തൃശ്ശൂർ: തിരഞ്ഞെടുപ്പ് പെരുമാറ്റ ചട്ടം ലംഘിച്ചെന്ന പരാതിയിൽ തൃശൂരിലെ എൻഡിഎ സ്ഥാനാർഥി സുരേഷ് ഗോപി ഇന്ന് വിശദീകരണം നൽകും. ശബരിമലയുടെ പേരിൽ വോട്ട് ചോദിച്ചില്ലെന്ന നിലപാട് സുരേഷ് ഗോപി ആവർത്തിക്കാനാണ് സാധ്യത. 48 മണിക്കൂറിനുള്ളിൽ വിശദീകരണം നൽകാനാണ് വരണാധികാരിയായ ജില്ലാ കലക്ടർ ടിവി അനുപമ നൽകിയ നോട്ടീസിൽ പറഞ്ഞിരുന്നത്. സമയ പരിധി ഇന്ന് രാത്രിയോടെ അവസാനിക്കും.
ശബരിമലയുടെ പേരിൽ വോട്ട് ചോദിക്കരുതെന്ന മുഖ്യ തെരഞ്ഞെടുപ്പ് കമ്മീഷണറുടെ നിർദ്ദേശം സുരേഷ് ഗോപി ലംഘിച്ചുവെന്നാണ് നോട്ടീസിൽ പറഞ്ഞിരുന്നത്. എന്നാൽ കലക്ടറുടെ നോട്ടീസിന് പാർട്ടി മറുപടി നൽകുമെന്നും ചട്ട ലംഘനം നടത്തിയിട്ടില്ലെന്നുമാണ് തൻ്റെ ഉറപ്പെന്നും സുരേഷ് ഗോപി ഇന്നലെ പറഞ്ഞിരുന്നു.
