കോതമംഗലം: വൈദ്യുതി കമ്പിയില്‍ നിന്ന് ഷോക്കേറ്റ് കാട്ടാന ചെരിഞ്ഞു. എറണാകുളം കുട്ടമ്പുഴയില്‍ രാത്രി ഒരു മണിയോടെയായിരുന്നു സംഭവം. ആനക്കയം പാലക്കുന്നേല്‍ ലക്ഷമണന്റെ പുരയിടത്തിലാണ് ആനയെ കണ്ടെത്തിയത്. കാട്ടില്‍ നിന്നും പുഴ കടന്ന് കൃഷിയിടത്തിൽ എത്തിയ ആന അവിടെയുണ്ടായിരുന്ന വാഴയും തെങ്ങും മറ്റ് കാർഷിക വിളകളും നാശിപ്പിക്കുന്നതിനിടയില്‍ തെങ്ങ് വീണ് വൈദ്യുതി പോസ്റ്റും ലൈന്‍ കമ്പികളും ആനയുടെ മുകളില്‍ പൊട്ടിവീണതാണ് ഷോക്കേൽക്കാൻ കാരണം. ഏകദേശം പന്ത്രണ്ട് വയസ് പ്രായം തോന്നിക്കുന്ന മൊട്ടക്കൊമ്പനാണ് ചെരിഞ്ഞത്. വനപാലകർ സ്ഥലത്തെത്തി തുടര്‍നടപടികൾ സ്വീകരിച്ചു. അതേസമയം ഈ ആന നേരത്തെയും പ്രദേശത്ത് എത്തിയിട്ടുണ്ടെന്നും. മുമ്പ് രണ്ടു പേരുടെ മരണത്തിന് കാരണക്കാരനായ ആനയാണിതെന്ന സംശയവും നാട്ടുകാര്‍ ഉയര്‍ത്തി.
ജനവാസ മേഖലയായ പ്രദേശത്ത് ആനയിറങ്ങി കൃഷി നശിപ്പിക്കുന്നത് പതിവാണെന്ന് നാട്ടുകാര്‍ പറയുന്നു. കൃഷിനാശം സംഭവിച്ചാലും നഷ്ടപരിഹാരം ലഭിക്കുന്നില്ലെന്നും നാട്ടുകാര്‍ ആരേപിച്ചു. ആനയിറങ്ങാൻ സാധ്യതയുള്ളയിടങ്ങളിൽ ഫെൻസിങ് സ്ഥാപിക്കണമെന്നും, കൃഷി നാശം സംഭവിച്ചവർക്ക് നഷ്ടപരിഹാരം നൽകണമെന്നും നാട്ടുകാർ ആവശ്യപ്പെട്ടു.
