തിരുവനന്തപുരം കരമനയിൽ അനന്തു എന്ന യുവാവിനെ മർദ്ദിച്ച് കൊലപ്പെടുത്തിയ സംഭവത്തിൽ ഏഴു പേർ കൂടി പിടിയിലായി. ഇതോടെ ഈ കേസിൽ രണ്ടുദിവസത്തിനുള്ളിൽ അറസ്റ്റിലായ പ്രതികളുടെ എണ്ണം പന്ത്രണ്ടായി. ഇതിനിടെ മൂന്നു ദിവസത്തിനിടെ തലസ്ഥാന നഗരത്തിൽ രണ്ടുപേർ കൊലചെയ്യപ്പെട്ട പശ്ചാത്തലത്തിൽ സാമൂഹിക വിരുദ്ധരെയും ലഹരി മാഫിയ സംഘങ്ങളെയും അറസ്റ്റ് ചെയ്യാൻ സിറ്റി പോലീസ് ഊർജ്ജിത ശ്രമമാരംഭിച്ചു.
കരമന സ്വദേശി ആനന്തു എന്ന യുവാവിനെ തട്ടിക്കൊണ്ടുപോയി മർദ്ദിച്ച് കൊലപ്പെടുത്തിയ സംഭവത്തിൽ മുഖ്യപ്രതി ഉൾപ്പെടെ ഏഴുപേരെയാണ് ഇന്ന് അന്വേഷണ സംഘം പിടികൂടിയത്. മുഖ്യപ്രതികളായ വിഷ്ണു, വിനീത്, കൃത്യത്തിൽ പങ്കാളികളായ അനീഷ്, ഹരി, അഖിൽ, കുഞ്ഞുവാവ, ശരത് എന്നിവരാണ് പിടിയിലായത്. ശരത്തിനെ ചെന്നൈയിൽ നിന്നും മറ്റുള്ളവരെ പൂവാറിൽ നിന്നുമാണ് പിടികൂടിയതെന്ന് പോലീസ് അറിയിച്ചു. ഇതോടെ കേസിൽ കൂട്ടുപ്രതിയായ ഉമേഷ് ഒഴികെ മുഴുവൻ പേരെയും അറസ്റ്റ് ചെയ്തു. ഇന്നലെ രാത്രി തിരുവനന്തപുരം ശ്രീവരാഹത്ത് ശ്യാം എന്ന മണിക്കുട്ടനെ കൊലപ്പെടുത്തിയ കേസിലും പൊലീസ് അന്വേഷണം ഊർജ്ജിതമാക്കി. രണ്ടു കേസുകളിലും കൊലപാതകികൾക്ക് മയക്കുമരുന്ന് മാഫിയയുമായി ബന്ധമുണ്ടെന്ന് പൊലീസ് കണ്ടെത്തിയിട്ടുണ്ട്.
കഴിഞ്ഞ ആറുമാസത്തിനിടയിൽ തിരുവനന്തപുരം ജില്ലയിൽ മാത്രം 265 കിലോ കഞ്ചാവാണ് പൊലീസിൻ്റെയും എക്സൈസിൻ്റെയും പരിശോധനകളിൽ പിടികൂടിയത്. മൂന്നു ദിവസത്തിനിടെ രണ്ടുപേർ കൊല്ലപ്പെട്ട പശ്ചാത്തലത്തിൽ സാമൂഹികവിരുദ്ധർക്കും ലഹരിമരുന്നു മാഫിയകൾക്കുമെതിരെ അഡാറ് എന്ന പേരിൽ പരിശോധന കർശനമാക്കുമെന്ന് തിരുവനന്തപുരം സിറ്റി പോലീസ് കമ്മീഷണർ കോറി സഞ്ജയ് ഗുരുദിൻ അറിയിച്ചു. ഇത്തരക്കാരെ അറസ്റ്റ് ചെയ്ത് കരുതൽതടങ്കലിൽ പാർപ്പിക്കും. കഞ്ചാവ് ഉൾപ്പെടെയുള്ള ലഹരിമരുന്ന് വാങ്ങുന്നവരെയും വിൽക്കുന്നവരെയും പിടികൂടും. പൊതുജനങ്ങൾക്ക് ലഹരിമരുന്നു മാഫിയകളെ കുറിച്ചും സാമൂഹിക വിരുദ്ധരെ കുറിച്ചും വിവരം നൽകാൻ 9497975000 എന്ന വാട്സപ്പ് നമ്പരും പോലീസ് ഏർപ്പെടുത്തി.
