ദുർഗന്ധം പേറി അമ്പതോളം കുടുംബങ്ങൾ; മാലിന്യം നീക്കാൻ തയ്യാറാകാതെ നഗരസഭ

തമ്പാനൂരിലെ അമ്പതോളം കുടുംബങ്ങളാണ് നഗരസഭയുടെ അവഗണനമൂലം രണ്ടുവർഷമായി ദുരിതമനുഭവിക്കുന്നത്. മഴക്കാലം കൂടി എത്തുന്നതോടെ എന്തുചെയ്യണമെന്നറിയാതെ ആശങ്കയിലാണിവർ.

തിരുവനന്തപുരം :മാലിന്യത്തിൽ നിന്നുള്ള ദുർഗന്ധം പേറി നരക ജീവിതം നയിക്കുകയാണ് തമ്പാനൂരിലെ അൻപതോളം കുടുംബങ്ങൾ. ആമയിഴഞ്ചൻ തോടിൻ്റെ ചെങ്കൽചൂള മുതൽ തമ്പാനൂർ ജുമാ മസ്ജിദ് വരെയുള്ള വശങ്ങളിൽ താമസിക്കുന്നവരാണ് ദുരിതമനുഭവിക്കുന്നത്. മാലിന്യം നീക്കാനോ തോടിന്‍റെ ഒഴുക്ക് പുനസ്ഥാപിക്കാനോ നഗരസഭ തയ്യാറാകാത്തതാണ് ഈ അവസ്ഥയ്ക്ക് കാരണം.

വാർഡ് കൗൺസിലർ മുതൽ സ്ഥലം എംഎൽഎ വരെയുള്ള എല്ലാവരോടും പലവട്ടം ആവശ്യപ്പെട്ടിട്ടും ആരും ഇതുവരെ തിരിഞ്ഞുനോക്കിയില്ലെന്നും ഇവർ പറയുന്നു.

സമീപത്തുള്ള ഹോട്ടലുകളുള്‍പ്പടെയുളള സ്ഥാപനങ്ങളിൽ നിന്നും തോട്ടിലേക്ക് തള്ളുന്ന മാലിന്യങ്ങൾ ഒഴുക്കു നിലച്ചതോടെ കെട്ടിക്കിടക്കുകയാണ്. ഇവയിൽനിന്നുള്ള ദുർഗന്ധവും കൊതുകും ഇവരുടെ ജീവിതം ദുരിതപൂർണ്ണമാക്കുകയാണ്. കഴിഞ്ഞ യുഡിഎഫ് സർക്കാരിൻ്റെ കാലത്ത് നഗരത്തിലെ വെള്ളക്കെട്ട് ഒഴിവാക്കുന്നതിനായി നടത്തിയ ഓപ്പറേഷൻ അനന്ത പാതിവഴിയിൽ നിലച്ചതും പ്രശ്നങ്ങൾ കൂടുതൽ സങ്കീർണമാക്കി. മഴക്കാലം കൂടി എത്തുന്നതോടെ എന്തുചെയ്യണമെന്നറിയാതെ ആശങ്കയിലാണ് ഇവർ.