കോട്ടയം: സംസ്ഥാന ജൂനിയര്‍ അത്‌ലറ്റിക് മീറ്റ് നിര്‍ത്തിവച്ചതിന് പിന്നാലെ കായികമേള നടത്തിപ്പുമായി ബന്ധപ്പെട്ട് വിവാദം പുകയുന്നു. ഹാമര്‍ തലയില്‍കൊണ്ട് വിദ്യാര്‍ഥിക്ക് പരിക്കേറ്റ സംഭവത്തില്‍ സംഘാടകര്‍ക്കെതിരെ പൊലീസ് കേസെടുത്തതിന് പിന്നാലെ കായികമേള നടത്താന്‍ അനുമതി നല്‍കിയിട്ടില്ലെന്ന് കൗണ്‍സില്‍ യോഗത്തില്‍ നഗരസഭാ അധ്യക്ഷ അറിയിച്ചു. കായികമേള നടത്തിപ്പില്‍ വീഴ്ച വന്നിട്ടുണ്ടോയെന്ന് പൊലീസ് പരിശോധിക്കും. രാവിലെ ആര്‍.ഡി.ഒ അനില്‍ ഉമ്മന്‍ അടക്കമുള്ളവര്‍ സ്‌റ്റേഡിയത്തിലെത്തി. പ്രാഥമിക വിവരങ്ങള്‍ ശേഖരിക്കുകയാണെന്നും നിയമപരമായ നടപടികള്‍ ഉണ്ടാകുമെന്നും അദേഹം വ്യക്തമാക്കി. സംഭവത്തില്‍ അന്വേഷണം പുരോഗമിക്കുന്ന സാഹചര്യത്തില്‍ മീറ്റ് നിര്‍ത്തിവയ്ക്കാന്‍ രാവിലെ തീരുമാനിച്ചിരുന്നു.
കായികമേള നടത്താന്‍ അനുമതി നല്‍കിയിരുന്നില്ലെന്ന് കോട്ടയം നഗരസഭാ അധ്യക്ഷ കൗണ്‍സില്‍ യോഗത്തിലാണ് കായികമേളക്ക് അനുമതി നല്‍കിയിരുന്നില്ലെന്ന് നഗരസഭാ അധ്യക്ഷ അറിയിച്ചത്. വിദ്യാര്‍ഥിയുടെ കുടുംബത്തിന് സാമ്പത്തികസഹായം അനുവദിക്കാനും യോഗം തീരുമാനിച്ചു. എന്നാല്‍ ഇത്തരത്തില്‍ സാഹായം അനുവദിക്കാന്‍ വകുപ്പില്ലെന്ന് കൗണ്‍സിലര്‍ ടോണി തോട്ടം പറഞ്ഞു. എന്നാല്‍ നഗരസഭാ അറിയാതെയാണ് മേള നടത്തിയതെന്ന് ചെയര്‍പേഴ്‌സണ്‍ പറയമ്പോഴും വെള്ളിയാഴ്ച നടന്ന ഉദ്ഘാടന യോഗത്തില്‍ അധ്യക്ഷത വഹിച്ചത് ചെയര്‍പേഴ്‌സണ്‍ തന്നെയായിരുന്നു. സംഘാടകര്‍ക്കെതിരെ നിയമനടപടി സ്വീകരിക്കുന്ന പക്ഷം ചെയര്‍പേഴ്‌സണും പ്രതിയാകാനിടയുണ്ട്.അതിനിടെ യോഗം നടക്കുന്ന നഗരസഭാ ഹാളിലേക്ക് ഡിവൈഎഫ്ഐ പ്രവര്‍ത്തകര്‍ തള്ളിക്കയറി. ചെയര്‍പേഴ്‌സണ്‍ അത്‌ലറ്റിക് അസോസിയേഷന് എല്ലാ അനുവാദവും പിന്‍വാതിലിലൂടെ നല്‍കിയിരുന്നുവെന്നും ഇപ്പോള്‍ നാടകം കളിക്കുകയാണെന്നും ഡിവൈഎഫ്ഐ ആരോപിച്ചു. അതിക്രമിച്ച് കയറിയ ഡിവൈഎഫ്ഐ പ്രവര്‍ത്തകര്‍ക്കെതിരെ നിയമ നടപടി സ്വീകരിക്കാന്‍ കൗണ്‍സില്‍ യോഗം തീരുമാനിച്ചിട്ടുണ്ട്.
