തിരുവനന്തപുരം: കഴിഞ്ഞ ദിവസം ചിറയിൻകീഴ് പുളിമൂട് ജംഗ്ഷനിൽ ഉണ്ടായ അപകടത്തിന്‍റെ ദൃശ്യങ്ങള്‍ പുറത്ത്. ഹമ്പിൽ കയറി ഇറങ്ങുമ്പോൾ പിന്നാലെ എത്തിയ കാര്‍ സ്‌കൂട്ടറില്‍ ഇടിക്കുകയായിരുന്നു. ഇടിയുടെ ആഘാതത്തില്‍ സ്‌കൂട്ടര്‍ യാത്രക്കാരായ പിതാവും മകളും കാറിന്‍റെ ബോണറ്റിന് മുകളിലേക്ക് വീഴുന്നതും തുടര്‍ന്ന് റോഡിലേക്ക് വീണ ഇരുവരുടെയും കാലിലൂടെ കാറിന്‍റെ മുന്‍ ചക്രം കയറിയിറങ്ങുന്നതും ദൃശ്യത്തില്‍ കാണാം.
ആറ്റിങ്ങലിൽ നിന്നും മുടപുരo ശിവ കൃഷ്‌ണപുരത്തേയ്ക്ക് പോകുകയായിരുന്ന ദിലീപും മകൾ ദേവു ദിലീപും സഞ്ചരിച്ച സ്‌കൂട്ടറാണ് അപകടത്തില്‍ പെട്ടത്. അപകടത്തില്‍ സാരമായി പരിക്കേറ്റ ഇവരെ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. സംഭവത്തില്‍ കാർ ഡ്രൈവര്‍ ചിറയിൻകീഴ് സ്വദേശിയായ മുരുകനെ നാട്ടുകാർ തടഞ്ഞു വച്ച് ചിറയിൻകീഴ് പൊലീസിന് കൈമാറി.
ഇയാൾ അമിതമായി മദ്യപിച്ചിരുന്നതായും കേസ് രജിസ്റ്റർ ചെയ്‌തതായും പൊലീസ് അറിയിച്ചു. റിട്ട. കെ എസ് ആർ ടി സി ജീവനക്കാരനാണ് പരിക്കേറ്റ ദിലീപ്.
