എറണാകുളം: പത്ത് രൂപയെ ചൊല്ലിയുള്ള തർക്കത്തെ തുടർന്ന് റസ്റ്റോറന്‍റ് ഉടമയെയും മക്കളെയും കുത്തി പരിക്കേൽപ്പിച്ച മൂന്ന് പ്രതികൾ പിടിയിൽ. ആവണംകോട് സ്വദേശികളായ ആലക്കട വീട്ടിൽ കിരൺ(25), ചെറുകുളം വീട്ടിൽ നിഥിൻ(27), അണിങ്കര വീട്ടിൽ വിഷ്ണു(24) എന്നിവരാണ് നെടുമ്പാശ്ശേരി പൊലീസിന്‍റെ പിടിയിലായത്.
വ്യാഴാഴ്‌ച രാത്രിയായിരുന്നു സംഭവം. നെടുമ്പാശ്ശേരി എയർ പോർട്ടിനടുത്ത് 'ഖാലി വാലി' എന്ന റസ്റ്റോറന്‍റിന്‍റെ ഉടമ അബ്ദുൾ ഗഫൂർ, മക്കളായ മുഹമ്മദ് റംഷാദ്, യാസർ എന്നിവരെയാണ് പ്രതികൾ കുത്തി പരിക്കേൽപ്പിച്ചത്. ഷവർമക്ക് 10 രൂപ അധികമായി എന്ന തർക്കമാണ് കത്തിക്കുത്തിലേക്ക് കലാശിച്ചത്. കടയിൽ 30,000 രൂപയുടെ വസ്തു വകകളും പ്രതികൾ നശിപ്പിച്ചു.
മുഹമ്മദ് റംഷാദ് സ്വകാര്യ ആശിപത്രിയിൽ തീവ്രപരിചരണ വിഭാഗത്തിൽ ചികിത്സയിൽ ആണ്. നിരവധി അബ്‌കാരി, കഞ്ചാവ് കേസുകളിലെ പ്രതികളാണ് പിടിയിലായ മൂന്ന്പേരും.
ശ്രീമൂല നഗരം, ശ്രീഭൂതപുരത്ത് പ്രവർത്തിക്കാതെ കിടക്കുന്ന ഇഷ്ടികകളത്തിൽ നിന്നും, ആവണം കോട് കപ്പത്തോട്ടത്തിൽ നിന്നുമാണ് ഇവരെ പിടികൂടിയത്. അങ്കമാലി കോടതിയിൽ ഹാജരാക്കിയ പ്രതികളെ റിമാന്‍റ് ചെയ്തു.
