പാലക്കാട് ജില്ലയിലെ ചിറ്റൂർ, നെന്മാറ, തരൂർ, ആലത്തൂർ നിയമസഭാ മണ്ഡലങ്ങളും തൃശ്ശൂർ ജില്ലയിലെ ചേലക്കര, കുന്നംകുളം, വടക്കാഞ്ചേരി നിയമസഭാ മണ്ഡലങ്ങളും ചേർന്നതാണ് ആലത്തൂർ ലോകസഭാ നിയോജകമണ്ഡലം. 2008-ലെ മണ്ഡലം പുനഃക്രമീകരണത്തിലൂടെയാണ് ആലത്തൂർ ലോക്സഭാ മണ്ഡലം രൂപം കൊള്ളുന്നത്.
പിറവികൊണ്ട കാലം മുതൽ ഇടത്തിനോടാണ് മണ്ഡലം കൂറ് പുലർത്തുന്നത്. എൽഡിഎഫിന്റെ ശകതമായ കോട്ടയായും ആലത്തൂർ വിശേഷിപ്പിക്കപ്പെടുന്നു. മണ്ഡലത്തിൽ ഉൾപ്പെട്ട ഏഴ് നിയമസഭാ മണ്ഡലങ്ങളില്‍ ആറെണ്ണം എൽഡിഎഫിനൊപ്പം നില്‍ക്കുമ്പോൾ വടക്കാഞ്ചേരി മാത്രമാണ് യുഡിഎഫിന്‍റെ കൈവശമുളത്.
കർഷകരും, തൊഴിലാളികളും , കച്ചവടക്കാരും ഭൂരിഭാഗമുള്ള മണ്ഡലത്തിൽ കഴിഞ്ഞ തവണ 21,417 വോട്ടുകൾ നോട്ടക്ക് ലഭിച്ചു എന്നതും ശ്രദ്ധേയമായ കണക്കാണ്. കഴിഞ്ഞ ലോക്സഭാ തെരഞ്ഞെടുപ്പിൽ 76.24 ശതമാനം, വോട്ടു രേഖപ്പെടുത്തിയ ആലത്തൂർ മണ്ഡലത്തിൽ 411808 (44.34%). വോട്ടകളാണ് എൽഡിഎഫ് നേടിയത്. രണ്ടാം സ്ഥാനത്തെയ്ക്ക് തള്ളപ്പെട്ട യുഡിഎഫ് 374496 (40.33 %) വോട്ടുകളും മൂന്നാം സ്ഥാനത്തെത്തിയ ബിജെപി 87803 (9.45%) വോട്ടുകളും നേടി.
മൂന്നാംവട്ടവും കോട്ട ഇളക്കം തട്ടാതെ കാത്തു സൂക്ഷിക്കുക എന്ന ലക്ഷ്യവുമായാണ് എൽഡിഎഫ് മണ്ഡലത്തിൽ പോരിനിറങ്ങുന്നത്. ആദ്യം മുൻ സ്‌പീക്കർ കെ രാധാകൃഷ്ണന്റെ പേര് മണ്ഡലത്തിൽ ഉയർന്നു കേട്ടെങ്കിലും, രണ്ടു വട്ടം മണ്ഡലം കൈവിടാതെ സൂക്ഷിച്ച പികെ ബിജുവിനാണ്നു എല്‍ഡിഎഫ് അവസരം നല്‍കിയത്. സിപിഎമ്മിന്‍റെ ശക്തമായ സംഘടന ശക്തി തന്നെയാണ് എല്‍ഡിഎഫിന്‍റെ അനുകൂല ഘടകം. മണ്ഡലത്തിൽ പികെ ബിജുവിനുള്ള വ്യക്തി ബന്ധങ്ങളും സാധാരണക്കാരൻ എന്ന പ്രതിച്ഛായയും വോട്ടർമാർക്കിടയിൽ സ്വാധീനം ചെലുത്തുമെന്ന് എൽഡിഎഫ് കണക്ക് കൂട്ടുന്നു. 2206 കോടിയുടെ വികസനം മണ്ഡലത്തിൽ നടപ്പാക്കിയെന്നാണ് എല്‍ഡിഎഫ് അവകാശപ്പെടുന്നു.
