തിരുവനന്തപുരം: ലിഫ്റ്റില്‍ തലകുടുങ്ങി സാനിറ്ററി കടയിലെ ജീവനക്കാരന് മരിച്ചു. നേമം സ്വദേശി സതീഷ് ആണ് മരിച്ചത്. തിരുവനന്തപുരം അമ്പലമുക്കിലെ സാനിറ്ററി ഉൽപ്പന്നങ്ങള്‍ വില്‍ക്കുന്ന എസ്‌കെപി ഷോറൂമിലെ കാര്‍ഗോ ലീഫ്റ്റില്‍ ഫ്രയിമുകള്‍ക്ക് ഇടയിൽ പെട്ടാണ് അപകടം ഉണ്ടായത്.
രാവിലെ പതിനൊന്നരയോടെയാണ് അത്യന്തം ദാരുണമായ സംഭവം നടന്നത്. 18 വര്‍ഷത്തോളമായി ഈ കടയിലെ ജീവനക്കാരനാണ് സതീഷ്. സതീഷും മറ്റൊരു ജീവനക്കാരനും ചേര്‍ന്നാണ് രാവിലെ ഷോറൂമിലെ മൂന്നാം നിലയില്‍ ചരക്ക് നീക്കിയിരുന്നത്. കടയില്‍ തിരക്കായപ്പോള്‍ കൂടെയുണ്ടായിരുന്നയാള്‍ താഴത്തെ നിലയിലേക്ക് പോയി. പിന്നീട് സതീഷിനെ അന്വേഷിച്ചെത്തിയ ജീവനക്കാരാണ് ഓപ്പണ്‍ ലിഫ്റ്റിലെ ഫ്രെയിമുകള്‍ക്കിടയില്‍ തല കുടുങ്ങിയ നിലയില്‍ സതീഷിനെ കണ്ടത്.
ഫയര്‍ഫോഴ്‌സെത്തി ഏറെ പണിപ്പെട്ടാണ് സതീഷിനെ പുറത്തെടുത്തത്. പുറത്തെടുക്കും മുൻപേ ജീവന്‍ നഷ്‌ടപ്പെട്ടിരുന്നു. എങ്ങനെയാണ് അപകടം ഉണ്ടായതെന്ന് വ്യക്തമായിട്ടില്ല. ലിഫ്റ്റിന് തകരാറില്ലെന്നാണ് കടയിലെ മറ്റ് ജീവനക്കാര്‍ പറയുന്നത്. ലിഫ്റ്റില്‍നിന്നും താഴത്തെ നിലയിലേക്ക് നോക്കുന്നതിനിടെയാകാം അപകടമുണ്ടായതെന്നാണ് സംശയം.
ശാരീരിക ബുദ്ധിമുട്ടുകളുള്ളതിനാല്‍ സതീശിനെ ഭാരപ്പെട്ട ജോലികളൊന്നും ഏല്‍പ്പിച്ചിരുന്നില്ലെന്ന് കടയിലെ ജീവനക്കാര്‍ പറഞ്ഞു. പേരൂര്‍ക്കട പൊലീസ് അസ്വഭാവിക മരണത്തിന് കേസെടുത്ത് അന്വേഷണം തുടങ്ങി. സതീഷിന് ഭാര്യയും ഒരു മകളുമാണുള്ളത്.
