കണ്ണൂർ: സ്ഥാനാർഥിയുടെ മരണത്തെ തുടർന്ന് മാറ്റിവെച്ച കണ്ണൂർ ജില്ലാ പഞ്ചായത്ത് തില്ലങ്കേരി ഡിവിഷനിൽ വോട്ടെടുപ്പ് ആരംഭിച്ചു.64 ബൂത്തുകളിൽ അകത്തും പുറത്തും വീഡിയോ ചിത്രീകരണം ഏർപ്പെടുത്തി. ഇലക്ഷൻ കമ്മിഷൻ നിർദ്ദേശിച്ച തിരിച്ചറിയൽ കാർഡ് ഇല്ലാത്ത ആരെയും ബൂത്തിൽ പ്രവേശിപ്പിക്കില്ല. 64 ബൂത്തുകളും സുരക്ഷ ഭീഷണി ഉള്ളതിനാൽ മതിയായ പോലീസ് ഉദ്യോഗസ്ഥരെ നിയോഗിച്ചിട്ടുണ്ട്.
മുന്നണികൾ അഭിമാന പോരാട്ടമായി എടുത്തിരിക്കുന്ന തെരഞ്ഞെടുപ്പിൽ ഇഞ്ചോടിഞ്ചു മത്സരമാണ് നടക്കുന്നത്.സിറ്റിങ് സീറ്റ് നിലനിർത്താൻ യുഡിഎഫ് പരിശ്രമിക്കുമ്പോൾ പ്രദേശത്തു മുൻപെങ്ങും ഇല്ലാത്ത വിധം ഉണ്ടാക്കിയ മുന്നേറ്റം തില്ലങ്കേരി ഡിവിഷൻ വിജയത്തിലൂടെ നിലനിർത്താൻ ആണ് എൽഡിഎഫിന്‍റെ തീവ്രശ്രമം. പരമാവധി വോട്ടു പിടിച്ച് തങ്ങളുടെ ശക്തി കാണിക്കാൻ എൻഡിഎയും രംഗത്തുണ്ട്.
യുഡിഎഫിനായി കേരള കോൺഗ്രസ് ജോസഫ് ഗ്രൂപ്പിലെ ലിന്‍റ ജെയിംസ് മത്സരിക്കുമ്പോൾ സിപിഎമ്മിന്‍റെ ഇരിട്ടി ഏരിയ സെക്രട്ടറി സ്ഥാനം രാജിവച്ച് ബിനോയി കുര്യനാണ് എൽഡിഎഫിനായി ജനവിധി തേടുന്നത്. ബിജെപി ജില്ലാ സെക്രട്ടറി കൂട്ട ജയപ്രകാശാണ് എൻഡിഎക്കു വേണ്ടി രംഗത്തുള്ളത്. ജെഎസ്എസ് സ്ഥാനാർഥി മൈക്കിൾ പടവിൽ ഉൾപ്പെടെ 4 സ്വതന്ത്രരും രംഗത്തുണ്ട്.
പഞ്ചായത്ത് ഉപാധ്യക്ഷ സ്ഥാനത്തേക്ക് ബിനോയ് കുര്യനെയാണ് സിപിഎം ജില്ലാ നേതൃത്വം പരിഗണിച്ചത്. ഇതിനായി ഇദ്ദേഹം ഏരിയ കമ്മിറ്റി സെക്രട്ടറി സ്ഥാനം ഒഴിയുകയും ചെയ്തിരുന്നു. തെരഞ്ഞെടുപ്പിൽ ജയിച്ചാൽ ഇ.വിജയന് പകരം ബിനോയ് കുര്യൻ ജില്ലാ പഞ്ചായത്ത് വൈസ് പ്രസിഡന്‍റാകും.
