ആലപ്പുഴ: കാലഹരണപ്പെട്ട ഭരണസമിതിയും ജനറൽ സെക്രട്ടറി ഉൾപ്പെടുന്ന നേതൃത്വവുമാണ് എസ്എൻഡിപി യോഗത്തിന്‍റേതെന്ന് ശ്രീനാരായണ സഹോദര ധർമവേദി സംസ്ഥാന ജനറൽ സെക്രട്ടറി സൗത്ത് ഇന്ത്യൻ വിനോദ്. കോടതി അയോഗ്യരാക്കിയവരാണ് ഇല്ലാത്ത അധികാരം ഉണ്ടെന്ന് പ്രഖ്യാപിച്ച് യോഗത്തിന്‍റെ തലപ്പത്ത് കടിച്ച് തുങ്ങി നിയമസംവിധാനത്തെ വെല്ലുവിളിക്കുന്നത്. ജസ്റ്റീസ് നഗരേഷും ഹൈക്കോടതി ഡിവിഷൻ ബഞ്ചും രജിസ്ട്രാർ കമ്പനി ഐ.ജിയും അയോഗ്യരാണെന്ന് കണ്ടെത്തിയ ഭരണസമിതിയാണ് വെള്ളാപ്പള്ളിയുടേത്.
കമ്പനി നിയമപ്രകാരം, തുടർച്ചയായി മൂന്ന് വർഷം റിട്ടേൺ സമർപ്പിക്കാത്ത കമ്പനികൾ അസാധുവാകും എന്ന നിയമം നിലനിൽക്കേയാണ് യോഗത്തിന്‍റെ കണക്കുകൾ പതിറ്റാണ്ടുകളോളം നൽകാതെ സ്വയം അയോഗ്യത വെള്ളാപ്പള്ളി ചോദിച്ച് വാങ്ങിയതെന്നും അദ്ദേഹം ആരോപിച്ചു.
വെളളാപ്പളളി സ്വയം തെറ്റ് തിരുത്തി യോഗത്തിന്‍റെ ജനറൽ സെക്രട്ടറി സ്ഥാനം ഒഴിഞ്ഞ് അഡ്മിനിസ്ട്രേറ്ററെ ഭരണം ഏല്പിക്കേണ്ട സമയം അതിക്രമിച്ചിരിക്കുകയാണ്. എസ്എൻഡിപി യോഗം ജനറൽ സെക്രട്ടറിയായി തുടരാൻ ഒരു നിമിഷം പോലും വെള്ളാപ്പള്ളിയ്ക്ക് അർഹതയില്ല. ഒരു മഞ്ഞ വിപ്ലവം ആയിരിക്കും കേരളം കാണാൻ പോകുന്നത്.
എസ്എൻഡിപി യോഗത്തിലെ സ്ഥിരാഗംങ്ങളായ മുഴുവൻ ശ്രീനാരായണീയർക്കും വോട്ടവകാശം നൽകികൊണ്ടുള്ള കോടതി വിധിയെ സ്വാഗതം ചെയ്യുന്നതായും അദ്ദേഹം പറഞ്ഞു. അധികാരം നഷ്ടപ്പെട്ട ഭരണാധികാരിയുടെ ജല്പനം സ്ഥിര ബുദ്ധിയില്ലാത്തവരുടെ രീതിയിലാണെന്നും നേതാക്കൾ കുറ്റപ്പെടുത്തി.
ALSO READ: 'യുക്രൈനില്‍ അകപ്പെട്ടത് നാട്ടിലേക്ക് മടങ്ങാന്‍ നില്‍ക്കവെ'; ആശങ്ക പങ്കുവച്ച് പിതാവ്
