തിരുവനന്തപുരം: ഡോളർ കടത്ത് കേസിൽ മുഖ്യമന്ത്രിക്കെതിരായ ആരോപണം ചര്‍ച്ച ചെയ്യാത്തതില്‍ പ്രതിഷേധിച്ച് പ്രതിപക്ഷം സഭ ബഹിഷ്‌കരിച്ചു. തുടര്‍ച്ചയായ രണ്ടാം ദിവസമാണ് പ്രതിപക്ഷം സഭ വിടുന്നത്. പ്രതിപക്ഷത്തിന്‍റെ സഭ ബഹിഷ്‌കരണം മുൻകൂട്ടി നിശ്ചയിച്ചതെന്ന് ഭരണപക്ഷം ആരോപിച്ചു.
സഭ സമ്മേളനം ആരംഭിച്ച് ചോദ്യോത്തരവേള തുടങ്ങുമ്പോൾ തന്നെ പ്രതിഷേധവുമായി പ്രതിപക്ഷം രംഗത്ത് വന്നു. ഡോളർ കടത്ത് കേസിൽ ആരോപണ വിധേയനായ മുഖ്യമന്ത്രി രാജി വയ്ക്കണമെന്നാവശ്യപ്പെട്ട ബാനറുമായാണ് പ്രതിപക്ഷം സഭയിലെത്തിയത്.
വിഷയം ഉന്നയിച്ച് ഇന്നലെ സഭയിൽ നൽകിയ അടിയന്തര പ്രമേയത്തിന് നോട്ടീസ് അനുവദിക്കാത്ത സ്‌പീക്കറുടെ നടപടി ചരിത്രത്തെ തിരുത്തുന്നതാണെന്ന് പ്രതിപക്ഷ നേതാവ് വി.ഡി സതീശന്‍ പറഞ്ഞു. കോടതി വിധി വരുന്നതുവരെ ഒരു വിഷയവും ചർച്ച ചെയ്യാൻ കഴിയാത്ത അവസ്ഥ ആക്കുകയാണ്. ആരോപണം ഉയരുമ്പോൾ മറുപടി പറയാതെ മുഖ്യമന്ത്രി മൗനം പാലിക്കുന്നത് ജനങ്ങൾക്കിടയിൽ സംശയമുണ്ടാക്കുമെന്നും വി.ഡി സതീശന്‍ കുറ്റപ്പെടുത്തി.
കഴിഞ്ഞ ദിവസങ്ങളിൽ നടപടിക്രമങ്ങൾ അവസാനിച്ച വിഷയമാണെന്നും ചോദ്യോത്തരവേളയുമായി മുന്നോട്ടു പോകുകയാണെന്നും സ്‌പീക്കർ വ്യക്തമാക്കി. തുടര്‍ന്ന് പട്ടികജാതി പട്ടികവർഗ പിന്നാക്ക വിഭാഗ ക്ഷേമ വകുപ്പ് മന്ത്രി കെ രാധാകൃഷ്‌ണന്‍ ചോദ്യങ്ങൾക്ക് മറുപടി നൽകി. പ്രതിപക്ഷം മുദ്രാവാക്യം വിളിയുമായി സഭയ്ക്കുള്ളിൽ പ്രതിഷേധം തുടർന്നു. ചോദ്യോത്തരവേള പുരരോഗമിക്കവേയാണ് സർക്കാർ നിഷേധാത്മകമായ നിലപാടിൽ പ്രതിഷേധിച്ച് ഇന്നത്തെ സഭ നടപടികൾ ബഹിഷ്കരിക്കുന്നതായി പ്രതിപക്ഷനേതാവ് പ്രഖ്യാപിച്ചത്.
മുൻകൂട്ടി നിശ്ചയിച്ചാണ് പ്രതിപക്ഷം സഭ ബഹിഷ്‌ക്കരിക്കുന്നതെന്ന് ധനമന്ത്രി കെ.എന്‍ ബാലഗോപാൽ ആരോപിച്ചു. ഒരു സബ്‌മിഷന് പോലും പ്രതിപക്ഷം ഇന്ന് നോട്ടീസ് നൽകിയിട്ടില്ലെന്നും ധനമന്ത്രി പറഞ്ഞു.
Read more: 'പിണറായിക്കും ഉമ്മൻചാണ്ടിക്കും ഇരട്ട നീതി'? 'സമാന്തര നിയമസഭ'യില്‍ മുഖ്യമന്ത്രിക്ക് രൂക്ഷ വിമര്‍ശനം
