തിരുവനന്തപുരം: പ്രാതലിന് പുട്ട് ഇഷ്‌ടമില്ലാത്തവരായി ആരും ഉണ്ടാകില്ല. എന്നാൽ നമ്മളിൽ പലരും ഇതുവരെ രുചിച്ചിട്ടില്ലാത്ത പുട്ടുകളുടെ വൈവിധ്യമാർന്ന രുചി കൂട്ടുകളാൽ ആകർഷകമാകുകയാണ് കിഴക്കേക്കോട്ട പുത്തരിക്കണ്ടം മൈതാനിയിൽ നടക്കുന്ന അനന്തപുരി മേള. തലസ്ഥാന നഗരിയിലെ ചെറുകിട വ്യവസായ സംരംഭകരെ പങ്കെടുപ്പിച്ച് സംഘടിപ്പിക്കുന്നതാണ് മേള.
വ്യവസായ വാണിജ്യ വകുപ്പും ജില്ല വ്യവസായ കേന്ദ്രവും സംയുക്തമായാണ് മേള സംഘടിപ്പിച്ചിരിക്കുന്നത്. ചെറുകിട വ്യവസായ സംരംഭകരുടെ ഉൽപ്പന്നങ്ങൾ ജനങ്ങൾക്ക് പരിചയപ്പെടുത്തുകയാണ് മേളയുടെ ലക്ഷ്യം. 20 വർഷമായി കാട്ടാക്കട പൂവച്ചലിൽ 'ബി സ്റ്റാർ അഗ്രോ ന്യുട്രി ഫുഡ്‌സ്' എന്ന വ്യവസായ സംരംഭം നടത്തുന്ന ഷിനു ബെർട്ടിൻ ദമ്പതികളാണ് വൈവിധ്യമാർന്ന പുട്ടുകളുടെ രുചിക്കൂട്ടുകൾ മേളയിൽ എത്തിച്ചിരിക്കുന്നത്.
നവീന ആശയങ്ങളുമായി സംരംഭ മേഖലയിലെത്തുന്ന ചെറുകിട സംരംഭകര്‍ക്ക് ഈ മേഖലയില്‍ കൂടുതല്‍ പ്രോത്സാഹനം നല്‍ക്കുന്നതിനും അവരുടെ ഉത്‌പന്നങ്ങള്‍ക്ക് വിപണി കണ്ടെത്തുന്നതിനും അനന്തപുരി മേള ഏറെ സഹായകരമാണ്. സംരംഭകര്‍ക്ക് വ്യത്യസ്‌തമായ നിരവധി ഉത്‌പന്നങ്ങള്‍ ജനങ്ങള്‍ക്ക് മുന്നില്‍ അവതരിപ്പിക്കാന്‍ മേളയിലൂടെ സാധിച്ചു.
അനന്തപുരി മേളയിലെ വ്യത്യസ്‌ത വിഭവങ്ങള്‍: ചോക്ലേറ്റ് പുട്ട്, വാനില പുട്ട്, ബീറ്റ്റൂട്ട് പുട്ട്, ചക്കക്കുരു പുട്ട്, നവര പുട്ട് എന്നിങ്ങനെ വിവിധയിനം പുട്ടുപൊടികളുടെ പ്രദർശനവും വിൽപ്പനയുമാണ് മേളയിലെ പ്രധാന ആകർഷണം.
നമ്മളിൽ ഭൂരിഭാഗം പേരും ഇന്ന് വരെ കഴിച്ചിട്ടില്ലാത്ത ചോക്ലേറ്റ് പുട്ട് തന്നെയാണ് മേളയിലെ ഹൈലറ്റ്. അരിപ്പൊടിയിൽ ചോക്ലേറ്റ് പൊടി ചേർത്താണ് ചോക്ലേറ്റ് പുട്ടുണ്ടാക്കുന്നത്. ഇത് വാങ്ങാൻ എത്തുന്ന ആളുകളും ഏറെയാണ്.
