കണ്ണൂര്‍: കൊവിഡ് വ്യാപനം കണക്കിലെടുത്ത് കണ്ണൂര്‍ സെന്‍ട്രല്‍ ജയിലിലെ 110 തടവുകാര്‍ക്ക് പരോള്‍ നല്‍കി. ജയിലിലെ അന്തേവാസികള്‍ക്കിടയിലും ഉദ്യോഗസ്ഥര്‍ക്കിടയിലും കൊവിഡ് വര്‍ധിച്ചുവരുന്ന സാഹചര്യത്തിലാണ് ജയില്‍ തടവുകാരുടെ അംഗസംഖ്യ ക്രമീകരിക്കാന്‍ ജയില്‍ വകുപ്പ് തീരുമാനിച്ചത്. ഇതുപ്രകാരമാണ് തടവുകാര്‍ക്ക് താല്‍കാലിക പരോള്‍ അനുവദിച്ചത്. രണ്ടു ദിവസങ്ങളിലായി 110 തടവുകാരാണ് പരോളില്‍ ഇറങ്ങിയത്. ചൊവ്വാഴ്‌ച 50 തടവുകാര്‍ കൂടി പുറത്തിറങ്ങും. കൂടാതെ ജയില്‍ ജീവനക്കാര്‍ക്ക് നിര്‍ബന്ധിത അവധിയും നല്‍കി.
ഇതിനിടെ ജയിലില്‍ കൊവിഡ് വ്യാപനത്തില്‍ ആശങ്ക വേണ്ടെന്ന് ജയില്‍ ഡിജിപി ഋഷിരാജ് സിങ് പറഞ്ഞു. കണ്ണൂര്‍ ജയിലിലെ ആര്‍ടിപിസിആര്‍ പരിശോധനയില്‍ 178 അന്തേവാസികള്‍ക്കും 12 ഉദ്യോഗസ്ഥര്‍ക്കും കൊവിഡ് സ്ഥിരീകരിച്ചിരുന്നു. ശിക്ഷാതടവുകാര്‍ക്ക് 90 ദിവസത്തെ പരോള്‍ അനുവദിക്കാന്‍ സുപ്രീം കോടതി നിയോഗിച്ച ജയില്‍ ഉന്നതാധികാര സമിതിയാണ് പരോളിനുള്ള ഉത്തരവ് ഉറക്കിയത്.
ക്രിമിനല്‍ പശ്ചാത്തലമില്ലാത്തവരും സ്ഥിരം കുറ്റവാളികളല്ലാത്തവരും ഏഴു വര്‍ഷത്തിനു താഴെ ശിക്ഷിക്കപ്പെടാവുന്ന വകുപ്പുകള്‍ ചുമത്തപ്പെട്ടവരും നിലവില്‍ ഒരു തവണയെങ്കിലും പരോള്‍ അനുവദിച്ചിട്ടുള്ളവര്‍ക്കും 60 വയസിനു മുകളില്‍ പ്രായമുള്ളവര്‍ക്കുമാണ് പരോള്‍ അനുവദിച്ചത്. പോക്‌സോ കേസ് ഉള്‍പെടാത്തവര്‍ക്കാണ് പരോള്‍ നല്‍കിയിട്ടുള്ളത്.
50 വയസിനു മുകളിലുള്ള സ്ത്രീകള്‍ക്കും പരോള്‍ നല്‍കിയിട്ടുണ്ട്. രണ്ടു ദിവസങ്ങളിലായി താത്കാലിക മോചനം ലഭിച്ചവര്‍ വീടുകളിലേക്ക് മടങ്ങി. പരോളിലിറങ്ങുന്നവര്‍ കൊവിഡ് പ്രോട്ടോകോള്‍ കൃത്യമായി പാലിക്കണമെന്നും സര്‍ക്കാര്‍ നിര്‍ദേശിക്കുന്ന നിയന്ത്രണങ്ങള്‍ പാലിച്ച് വീടുകളില്‍ തന്നെ കഴിയണമെന്നും ജയില്‍ അധികൃതര്‍ നിര്‍ദേശം നല്‍കിയിട്ടുണ്ട്.
also read: കണ്ണൂർ സെന്‍ട്രല്‍ ജയിലിലെ കൊവിഡ് വ്യാപനം ; ആശങ്ക വേണ്ടെന്ന് ഋഷിരാജ് സിംഗ്
