തിരുവനന്തപുരം: സിൽവർ ലൈൻ കേരളത്തിന് വേണ്ട പദ്ധതിയാണെന്നും പദ്ധതി സർക്കാർ ഉപേക്ഷിച്ചിട്ടില്ലെന്നും എൽഡിഎഫ് കൺവീനർ ഇ.പി ജയരാജന്‍. വികസനത്തിന്‍റെ വഴി മുടക്കാം എന്ന് ചിലർ ചിന്തിക്കുന്നുണ്ട്. അത് നടക്കില്ല. ജനങ്ങളെ വിശ്വാസത്തിലെടുത്താണ് പദ്ധതി നടപ്പിലാക്കുന്നതെന്നും ഇ.പി ജയരാജന്‍ പറഞ്ഞു.
അതേസമയം കോൺഗ്രസ് ദുർബലമായത് കൊണ്ടാണ് മുന്നണി വിപുലീകരണം അവർ ചർച്ച ചെയ്യുന്നതെന്ന് ഇ.പി ജയരാജന്‍ പറഞ്ഞു. എൽഡിഎഫിനെ പ്രതിരോധിക്കാൻ ശക്തിയില്ലെന്നും വന്ന് സഹായിക്കണം എന്ന് പറയും പോലെയാണ് ചിന്തൻ ശിബിറിലെ നിലപാടെന്നും ഇ.പി പരിഹസിച്ചു.
ബജറ്റിന് പുറത്ത് പണം കണ്ടെത്തിയാണ് കേരളത്തിൽ ഇടതുമുന്നണിയുടെ വികസന നയം നടപ്പാക്കുന്നത്. എന്നാൽ കേന്ദ്രം സാമ്പത്തികമായി കേരളത്തെ ശ്വാസം മുട്ടിക്കുകയാണ്. കിഫ്ബിയെ തകർക്കാൻ ഇഡിയെ കൊണ്ട് ശ്രമിക്കുകയാണെന്നും ജയരാജൻ വ്യക്‌തമാക്കി.
കേന്ദ്ര സർക്കാരിന്‍റെ നയങ്ങൾക്കെതിരെയും വിലക്കയറ്റം, ഇന്ധന വില വർധന, നിത്യോപയോഗ സാധനങ്ങൾക്ക് ചുമത്തിയ ജിഎസ്‌ടി എന്നിവക്കെതിരെയും ഓഗസ്റ്റ് 10ന് രാജ്ഭവൻ ധർണ നടത്തുമെന്നും ജയരാജൻ പറഞ്ഞു.
