ന്യൂഡൽഹി: കഴിഞ്ഞ അഞ്ച് സാമ്പത്തിക വർഷങ്ങളിൽ രാജ്യത്തെ അർബൻ സഹകരണ ബാങ്കുകളിൽ(യുസിബി) 220 കോടിയിലധികം രൂപയുടെ തട്ടിപ്പുകൾ റിപ്പോർട്ട് ചെയ്‌തതായി റിസർവ് ബാങ്ക് ഓഫ് ഇന്ത്യ (ആർബിഐ) അറിയിച്ചു. 2018-19 കാലയളവിൽ 127.7 കോടി രൂപയുമായി ബന്ധപ്പെട്ട 181 തട്ടിപ്പ് കേസുകൾ ശ്രദ്ധയിൽപ്പെട്ടതായി വിവരാവകാശ നിയമ പ്രകാരമുള്ള ചോദ്യത്തിന് മറുപടിയായി കേന്ദ്ര ബാങ്ക് അറിയിച്ചു. 2017-18ലും, 2016-16ലും യഥാക്രമം 46.9 കോടി രൂപയും 9.3 കോടി രൂപയും ഉൾപ്പെടുന്ന 99, 27 കേസുകൾ റിപ്പോർട്ട് ചെയ്യപ്പെട്ടിട്ടുണ്ട്. 2015-16ൽ 17.3 കോടി രൂപയുമായി ബന്ധപ്പെട്ട 187 തട്ടിപ്പുകൾ റിപ്പോർട്ട് ചെയ്യപ്പെട്ടിട്ടുണ്ട്. 2014-15ൽ 478 കേസുകളിലായി 19.8 കോടി രൂപയുടെ തട്ടിപ്പാണ് റിപ്പോർട്ട് ചെയ്‌തത്. 2014-15നും 2018-19നും ഇടയിൽ അർബൻ സഹകരണ ബാങ്കുകളിൽ 221 കോടി രൂപയുടെ 972 ബാങ്ക് തട്ടിപ്പുകൾ റിപ്പോർട്ട് ചെയ്‌തതായും ആർബിഐ അറിയിച്ചു.
രാജ്യത്തൊട്ടാകെയുള്ള 1,544 അർബൻ സഹകരണ ബാങ്കുകളിലായി 2019 മാർച്ച് 31 വരെ 4.84 ലക്ഷം കോടി രൂപ നിക്ഷേപമുള്ളതായും ആർബിഐ റിപ്പോർട്ട്. ഇതിൽ ഏറ്റവും കൂടുതൽ നിക്ഷേപമുള്ള മഹാരാഷ്‌ട്രയിലെ 496 അർബൻ സഹകരണ ബാങ്കുകളിലായി 3 ലക്ഷം കോടി രൂപയുടെ നിക്ഷേപമാണുള്ളത്. ഗുജറാത്തിലെ 219 അർബൻ സഹകരണ ബാങ്കുകളിലായി 55,102 കോടി രൂപയും, കർണാടകയിലെ 263 അർബൻ സഹകരണ ബാങ്കുകളിലായി 41,096 കോടി രൂപയുമാണ് നിക്ഷേപം.
