ന്യൂഡല്‍ഹി: ശ്രദ്ധ വാക്കര്‍ വധക്കേസ് പ്രതി അഫ്‌താബ് അമിന്‍ പൂനാവാലയുടെ നുണ പരിശോധനയ്ക്ക് അനുമതി തേടി ഡല്‍ഹി പൊലീസ് കോടതിയില്‍. കേസുമായി ബന്ധപ്പെട്ട് അന്വേഷണ ഉദ്യോഗസ്ഥരുടെ ചോദ്യങ്ങള്‍ക്ക് അഫ്‌താബ് തെറ്റിദ്ധരിപ്പിക്കുന്ന മറുപടിയാണ് നല്‍കുന്നതെന്ന് ചൂണ്ടിക്കാട്ടിയാണ് ഇന്ന് പൊലീസ് കോടതിയെ സമീപിച്ചത്. പൊലീസ് സമര്‍പ്പിച്ച ഹര്‍ജി ചൊവ്വാഴ്‌ച കോടതി പരിഗണിച്ചേക്കും.
വിഷയത്തില്‍ കൂടുതല്‍ അന്വേഷണം നടത്താന്‍ സാകേത് കോടതിയിലെ മെട്രോപൊളിറ്റൻ മജിസ്‌ട്രേറ്റ് അവിരാൾ ശുക്ല മജിസ്‌ട്രേറ്റ് വിജയശ്രീ റാത്തോഡിന് നിര്‍ദേശം നല്‍കി. അഞ്ച് ദിവസത്തെ പൊലീസ് കസ്റ്റഡിയ്‌ക്ക് ശേഷം പ്രതിയെ കോടതിയില്‍ ഹാജരാക്കുമെന്ന് അന്വേഷണ സംഘം പറഞ്ഞു. ഡല്‍ഹി പൊലീസ് അഫ്‌താബില്‍ നടത്താന്‍ ശ്രമിക്കുന്ന രണ്ടാമത്തെ ശാസ്‌ത്രീയ പരിശോധനയാണ് പോളിഗ്രാഫ്.
അതേസമയം അന്വേഷണ സംഘത്തെ തെറ്റിദ്ധരിപ്പിക്കാന്‍ ശ്രമിക്കുകയാണെന്ന് ആരോപിച്ച് അഫ്‌താബില്‍ നടത്താനിരുന്ന നാര്‍ക്കോ അനാലിസിസ് പരിശോധന തിങ്കളാഴ്‌ച നടത്തിയില്ലെന്നും ഫോറന്‍സിക് സയന്‍സ് ലബോറട്ടറി (എഫ്എസ്എൽ) അസിസ്റ്റന്‍റ് ഡയറക്‌ടര്‍ സഞ്ജീവ് ഗുപ്‌ത പറഞ്ഞു. ഇതിനായി അന്വേഷണ സംഘം നേരത്തെ കോടതിയെ സമീപിച്ചിരുന്നു. അതിന് പിന്നാലെയാണ് പോളിഗ്രാഫ് നടത്തണമെന്ന ആവശ്യവുമായി സംഘം കോടതിയെ സമീപിച്ചിരിക്കുന്നത്.
കോടതിയുടെ അനുമതി ലഭിക്കുകയാണെങ്കില്‍ പ്രതിയെ പോളിഗ്രാഫിക് പരിശോധനയ്ക്ക് വിധേയമാക്കുമെന്നും എഫ്എസ്എൽ അസിസ്റ്റന്‍റ് ഡയറക്‌ടര്‍ കൂടിയായ പുനീത് പുരി പറഞ്ഞു. പ്രതിയെ മെഡിക്കല്‍ പരിശോധനക്ക് വിധേയനാക്കിയതിന് ശേഷം മാത്രമെ നുണ പരിശോധനയ്ക്ക് വിധേയനാക്കുകയുള്ളൂവെന്നും പുനീത് പുരി കൂട്ടിച്ചേർത്തു.
മെയ്‌ 18നാണ് ഡല്‍ഹിയില്‍ വച്ച് ശ്രദ്ധ വാക്കര്‍ കൊല്ലപ്പെട്ടത്. സംഭവത്തിന് ശേഷം 35 കഷണങ്ങളായി വെട്ടിമുറിച്ച് ഡല്‍ഹിയിലെ വിവിധ ഇടങ്ങളില്‍ ഉപേക്ഷിക്കുകയും ചെയ്‌തു. മംബൈയിലെ കോള്‍ സെന്‍ററില്‍ ജോലി ചെയ്യുന്നതിനിടെയാണ് ഡേറ്റിങ് ആപ്ലിക്കേഷനായ ബംബിളിലൂടെ അഫ്‌താബ് അമിന്‍ പൂനാവാല ശ്രദ്ധയെ പരിചയപ്പെടുന്നത്. തുടര്‍ന്ന് പ്രണയത്തിലായ ഇരുവരും കുടുംബത്തോട് വിവരം അറിയിച്ചെങ്കിലും അവര്‍ ഈ ബന്ധത്തെ എതിര്‍ത്തു.
ഇതോടെ ഇരുവരും ഡല്‍ഹിയിലേക്ക് മാറി താമസിച്ചു. ഇതിനിടെയാണ് വിവാഹത്തെ ചൊല്ലി ഇരുവരും തമ്മില്‍ തര്‍ക്കം ഉണ്ടാകുന്നത്. ഇതാണ് പിന്നീട് കൊലപാതകത്തില്‍ കലാശിച്ചത്. കൊലപാതകത്തിന് ശേഷം ദിവസങ്ങള്‍ പിന്നിട്ടപ്പോഴാണ് വിവരം പുറം ലോകം അറിയുന്നത്.
അതിന് കാരണമായത് മകളുടെ സുഖവിവരം അന്വേഷിച്ചുള്ള പിതാവിന്‍റെ ഫോണ്‍ കോളായിരുന്നു. മകളുമായുള്ള ബന്ധം ഉപേക്ഷിച്ചെന്ന് അഫ്‌താബ് പറഞ്ഞതോടെ സംശയം തോന്നിയ പിതാവ് മകളെ ബന്ധപ്പെടാന്‍ ശ്രമിച്ചിട്ട് കഴിയാതായി. ഇതോടെ പിതാവ് പൊലീസില്‍ പരാതി നല്‍കുകയായിരുന്നു. പരാതിയുടെ അടിസ്ഥാനത്തില്‍ അന്വേഷണം നടത്തിയപ്പോഴാണ് ഞെട്ടിക്കുന്ന വിവരങ്ങള്‍ പുറത്തറിഞ്ഞത്. തുടര്‍ന്ന് നവംബര്‍ 14നാണ് അഫ്‌താബ് പൊലീസ് പിടിയിലായത്.
also read: ശ്രദ്ധ വധം : അഫ്‌താബിനെ നാർക്കോ ടെസ്റ്റിന് വിധേയമാക്കാന്‍ പൊലീസ്
