ടാണ് കരിയര്‍ വിടുന്നതെന്നുമായിരുന്നു സംവിധായകന്‍ സോഷ്യല്‍ മീഡിയയിലൂടെ അറിയിച്ചത്. അല്‍ഫോന്‍സ് പുത്രന്‍റെ ഈ പോസ്‌റ്റും തീരുമാനവും സോഷ്യല്‍ മീഡിയയില്‍ വലിയ ചര്‍ച്ചയായിരുന്നു.
