കൊച്ചി: ആന്തൂരിൽ പ്രവാസി വ്യവസായി സാജൻ പാറയിൽ ആത്മഹത്യ ചെയ്ത സംഭവത്തിൽ നഗരസഭയെ പിന്തുണച്ച് സർക്കാർ ഹൈക്കോടതിയിൽ. നഗരസഭക്ക് വീഴ്ച പറ്റിയിട്ടില്ലെന്ന് ഹൈക്കോടതിയിൽ സമർപ്പിച്ച സത്യവാങ്മൂലത്തിൽ സർക്കാർ പറയുന്നു. കൺവെൻഷൻ സെന്‍റര്‍ നിർമാണത്തിൽ സാജന് വീഴ്ച പറ്റി. കോൺക്രീറ്റ് തൂണുകൾക്ക് പകരം ഉരുക്ക് ഷീറ്റുകൾ ഉപയോഗിച്ചാണ് നിർമാണം നടത്തിയതെന്നും സർക്കാർ കുറ്റപ്പെടുത്തുന്നു. അംഗീകൃത ബിൽഡിംഗ് പെർമിറ്റിന് വിരുദ്ധമായാണ് നിർമാണം നടന്നതെന്നും സർക്കാർ സത്യവാങ്മൂലത്തിൽ വ്യക്തമാക്കുന്നു. ഇക്കാരണങ്ങളാലാണ് പെർമിറ്റ് നൽകാതിരുന്നത്. വിജിലൻസിന്റെ സംയുക്ത പരിശോധനയിലും ഇക്കാര്യം ബോധ്യമായതാണ്. കെട്ടിട നിർമാണ ചട്ടം ലംഘിച്ചതിനാലാണ് കൺവെൻഷൻ സെന്ററിന് അനുമതി നൽകാത്തതെന്നും ജനങ്ങൾ കൂടുതലായി എത്തുന്ന സ്ഥലമായതിനാൽ നഗരസഭ ജാഗ്രത പാലിച്ചുവെന്നും സർക്കാർ സത്യവാങ്മൂലത്തിലൂടെ വ്യക്തമാക്കി.
ആന്തൂർ ആത്മഹത്യ വിവാദത്തിൽ നഗരസഭാധ്യക്ഷ പി കെ ശ്യാമളയ്ക്ക് വീഴ്ച പറ്റിയെന്ന് വ്യക്തമാക്കി ഭരണപക്ഷത്ത് നിന്നും നിരവധി നേതാക്കൾ രംഗത്തെത്തിയിരുന്നു. പി കെ ശ്യാമളയ്‌ക്കെതിരെ നടപടി സ്വീകരിക്കുകയും ചെയ്തിരുന്നു. സാജന്റെ കൺവെൻഷൻ സെന്ററിന് പ്രവർത്തനാനുമതി നൽകാനും സർക്കാർ തീരുമാനിച്ചിരുന്നു. ഇതിനിടെയാണ് ഹൈക്കോടതിയിൽ സർക്കാർ വ്യത്യസ്ത നിലപാട് സ്വീകരിച്ചത്.
