തിരുവനന്തപുരം: ഉപതെരഞ്ഞെടുപ്പ് പ്രഖ്യാപിച്ച വട്ടിയൂർക്കാവ് നിയോജക മണ്ഡലത്തിൽ 36 പ്രശ്നബാധിത ബൂത്തുകൾ. ഇവിടെ 48 പോളിങ് സ്റ്റേഷനുകളിലായി 168 ബൂത്തുകളാണുള്ളത്. പരാതി ഉന്നയിക്കപ്പെടുന്ന ബൂത്തുകളില്‍ വരണാധികാരി നേരിട്ടെത്തി സുരക്ഷാ ക്രമീകരണങ്ങൾ വിലയിരുത്തും. ലാൻഡ് റവന്യു കമ്മിഷണറേറ്റിലെ ദുരന്തനിവാരണ വിഭാഗം അസിസ്റ്റന്‍റ് കമ്മിഷണർ മനോജാണ് വരണാധികാരി.
തെരഞ്ഞെടുപ്പ് പെരുമാറ്റച്ചാറ്റച്ചട്ടം ജില്ലയിൽ വട്ടിയൂർക്കാവ് നിയോജക മണ്ഡലത്തിൽ മാത്രമായിരിക്കും ബാധകമാവുകയെന്ന് ജില്ലാ കലക്ടർ കെ. ഗോപാലകൃഷ്ണൻ അറിയിച്ചു. പെരുമാറ്റച്ചട്ടം നിലവിൽ വന്നതോടെ നിരീക്ഷണ സ്ക്വാഡും പ്രവർത്തനം തുടങ്ങിയതായി കലക്ടർ പറഞ്ഞു. പരാതികൾ നാളെ വൈകിട്ടു മുതൽ സ്വീകരിക്കും.
വട്ടിയൂർക്കാവിൽ 1,95,601 വോട്ടർമാരാണുള്ളത്. ഇതില്‍ 1, 02,252 പേർ സ്‌ത്രീ വോട്ടര്‍മാരും 93,347 പുരുഷ വോട്ടര്‍മാരും രണ്ട് ട്രാൻസ് ജൻഡര്‍ വോട്ടര്‍മാരും 375 സർവ്വീസ് വോട്ടർമാരുമാണ്.
നാമനിർദ്ദേശ പത്രിക സമർപ്പിക്കാനുള്ള ആദ്യ ദിവസമായ ഇന്ന് ആരും പത്രിക സമർപ്പിച്ചിട്ടില്ല. 30 വരെ പത്രിക സമർപ്പിക്കാം. ഒക്ടോബർ ഒന്നിനാണ് സൂക്ഷ്മ പരിശോധന. മൂന്നിനകം പത്രിക പിൻവലിക്കാം. വട്ടിയൂർക്കാവ് അടക്കം സംസ്ഥാനത്തെ അഞ്ച് നിയോജക മണ്ഡലങ്ങളിൽ വോട്ടെടുപ്പ് 21 ന് നടക്കും. 24 നാണ് വോട്ടെണ്ണൽ.