രാഹുൽ ഗാന്ധിയുടെ ടാലന്റ് ഹണ്ടിലൂടെ യൂത്ത് കോൺഗ്രസ് നേതൃ നിരയിൽ എത്തിയ രമ്യ ഹരിദാസാണ് ആലത്തൂരിലെ യുഡിഎഫ് സ്ഥാനാർഥി. പാട്ടുപാടിയും വോട്ടർമാർക്ക് ഒപ്പം നടന്നും പ്രചാരണം തുടങ്ങിയ രമ്യ നാട്ടിലെ താരമാണ്. പരിസ്ഥിതി ദളിത് സമരങ്ങൾക്ക് നേതൃത്വം നൽകിയ അനുഭവവും രമ്യയ്ക്ക് അനുകൂലമാകുമെന്ന് യുഡിഎഫ് നേതൃത്വം കണക്കുകൂട്ടുന്നു. മണ്ഡലത്തിലെ കണക്കുകളും ചരിത്രവും പ്രതികൂലമാണെങ്കിലും മാറിയ രാഷ്ട്രീയ സാഹചര്യത്തിൽ മണ്ഡലം പിടിച്ചെടുക്കാൻ സാധിക്കും എന്നു തന്നെയാണ് യുഡിഎഫ് പ്രതീക്ഷ.
സിപിഐയിലൂടെ രാഷ്ട്രീയത്തിലെത്തി, പിന്നീട് രാഷ്ട്രീയ ചുവട് മാറ്റം നടത്തിയ ടിവി ബാബുവാണ് ഇത്തവണ മണ്ഡലത്തിലെ എൻഡിഎ സ്ഥാനാർഥി. ബിഡിജെഎസ് പ്രതിനിധിയായാണ് ബാബു ആലത്തൂരിൽ എത്തുന്നത്. മോദി സർക്കാർ പ്രഖ്യാപിച്ച വികസന പദ്ധതികൾ ഉയർത്തിക്കാട്ടി തന്നെയാണ് എൻഡിഎയുടെ മണ്ഡലത്തിലെ പ്രധാന പ്രചരണം. ചില സ്ഥലങ്ങളിൽ ബിജെപിയ്ക്കുള്ള മേല്‍കൈ ബാബുവിന് ഗുണം ചെയ്യും. 2009 ൽ എൻഡിഎയ്ക്ക് മണ്ഡലത്തിൽ ആകെ ലഭിച്ചത് 53 390 വോട്ടുകളായിരുന്നെങ്കിൽ 2014 ൽ അത് 87,803 ആയി ഉയർത്താൻ സാധിച്ചതും, എൻഡിഎ ക്യാമ്പുകളിൽ പ്രതീക്ഷ നൽകുന്നു.
പലമേഖലകളിലും കുടിവെള്ള പ്രശ്നം രൂക്ഷമായുള്ള ആലത്തൂരിൽ, ജലം ഒരു പ്രധാന വിഷയമാണ്. ഏറിയ വിഭാഗം കർഷകർ ഉള്ള മണ്ഡലത്തിൽ കാർഷിക പ്രശ്നങ്ങളും , അനുബന്ധ പദ്ധതികളും വോട്ടർമാരെ സ്വാധീനിക്കുന്ന വിഷയങ്ങളാണ്. ജനുവരി 30 വരെയുള്ള ഇലക്ഷൻ കമീഷന്റെ ഔദ്യോഗിക കണക്കുകളിൽ 1234294 വോട്ടർമാരാണ് ആലത്തൂർ മണ്ഡലത്തിലുള്ളത്. ഇതിൽ 603854 പുരുഷ വോട്ടർമാരും , 630438 സ്ത്രീ വോട്ടർമാരും രണ്ട് ട്രാൻസ്‌ജൻഡേഴ്‌സും ഉൾപ്പെടുന്നു.
