മലപ്പുറം : വഖഫ് ബോർഡ് നിയമനം പി.എസ്.സിക്ക് വിട്ട് വിഷയത്തിൽ വിവാദങ്ങൾ കത്തി നിൽക്കെ സമസ്ത അധ്യക്ഷൻ ജിഫ്രി മുത്തുക്കോയ തങ്ങളുമായി കൂടിക്കാഴ്‌ച നടത്തി കായിക മന്ത്രി വി.അബ്ദുറഹിമാൻ. ചർച്ചയിൽ വഖഫ് ബോർഡ് നിയമനവുമായി ബന്ധപ്പെട്ട ആശങ്കകൾ പരിഹരിക്കാനുള്ള നടപടികൾ സർക്കാരിന്‍റെ ഭാഗത്തുനിന്നും ഉണ്ടാകുമെന്ന് മന്ത്രി ഉറപ്പുനൽകി.
മുണ്ടക്കുളം ജാമിഅ ജലാലിയ കോംപ്ലക്‌സിലാണ് ഇരുവരും കൂടിക്കാഴ്‌ച നടത്തിയത്. കേരളത്തിലെ സമാധാനാന്തരീക്ഷം തകരുന്നത് ഒഴിവാക്കുന്നതിനുള്ള വിവേക പൂർണമായ സമീപനം സ്വീകരിച്ച മുത്തുക്കോയ തങ്ങളെ മന്ത്രി അഭിനന്ദിച്ചു.
വഖഫ് ബോർഡ് നിയമനവുമായി ബന്ധപ്പെട്ട ആശങ്കകൾ പരിഹരിക്കുന്നതിന് മുഖ്യമന്ത്രിയുടെ നേതൃത്വത്തിൽ യോഗം ചേരുമെന്ന് മന്ത്രി പറഞ്ഞു. ഈ യോഗത്തിൽ സമസ്ത പ്രതിനിധികൾ പങ്കെടുക്കുമെന്ന് സയ്യിദ് ജിഫ്രി മുത്തുകോയ തങ്ങൾ ചർച്ചയിൽ മന്ത്രിയെ അറിയിച്ചു.
വഖഫ് നിയമനം പി.എസ്.സിക്ക് വിടുന്നതിലൂടെ സ്വജനപക്ഷപാതിത്വവും പിൻവാതിൽ നിയമനവും തടയാമെന്ന സദുദ്ദേശം മാത്രമാണ് സർക്കാറിനുള്ളത്. ഏതെങ്കിലും വിഭാഗത്തിന്‍റെ അവകാശങ്ങൾ ഇല്ലാതാക്കുന്ന സമീപനം സർക്കാരിനില്ലെന്നും മന്ത്രി വ്യക്‌തമാക്കി.
ALSO READ: Appointments in Waqf Board: വഖഫ് ബോര്‍ഡ് നിയമനം: മുസ്ലിം ലീഗ് പ്രക്ഷോഭത്തിലേക്ക്
കഴിഞ്ഞ ദിവസമാണ് മുസ്ലിം കോഡിനേഷൻ കമ്മിറ്റി പള്ളികളിൽ നടത്താൻ തീരുമാനിച്ചിരുന്ന ബോധവത്‌കരണ പരിപാടിയിൽ നിന്ന് സമസ്ത പിന്മാറിയത്. സംഭവം വലിയ വിവാദങ്ങൾക്ക് ഇടയാക്കിതിന് പിന്നാലെയായിരുന്നു നടപടി. ഇത് മുസ്ലിം ലീഗിന് ഉൾപ്പടെ വലിയ പ്രതിസന്ധിയാണ് ഉണ്ടാക്കിയത്.
