തിരുവനന്തപുരം: ജീവനക്കാർക്ക് ശമ്പളം നൽകുന്നതിനല്ല പൊതുഗതാഗത സൗകര്യമൊരുക്കുന്നതിനാണ് പ്രഥമ പരിഗണനയെന്ന് കെഎസ്ആർടിസി ഹൈക്കോടതിയിൽ നൽകിയ സത്യവാങ്മൂലത്തിനെതിരെ ബിഎംഎസ്. വിശപ്പിന് വില നൽകുന്ന സർക്കാരല്ല കേരളം ഭരിക്കുന്നതെന്നും പൊതുഗതാഗതത്തെ തകർക്കാനാണ് സർക്കാർ ശ്രമമെന്നും കെഎസ്‌ആർടി എംപ്ലോയിസ് സംഘ് (ബിഎംഎസ്) ജനറൽ സെക്രട്ടറി കെഎൽ രാജേഷ് പറഞ്ഞു.
സെക്രട്ടേറിയറ്റിന് മുന്നിൽ ബിഎംഎസിന്‍റെ ശമ്പള സമരം: എല്ലാ മാസവും സമരം ചെയ്യാൻ തൊഴിലാളികൾക്ക് കഴിയില്ലെന്നും പ്രശ്‌നത്തിന് ശാശ്വത പരിഹാരം കാണാൻ കെഎസ്ആർടിസിയെ സർക്കാർ ഏറ്റെടുക്കണമെന്നും ബിഎംഎസ് ആവശ്യപ്പെട്ടു. 193 കോടി രൂപ വരുമാനമുണ്ടാക്കിയ സ്ഥാപനത്തിൽ തൊഴിലാളിക്ക് ശമ്പളം നൽകാനുള്ള മര്യാദ സർക്കാർ കാണിക്കണം. ജോലി ചെയ്യുന്നവർക്ക് ശമ്പളം നിഷേധിക്കുന്നത് ഗുണ്ടായിസവും ക്രിമിനൽ പ്രവർത്തിയുമാണെന്ന് ബിഎംഎസ് പറഞ്ഞു.
സിഐടിയുവിന് ആത്മാർഥതയില്ല: സിഐടിയു ചെയ്യുന്നത് കരിങ്കാലിപ്പണിയാണെന്നും ബിഎംഎസ് ആരോപിച്ചു. സിഐടിയു സമരത്തിന് ആത്മാർഥതയില്ല. കഴിഞ്ഞ മാസം നടന്ന ശമ്പള സമരത്തെ സിഐടിയു ഒറ്റുകൊടുത്തു. തൊഴിലാളികളുടെ വിശപ്പ് സിഐടിയുവിന് പ്രശ്‌നമല്ല. അതുകൊണ്ടാണ് യോജിച്ചുള്ള പ്രക്ഷോഭം നടക്കാത്തത്.
സിഐടിയു തൊഴിലാളികളെ പൂർണമായും ചതിക്കുകയായിരുന്നു. ശമ്പളം കിട്ടാത്ത തൊഴിലാളികൾ സമരം ചെയ്യുന്ന ട്രാൻസ്പോർട്ട് ഭവനു മുന്നിലല്ല സിഐടിയു സമരം ചെയ്യേണ്ടത്, സെക്രട്ടേറിയറ്റിനു മുന്നിലാണ്. ആത്മാർഥതയുണ്ടെങ്കിൽ പണിയെടുക്കുന്ന തൊഴിലാളികൾക്ക് ശമ്പളം നൽകാനും വാക്കു പാലിക്കാനും സർക്കാരിനോട് ആവശ്യപ്പെടുകയാണ് അവർ ചെയ്യേണ്ടതെന്നും കെഎൽ രാജേഷ് പറഞ്ഞു.
സർക്കാർ ഏറ്റെടുക്കണം: കെഎസ്ആർടിസിയുടെ കടബാധ്യതകൾ സർക്കാർ ഏറ്റെടുക്കുമെന്ന് 2016ലെ പ്രകടനപത്രികയിൽ എൽഡിഎഫ് പറഞ്ഞിട്ടുള്ളതാണ്. ഇത് നടപ്പാക്കണം. അങ്ങനെ ചെയ്‌താൽ പ്രതിമാസം 30 കോടി തിരിച്ചടവ് ഒഴിവാകും. മറ്റു പല സംസ്ഥാനങ്ങളും ചെയ്യുന്നതുപോലെ കെആർആർടിസിക്ക് ഡീസലിന് നികുതി ഒഴിവാക്കണം.
പെൻഷൻ ബാധ്യത സർക്കാർ ഏറ്റെടുക്കണം. മാനേജ്മെൻ്റിന് കെടുകാര്യസ്ഥത ഉണ്ടെങ്കിൽ കോർപ്പറേഷൻ സർക്കാർ ഏറ്റെടുക്കണമെന്നും ബിഎംഎസ് ആവശ്യപ്പെട്ടു.
