'ലൈഗര്‍' സിനിമയുമായി ബന്ധപ്പെട്ടുള്ള സാമ്പത്തിക ഇടപാടില്‍ വിജയ് ദേവരകൊണ്ടയെ കഴിഞ്ഞ ദിവസം ഇഡി ചോദ്യം ചെയ്‌തിരുന്നു. ബുധനാഴ്‌ച രാവിലെ 8.30ന് തുടങ്ങിയ ചോദ്യം ചെയ്യല്‍ 12 മണിക്കൂറോളം നീണ്ടുനിന്നു. ശേഷം മാധ്യമങ്ങളെ കണ്ട വിജയ്, തന്‍റെ കടമ നിറവേറ്റിയെന്നും ജീവിതത്തിലെ വലിയൊരു അനുഭവമായിരുന്നു ഇതെന്നുമാണ് പ്രതികരിച്ചത്.
'പ്രശസ്‌തി ഉണ്ടാകുമ്പോള്‍ കുറച്ച് പ്രശ്‌നങ്ങളും പാര്‍ശ്വ ഫലങ്ങളും ഉണ്ടാകും. ഇതൊരു അനുഭവമാണ്. ഇതാണ് ജീവിതം. എന്നെ വിളിപ്പിച്ചപ്പോള്‍ ഞാന്‍ എന്‍റെ കടമ നിറവേറ്റി. ഞാന്‍ വന്ന് ചോദ്യങ്ങള്‍ക്ക് ഉത്തരം നല്‍കി. എന്നോട് ഒരിക്കല്‍ കൂടി വരണമെന്ന് അവര്‍ പറഞ്ഞിട്ടില്ല' - വിജയ് ദേവരകൊണ്ട അറിയിച്ചു.
ഫെമ നിയമം ലംഘിച്ച് വിദേശത്തുനിന്ന് 'ലൈഗര്‍' സിനിമയ്‌ക്ക് വേണ്ടി പണം സ്വീകരിച്ചുവെന്ന പരാതിയെ തുടര്‍ന്നാണ് ഇഡിയുടെ അന്വേഷണം. ഇതുമായി ബന്ധപ്പെട്ട കാര്യങ്ങള്‍ അറിയാനാണ് വിജയ് ദേവരകൊണ്ടയെ ഇഡി ചോദ്യം ചെയ്യലിനായി വിളിപ്പിച്ചത്. നേരത്തെ 'ലൈഗര്‍' സംവിധായകന്‍ പുരി ജഗന്നാഥ്, നിര്‍മാതാവ് ചാര്‍മി കൗര്‍ എന്നിവരെയും ഇഡി ഇതിന് മുമ്പ് ചോദ്യം ചെയ്‌തിരുന്നു.
'ലൈഗര്‍' സിനിമയ്‌ക്ക് വേണ്ടി പണം മുടക്കിയ കമ്പനികളും വ്യക്തികളും ആരൊക്കെയാണെന്നാണ് ഇഡി അന്വേഷിക്കുന്നത്. വിദേശത്ത് നിന്ന് സിനിമയ്‌ക്ക് പണമെത്തി, ഫെമ നിയമം ലംഘിച്ചു എന്നീ പരാതികളാണ് ഇഡി പരിശോധിക്കുന്നത്. കള്ളപ്പണം വെളുപ്പിക്കാന്‍ രാഷ്‌ട്രീയ നേതാക്കള്‍ ഉള്‍പ്പടെ നിരവധി പേര്‍ സിനിമയ്ക്കായി പണം നല്‍കിയെന്നാണ് കോണ്‍ഗ്രസ് നേതാവ് ബക്ക ജൂഡ്‌സണ്‍ പരാതിയില്‍ ആരോപിക്കുന്നത്.
വിജയ് ദേവരകൊണ്ടയുടെ ബോളിവുഡ് അരങ്ങേറ്റ ചിത്രം കൂടിയായിരുന്നു 'ലൈഗര്‍.' 125 കോടി ബജറ്റിലൊരുങ്ങിയ ചിത്രം ബോക്‌സ്‌ ഒഫിസില്‍ വിജയിച്ചില്ല. കഴിഞ്ഞ ഓഗസ്‌റ്റിലായിരുന്നു റിലീസ്. വിജയുടെ ആദ്യ പാന്‍ ഇന്ത്യന്‍ റിലീസ് കൂടിയായിരുന്നു ചിത്രം. അമേരിക്കന്‍ ബോക്‌സിംഗ് ഇതിഹാസം മൈക്ക് ടൈസണ്‍ അതിഥി വേഷത്തിലെത്തിയിരുന്നു.
