പാലക്കാട്: ചിറ്റൂർ അഞ്ചാംമൈലിൽ സ്ത്രീയെ വീട്ടിൽ മരിച്ച നിലയിൽ കണ്ടെത്തി. മൂങ്കിൽമട ഇന്ദിരാനഗർ കോളനിയിലെ രങ്കന്റെ മകൾ ജ്യോതിർമണി (45) ആണ് മരിച്ചത്‌. ഇവർക്കൊപ്പം താമസിച്ചിരുന്ന തമിഴ്‌നാട് ആനമല സ്വദേശി വീരാസ്വമിയെ (46) പൊലീസ് കസ്റ്റഡിയിലെടുത്ത്‌ ചോദ്യം ചെയ്‌തു.
കൊലപാതകമെന്ന് സംശയം: കഴുത്ത് ഞെരിച്ചു കൊലപ്പെടുത്തിയതാണെന്നാണ്‌ പൊലീസിന്‍റെ പ്രാഥമിക നിഗമനം. ഭർത്താവുമായി ബന്ധം പിരിഞ്ഞ ജ്യോതിർമണി ഒരുവർഷമായി വീരാസ്വാമിക്കൊപ്പം അഞ്ചാംമൈലിൽ പൂട്ടിക്കിടക്കുന്ന ഭഗവതി മില്ലിന് എതിർവശം പുറമ്പോക്ക് ഭൂമിയിൽ കുടിൽ കെട്ടി ഒരുമിച്ചു താമസിച്ചുവരികയായിരുന്നു. ഇയാൾക്ക് തമിഴ്നാട്ടിൽ ഭാര്യയും മക്കളും ഉണ്ടെന്ന് പൊലീസ് പറഞ്ഞു.
ഞായറാഴ്ച ഉച്ചമുതൽ ഇരുവരും തമ്മിൽ വഴക്കുണ്ടായിരുന്നു. വൈകിട്ട്‌ അഞ്ചരയോടെ സമീപത്ത്‌ താമസിക്കുന്ന വീട്ടമ്മയാണ് ജ്യോതിർമണിയെ മരിച്ചനിലയിൽ കണ്ടത്‌. കൊഴിഞ്ഞാമ്പാറ പൊലിസ് സ്ഥലത്തെത്തി. ഡോഗ് സ്‌ക്വാഡ്‌, വിരളടയാള വിദഗ്‌ധർ, ഫൊറൻസിക് വിഭാഗം തെളിവെടുപ്പ് നടത്തി പോസ്‌റ്റ്‌മോർട്ടവും പൂർത്തിയായതിനു ശേഷമേ കൂടുതൽ വിവരങ്ങൾ വ്യക്തമാക്കുവെന്ന് കൊഴിഞ്ഞാമ്പാറ സിഐ എം ശശിധരൻ പറഞ്ഞു.
Also read: കോട്ടയം ഞാലിയാകുഴിയിൽ സംഘർഷത്തിൽ തലയ്ക്ക് അടിയേറ്റ യുവാവ് മരിച്ചു