കാര ഇല, പരുത്തി ഇല, ആശങ്കില, ശതാവരി, തുളസി, ചീലാന്തി (പൂവരശ്‌), തെങ്ങിൻ പൂക്കുല, ആടലോടകം എന്നീ കൂട്ടുകൾ ചേർത്തുണ്ടാക്കുന്ന അവലോസ് പൊടിയും ഈ സ്റ്റാളിലെ പ്രത്യേകതയാണ്. മേളയിലെ മറ്റൊരു പ്രധാന ആകർഷണം ഔഷധ കൂട്ടുകളടങ്ങിയ ദാഹശമിനികളുടെ പ്രദർശനവും വിൽപ്പനയും നടത്തുന്ന സ്റ്റാളാണ്.
പ്രമേഹ രോഗം അകറ്റുന്ന പ്രമേഹ ദാഹശമനി, കൊളസ്‌ട്രോൾ അകറ്റുന്ന കൊളസ്‌ട്രോൾ ദാഹശമനി, മൂത്രാശയ രോഗങ്ങളും യൂറിക്ക് ആസിഡും അകറ്റുന്ന ഞെരിഞ്ഞിൽ തുടങ്ങിയവയാണ് ഈ സ്റ്റാളിലെ പ്രധാന ആകർഷണങ്ങൾ. പത്ത് വർഷമായി വെള്ളായണി ശാന്തിവിളയിൽ 'മാതാശ്രീ പ്രൊഡക്റ്റസ്' എന്ന സംരംഭം നടത്തുന്ന ലേഖയാണ് ഔഷധ ദാഹശമിനികൾ പ്രദർശനത്തിനും വില്‍പനയ്ക്കുമായി മേളയിൽ എത്തിച്ചിരിക്കുന്നത്.
പിതാവ് സുരേന്ദ്രൻ വൈദ്യരിൽ നിന്നാണ് ലേഖ ഔഷധകൂട്ടുകൾ സ്വയത്തമാക്കിയത്. ഔഷധ സസ്യങ്ങളുടെ വിവിധങ്ങളായ ഭാഗങ്ങൾ ഉപയോഗിച്ചാണ് രോഗ ശമനത്തിന് വേണ്ടിയുള്ള ദാഹശമിനികളുടെ കൂട്ട് തയ്യാറാക്കുന്നത്. എൺപതിലധികം സ്റ്റാളുകളാണ് ഇവിടെ ഒരുക്കിയിട്ടുള്ളത്.
ജൈവ ഭക്ഷ്യോൽപന്നങ്ങൾ, കൈത്തറി, കരകൗശല ഉൽപന്നങ്ങൾ, പ്രകൃതിദത്ത സോപ്പുകൾ, മറ്റ് സൗന്ദര്യ വർധക ഉത്‌പന്നങ്ങൾ, കൂൺ ഉൽപന്നങ്ങൾ, ഓട്ടോമാറ്റിക് വാട്ടർ ലെവൽ കൺട്രോളർ തുടങ്ങിയ ഉത്‌പന്നങ്ങൾ മേളയുടെ പ്രധാന ആകർഷണങ്ങളാണ്.
ആരോഗ്യ സംരക്ഷണത്തിനായുള്ള ഔഷധക്കട്ടിലും ഔഷധ കസേരയും മേളയിൽ പുതുമയേകുന്നു. മാർച്ച് 10 മുതൽ 13 വരെയാണ് മേള. പൊതുജനങ്ങൾക്ക് പ്രവേശനം സൗജന്യമാണ്. മൂന്ന് ദിവസമായി തുടരുന്ന മേള ഇന്ന് വൈകിട്ടോടെ സമാപിക്കും.
also read: വധുവിന്‍റെ 'പൊന്നമ്മാവന്‍'; നവദമ്പതികള്‍ക്ക് 108 ഇനം വിഭവങ്ങള്‍ നിരത്തി വിരുന്നൊരുക്കി അമ്മാവന്‍
