പാലക്കാട്: വാളയാറില്‍ പ്രായപൂർത്തിയാകാത്ത സഹോദരിമാർ തൂങ്ങി മരിച്ച സംഭവത്തില്‍ പ്രതിചേര്‍ക്കപ്പെട്ട മൂന്ന് പേരെ വെറുതെ വിട്ടു. പാലക്കാട് പോക്സോ കോടതിയുടേതാണ് വിധി. രണ്ട് പെൺകുട്ടികളും ലൈംഗിക ചൂഷണത്തിന് വിധേയമായിരുന്നതായി പോസ്‌റ്റ്‌മോര്‍ട്ടത്തില്‍ കണ്ടെത്തിയിരുന്നു. എന്നാല്‍ കേസ് കോടതിയില്‍ തെളിയിക്കുന്നതില്‍ പ്രോസിക്യൂഷന്‍ പരാജയപ്പെട്ടു. അട്ടപ്പള്ളം കല്ലങ്കാട് സ്വദേശി വലിയ മധു, രണ്ടാം പ്രതി ഇടുക്കി രാജക്കാട് വലിയ മുല്ലക്കാനം നാലുതെയ്ക്കൽ വീട്ടിൽ ഷിബു. മൂന്നാം പ്രതി എം. മധു എന്നിവരെയാണ് കോടതി വെറുതേ വിട്ടത്. കേസിലെ മറ്റൊരു പ്രതി പ്രദീപ് കുമാറിനെ നേരത്തെ വിട്ടയച്ചിരുന്നു.
കേസില്‍ പ്രതികളെ വെറുതെ വിടുമെന്ന് പ്രതീക്ഷിച്ചിരുന്നില്ലെന്ന് പെൺകുട്ടികളുടെ അമ്മ പറഞ്ഞു. അന്വേഷണ സംഘം പറഞ്ഞു പറ്റിക്കുകയായിരുന്നെന്നും കോടതിയിൽ എല്ലാ കാര്യങ്ങളും പറഞ്ഞിരുന്നുവെന്നും പെണ്‍കുട്ടികളുടെ അമ്മ കൂട്ടിച്ചേര്‍ത്തു. പൊലീസ് അന്വേഷണത്തിലെ വീഴ്‌ചയാണ് ഇത്തരത്തിലൊരു വിധി വരാൻ കാരണം. മൂത്ത കുട്ടിയെ പീഡിപ്പിക്കുന്നത് നേരിട്ട് കണ്ടുവെന്ന് പറഞ്ഞിട്ടും നടപടിയെടുക്കാൻ ഉദ്യോഗസ്ഥർ തയ്യാറായില്ലെന്നും വിധി വന്നതു പോലും വൈകിയാണ് അറിഞ്ഞതെന്നും പെൺകുട്ടികളുടെ അമ്മ പ്രതികരിച്ചു.
2017 ജനുവരിയിലും മാര്‍ച്ചിലുമാണ് കേസിനാസ്‌പദമായ സംഭവം നടന്നത്. പന്ത്രണ്ടും എട്ടും വയസായ സഹോദരിമാരെ 52 ദിവസത്തെ ഇടവേളയിൽ വാളയാർ അട്ടപ്പള്ളത്തെ വീട്ടിനുള്ളിൽ ദുരൂഹ സാഹചര്യത്തിൽ തൂങ്ങിമരിച്ച നിലയിൽ കണ്ടെത്തുകയായിരുന്നു. ആദ്യ മരണം നടന്നപ്പോള്‍ കേസ് എടുക്കാന്‍ അലംഭാവം കാണിച്ചതിനെ തുടര്‍ന്ന് വാളയാര്‍ എസ്.ഐയെ സ്ഥലം മാറ്റി. മൂന്ന് മാസത്തിനുള്ളില്‍ സഹോദരി കൂടി സമാനമായ സാഹചര്യത്തില്‍ മരിച്ചപ്പോള്‍ കടുത്ത പ്രതിഷേധം ഉണ്ടായതിനെ തുടർന്ന് അന്വേഷണം പുതിയ സംഘത്തെ ഏല്‍പ്പിച്ചിരുന്നു.
