കണ്ണൂര്‍: പാനൂരില്‍ വിഷ്‌ണു പ്രിയ എന്ന യുവതിയെ കഴുത്തറുത്ത് കൊലപ്പെടുത്തിയ കേസില്‍ പ്രതി ശ്യാംജിത്ത് പൊലീസ് കസ്റ്റഡിയിൽ. അടുത്ത ബന്ധുവിന്‍റെ മരണത്തെ തുടർന്ന് കുടുംബവീട്ടിലായിരുന്ന പെൺകുട്ടി വസ്‌ത്രം മാറാൻ പോയപ്പോഴായിരുന്നു കൊലപാതകം. പ്രതി എത്തിയപ്പോള്‍ വിഷ്‌ണുപ്രിയ മാത്രമായിരുന്നു വീടിനുള്ളിൽ ഉണ്ടായിരുന്നത് എന്നാണ് സൂചന.
കുടുംബാംഗങ്ങളും അയൽക്കാരുമെല്ലാം മരണവീട്ടിലായതിനാൽ വിഷ്‌ണുപ്രിയ ആക്രമിക്കപ്പെട്ടപ്പോൾ സംഭവം ആരും അറിഞ്ഞില്ല. വസ്‌ത്രം മാറാൻ വീട്ടിൽ പോയ വിഷ്‌ണുപ്രിയ തിരികെ വരാൻ വൈകിയതോടെയാണ് ആദ്യ മരണം നടന്ന കുടുംബ വീട്ടിൽ നിന്ന് ബന്ധുക്കൾ യുവതിയെ തെരഞ്ഞിറങ്ങുന്നത്. ഇവർ വീട്ടിലെത്തിയപ്പോഴായിരുന്നു കഴുത്തറുത്ത് രക്തം വാർന്ന നിലയിൽ വിഷ്‌ണുപ്രിയയുടെ മൃതദേഹം കണ്ടെത്തിയത്.
ശരീരത്തിൽ കഴുത്തിലും കൈക്കും മാരകമായ മുറിവുകൾ ഉണ്ട്. സംഭവം പ്രണയപ്പകയാണെന്നാണ് വിവരം. അതേസമയം കൊലപാതകിയെ കുറിച്ച് വിവരം ലഭിച്ചതായി സിറ്റി പൊലീസ് കമ്മിഷണർ ആർ ഇളങ്കോ വ്യക്തമാക്കി.
മുഖംമൂടി ധരിച്ച ഒരാളെ കണ്ടതായി സമീപവാസി പൊലീസിന് മൊഴി നൽകിയതോടെ പൊലീസ് അന്വേഷണം ഊർജിതമാക്കുകയായിരുന്നു. സംഭവത്തിൽ കൂത്തുപറമ്പ് മാനന്തേരി സ്വദേശി ശ്യാംജിത്തിനെ പൊലീസ് കസ്റ്റഡിയിൽ എടുത്തു. ഇക്കാര്യം പൊലീസ് സ്ഥിരീകരിച്ചിട്ടില്ല.
വിഷ്‌ണുപ്രിയയുടെ പിതാവ് വിനോദ് ഖത്തറിലാണ്. കുറച്ച് ദിവസം മുമ്പാണ് അവധിക്ക് നാട്ടിൽ വന്ന ഇദ്ദേഹം ഖത്തറിലേക്ക് തിരികെ പോയത്.
