തിരുവനന്തപുരം: ഗവര്‍ണര്‍ ആരിഫ് മുഹമ്മദ് ഖാനെതിരെ വിമര്‍ശനവുമായി സിപിഎം. കണ്ണൂര്‍ സര്‍വകലാശാല വിസിയെ ക്രിമിനല്‍ എന്ന് വിളിച്ച ഗവര്‍ണറുടെ നടപടി അങ്ങേയറ്റം പ്രതിഷേധാര്‍ഹമാണെന്നും എന്ത് ക്രിമിനല്‍ കുറ്റമാണ് വിസി ചെയ്‌തതെന്ന് ഗവര്‍ണര്‍ പറയണമെന്നും സിപിഎം സംസ്ഥാന സെക്രട്ടേറിയറ്റ് പ്രസ്‌താവനയിൽ പറഞ്ഞു.
വിസിയുടെ നടപടികളില്‍ നിയമപരമായും മാന്യമായും മറുപടി പറയുന്നതിന് പകരം സ്ഥാനത്തിന് നിരക്കാത്ത രീതിയിലാണ് ഗവര്‍ണര്‍ പ്രതികരിക്കുന്നത്. ആര്‍എസ്‌എസുകാരെ ജീവനക്കാരാക്കി സര്‍ക്കാറിനെതിരായ ഉപജാപങ്ങളുടെ കേന്ദ്രമാക്കി രാജ്ഭവനെ മാറ്റിയിരിക്കുകയാണ്. രാജ്‌ഭവന്‍ ആര്എസ്എസ് ശാഖയുടെ നിലവാരത്തിലേക്ക് അധപതിച്ചിരിക്കുന്നുവെന്നും സിപിഎം ആരോപിച്ചു.
തെറ്റുണ്ടെങ്കില്‍ ചൂണ്ടിക്കാട്ടുന്നതിന് പകരം അനാവശ്യമായ രാഷ്‌ട്രീയ ഇടപെടലുകള്‍ ആരെ തൃപ്‌തിപ്പെടുത്താനാണ് നടത്തുന്നതെന്ന് ഗവര്‍ണര്‍ വ്യക്തമാക്കണം. രാഷ്‌ട്രപതി, ഉപരാഷ്‌ട്രപതി തെരഞ്ഞെടുപ്പിന് മുമ്പ് ബോധപൂര്‍വം പ്രകോപനപരമായ ഇടപെടലും പ്രസ്‌താവനകളും നടത്തിയിരുന്നു. ഇത് എന്ത് ഉദ്ദേശത്തിലായിരുന്നുവെന്ന് വ്യക്തമാക്കേണ്ടതുണ്ടെന്നും സിപിഎം ആവശ്യപ്പെട്ടു.
ALSO READ: കണ്ണൂർ വിസി 'ക്രിമിനൽ', തന്നെ കായികമായി നേരിടാൻ ഒത്താശ ചെയ്‌തു; ഗുരുതര ആരോപണവുമായി ഗവർണർ
ഉന്നത വിദ്യാഭ്യാസ മേഖലയിലെ ഗുണപരമായ മാറ്റങ്ങള്‍ ഉള്‍ക്കൊള്ളാന്‍ കഴിയാത്തതിലുള്ള ഗവര്‍ണറുടെ വിഷമം എല്ലാവര്‍ക്കും മനസിലാകും. ഈ നിലപാട് ദൗര്‍ഭാഗ്യകരമാണെന്നും സിപിഎം കുറ്റപ്പെടുത്തി.
നേരത്തെ ചാന്‍സലര്‍ സ്ഥാനം ഒഴിയുമെന്ന് പ്രസ്‌താവനയ്‌ക്ക്‌ പിന്നാലെ ചര്‍ച്ചയ തയാറാണെന്നാണ് സര്‍ക്കാര്‍ നിലപാടെടുത്തത്. എന്നാല്‍ ഇതിന് ഗവര്‍ണര്‍ അര്‍ഹനല്ലെന്ന് പ്രസ്‌താവനകളിലൂടെ ഇപ്പോള്‍ തെളിയിക്കുകയാണെന്നും സിപിഎം പ്രസ്‌താവനയിലൂടെ വ്യക്തമാക്കി.
