കോട്ടയം : എകെജി സെന്‍റർ ആക്രമിച്ചതില്‍ പ്രതിഷേധിച്ച് ഡിവൈഎഫ്ഐ നടത്തിയ പ്രകടനത്തിനിടെ കോട്ടയം ഡിസിസി ഓഫീസിന് നേരെ ആക്രമണം. വ്യാഴാഴ്‌ച (30.06.2022) രാത്രിയിൽ പ്രകടനവുമായി എത്തിയ സംഘം കല്ലുകളും, തീപന്തങ്ങളും ഡിസിസി ഓഫീസിലേക്ക് വലിച്ചെറിയുന്ന ദൃശ്യം പുറത്ത് വന്നു.
അക്രമിയെ കാണിച്ചുതരാമെന്ന് കോൺഗ്രസ്: ഡിസിസി ഓഫീസിലേക്ക് തീപ്പന്തം വലിച്ചെറിഞ്ഞത് കഴിഞ്ഞ ദിവസം ടൗണിൽ പ്രകടനത്തിനിടെ യൂത്ത് കോൺഗ്രസ് പ്രവർത്തകർക്കെതിരെ ആക്രമണം അഴിച്ചുവിട്ട ഡിവൈഎഫ്ഐ പ്രവർത്തകനാണെന്ന് യൂത്ത് കോൺഗ്രസ് ആരോപിച്ചു. ഡിസിസി ഓഫീസിന് കാവൽ നിന്ന പൊലീസ് സംഘത്തെ പോലും വകവെക്കാതെയാണ് ഡിവൈഎഫ്ഐ സംഘം ആക്രമണം നടത്തിയതെന്നാണ് ആരോപണം. ദൃശ്യങ്ങളിൽ ഇയാളെ വ്യക്തമായി തിരിച്ചറിയാനാകും എന്നും പറയുന്നു.
തിരുവഞ്ചൂർ രാധാകൃഷ്‌ണന്‍റെ പ്രതികരണം; കോട്ടയം ഡിസിസിക്ക് നേരേ കല്ലെറിഞ്ഞത് പൊലീസ് സംരക്ഷണയിലെന്ന് തിരുവഞ്ചൂർ രാധാകൃഷ്‌ണൻ എംഎല്‍എ ആരോപിച്ചു. പൊലീസിന് അക്രമികളെ കണ്ടെത്താൻ കഴിയില്ലെങ്കിൽ പ്രതികളുടെ വിഷ്വൽ നൽകാം. നാല് പൊലീസുകാരെ കാവൽ നിർത്തിയതല്ലാതെ ഇതുവരെ പ്രതികളെ പിടികൂടാൻ കഴിഞ്ഞില്ല.
എറിയാൻ കരുതിക്കൂട്ടിയാണ് കല്ലുകൾ കൊണ്ടുവന്നത്. തീപ്പന്തം കൊളുത്തിയാണ് അവർ എത്തിയത്. സംഭവത്തിൽ പ്രതിഷേധിച്ച് ഗാന്ധി പ്രതിമക്ക് മുന്നിൽ കോൺഗ്രസ് പ്രവർത്തകർ സത്യാഗ്രഹം ഇരിക്കുമെന്നും തിരുവഞ്ചൂർ പറഞ്ഞു.
