മലപ്പുറം: തിരൂരില്‍ ആറ് കിലോ കഞ്ചാവുമായി അസം സ്വദേശി ഉൾപ്പെടെ രണ്ട് പേരെ എക്സൈസ് സംഘം പിടികൂടി. ചട്ടിപ്പറമ്പ് സ്വദേശി കൊളമ്പിൽ വീട്ടിൽ സാദിഖ് അലി, അസം സ്വദേശി തപൻ റോയ് എന്നിവരെയാണ് എക്സൈസ് റെയ്ഞ്ച് ഇൻസ്പെക്ടർ പി എൽ ബിനുകുമാറും സംഘവും അറസ്റ്റ് ചെയ്തത്. തിരൂർ എക്സൈസ് സർക്കിൾ ഇൻസ്പെക്ടറുടെ നിർദേശത്തെ തുടർന്ന് റെയിൽവേ സ്റ്റേഷൻ കേന്ദ്രീകരിച്ച് നടത്തിയ പരിശോധനയിലാണ് ഇരുവരും പിടിയിലായത്.
സ്കൂൾ, കോളജ് വിദ്യാർഥികൾക്ക് കഞ്ചാവ് എത്തിച്ച് നൽകുന്നവരെ പിടികൂടി ചോദ്യം ചെയ്തതിൽ നിന്നാണ് ഇവരെക്കുറിച്ച് വിവരം ലഭിച്ചത്. ആന്ധ്രയിൽ നിന്നും ട്രെയിൻ മാർഗം കൊണ്ടുവരുന്ന കഞ്ചാവ് രണ്ട് കിലോയുടെ പാക്കറ്റുകളാക്കി ചില്ലറ വിൽപനക്കാർക്ക് കൈമാറുന്നതാണ് പ്രതികളുടെ രീതി. സാദിഖ് അലി നിരവധി കഞ്ചാവ് കേസുകളിൽ പ്രതിയാണെന്ന് പരിശോധനക്ക് നേതൃത്വം നല്‍കിയ ബിനുകുമാർ പറഞ്ഞു. ഇരുവരെയും കോടതിയിൽ ഹാജരാക്കി റിമാന്റ് ചെയ്തു.
